پەژاک بە ئەرەیاونێوە، ١ و ئایاری رۆو جەهانی کرێکاراش موبارەک کەرد، داواش جە گەلو کوردی و کرێکارا و زەحمەتکێشا و ژەنا و جوانا کەرد، ئەوەکۆشایشا بێ مردای فراوانتەر بکەرا و چالاکییەکا سەرو بنەماو ئازادی رابەر ئاپۆی و چارەسەرو پرسو کوردی بیاونا بە قولەپۊپە.
پارتو ژیواو ئازادی کوردەسانی (پەژاک) بە ئەرەیاونێوە نوویسریا، ١ و ئایاری و ڕۆو جەهانی کرێکاراش جە تەمامو کرێکارا و زەحمەتکێشا کوردەسانی و ئێرانی و جیهانی و ڕابەر و بنەیانە و گەشمەرڏا موبارەک کەرد. پەیوەس بە ڕەوشو کارەساتباری کرێکارا جە وەرکەوتوو کوردەسانی و ئێرانی، واتش: "بێگومان گرڏما بە یۆگێرتەی و هامپشتی تاومێنە ئەوەکۆشای ڕەوا و دیموکراتیکی و یاومێنە بە لوتکە".
دەقو ئەرەیاوناکەو پەژاکی پی جۆرەنە:
" ١و ئایاری، ڕۆو جەهانی کرێکارا، ڕوێوەن پەی زەماوەن گێڵنای بە ئەوەکۆشای شکۆمەندانە پەی ژیوایی ئازادی و دیموکراتیکی. ڕوێوەن پەی وەرەنگاربییەیۆ ستەمکاری و دڕندەیی سیستەمو سەرمایەداری و مۆدێرنیتی وێرانکاری.
ڕۆو کرێکارا نەک تەنیا پەی کرێکارا، بەڵکووم پەی گرڏ چین و توێژەکا گلێرگەی ڕۆو یۆگێرتەی و هامپشین، بە ئامانجو بەرەو وەڵێ ئەوەکۆشای گلێرگەو دیموکراتیکی جە دژو چەوەسنایۆ و ستەمکاریی سیستەمو دەسەڵاتو دۆڵەت پارێزەکا. زەماوەنگێڵنای بەبۆنۆو ڕۆو جەهانی کرێکارا، زەماوەنێ نییەنە پەی بییەی بە کرێکاری و فارییای پەی کۆیلێوە مۆدێرنی، بەڵکوم زەماوەنێن پەی ڕزگاربییەی جە گرڏ جۆرە چەوەسنایۆ سیستەمی و دۆڵەتەکا کە بە سیمێوە لیبڕاڵییۆ گرڏ چێوەشا قۆرخکەرەن و تەمامو گلێرگەی و بەتایبەت کرێکارێشا ڕووبەڕوو هەژاریێ زیاتەر کەردەنۆ. چی ڕووەنە، زەحمەتکێشا ئەرکە ئەخلاقی و سیاسی و ڕۆشنگەرییەکا ویرو گرڏ تاکێوە ستەم ونکریا گلێرگەی مارۆوە. تا ئاکاتەی جە سەیەو ئی سیستەمە باڵادەسانە هەرمانە پێسەو ئامرازێوە چەوەسنایۆ و فارییاو ئیناسانی پەی کۆیلەو مۆدێرنی بەکارمێ، ئەوەکۆشای دیموکراتیکو کرێکارا چنی چینەکا گلێرگەی بەردەوام بۆنە. بێگومان چی ئەوەکۆشاینە کرێکارێ تەنیا نییەنێ، پەنەوازا ژەنێ و جوانێ جە ڕیزو وەڵێوە بانە تاوەکو گلێرگەی ئازاد و دیموکراتیک بنیات نریۆنە.
هەرپاسە کرێکارێ هێزێوەنێ کە تاوانە بانە پارێزنەرو ژیوگەی، بەڵام ئینە بەبێ ئازادی وێشا، ئی ئەرکە جابەجێ مەکریۆنە. سیستەمو هەرمانێ و چەوەسنایۆ کە ئارۆ جە وڵاتانە هەن، بە شێوێ مچیارە کە زەرەرێ فرە بە ئیناسان و ژیوگەی یاونۆ. پۆکەی گێڵایۆ مافو و ئازادیی کرێکارا، واتاو ئازادکەردی ژیوگەی و ڕزگارکەردەیشا جە دلێنەشییەی.
بێگومان بەشی فرەو کرێکارا جە گلێرگەکا ئارۆینە ژەنینێ، کە ڕووبەڕوو تنو ڕەگەزی باوە و کۆیلایەتیشا جە کۆیلایەتی پیایا تنتەرا. جە گلێرگەو پیاسالارینە چینو ژەنا کرێکارا فرەتەرین ستەمشا ونە کریۆنە. ڕاو ڕاگیری کەردەی جە بەردەوامیی ئی ڕەوشە کارەساتبارەی، ڕێکوزتەو ئەوەکۆشای ڕۆژانەن جە گرڏ و بوارەکانە، جە شەقامۆ تا یاگێ هەرمانێ. ئارۆ کە تەنانەت گرڏو سەندیکاکا کرێکارا جە لایەنو خاوەنکارەکا و خودو دۆڵەتەکاوە قۆرخ کریێنی، چنین بوار پەی هەناسەدای ئازاد هەن؟ بەرهەمو ڕەنجو کرێکارا ئارۆ جە لایەنو دۆڵەتەکاوە تاڵان کریۆنە و پەی سوپاو ملیۆنی و جەنگی و کۆمکوژی خەرج کریۆنە. گلیرگیوە مرۆیی چی جۆرە مەحکوما بە فەنابییەی و مشۆم بێ ئانەیە دێر بۆنە، بە گۆرە کەردە و ئەوەکۆشای دیموکراتیکی، راو دەربازبییە و ڕزگاربییەی بێزمێ.
گەلوو کوردی ئارۆ چنگەو دۆڵەت_نەتەوەییەکانە کە حەر تاکێوە کوردی پێسەو کرێکاری هەرزانی پەی چەوەسنایۆ بەکار مارۆنە. گەلێوە چی جۆرە، کە پەنەوازیش بە ڕزگارکەردەو وێش هەن جد کۆمکوژی جەسەیی و کلتووری، بۆنە بە ڕزگار کەردەو کرێکارا و ڕزگارکەردە و گلێرگەی پێسەو جمیەرە وەڵکەوتەی بەکاربێنە. گرڏو قەیرانەکا، چێرو نامنیشان و وڕارە و ئابووری، هەژاری، بئ هەرمانی، ئاورای و بەرهەم ئاردە و قازانج وازی جد سیستەمو ئێرانو ئارۆینە، کارەساتێوە گۆرەن پەی تەمامو گەلا و گرڏ و چینو کرێکارا و زەحمەتکێشا. ئی ڕەوشە مەترسیدارە و ئارۆی خەریکا جەنگ و وێرانکاریی تەرسیش چنە گنۆوە کە وەڵێ گرڏ کەسێ کرێکارا پەلکێش مکەرۆ پەی چارەنووسێوە تاریکی.
ساڵانە هەزاران گلێرۆبیێ ناڕەزایەتی جە ئێران و وەرکەوتوو کوردەسانینە پەی داواو مافو بژێوی ملۆڕاوە. ئینەیچ ڕەوشو نالەبارو کرێکارا نیشانە مڏۆنە، بەڵام حەقیقەتێ تەریچ بەر وسۆنە، ئاڏش درێژەداین بە ئەوەکۆشایه دیموکراتیک. پەنەوازا ئی شێوازە دروسەو ئەوەکۆشای بەردەوام بۆنە.
پارتو ژیوای ئازادی کوردەسانی (پەژاک)، ڕۆو جەهانی کرێکارا جە تەمامو کرێکارا و زەحمەتکێشا کوردەسانی و ئێرانی و جەهانی و ڕابەر و بنەیانەو گەشمەرڏا موبارەک مکەرۆ. هەرپاسە یاڏو گەشمەرڏا کۆمیتەو چاپەمەنی پەژاکی جە ١و ئایارو ٢٠٠٨ کە هامکاتا چنی ڕۆو و کرێکارا، بەرز ڕاگێرمێنە.
بێگومان گرڏما بە یۆگێرتەی و هامپەشتی تاومێنە ئەوەکۆشای ڕەوا و دیموکراتیکی و ئازادیوازانە یاونمێ بە لوتکەی. بانگەواز جە گرڏ و گەلوو کوردی بە تایبەت کرێکارا و زەحمەتکێشا و ژانا و جوانا و ڕۆشنویرا و چالاکوانا مکەرمێنە کە ڕۆو جەهانی کرێکارانە ئەوەکۆشایشا فراوانتەر بکەرا و چالاکییەکاشا سەرو بنەماو 'ئازادی پەی ڕابەر ئاپۆی و چارەسەرو پرسو کوردی' یاونانە لوتکە. بییەو گرڏ و کرێکارا و چین و توێژەکا گلێرگری جە مێڏانەکانە تاکە ڕێوەن پەی ئازادی و دیموکراسیی. تاوەکو ئازادی چینو کرێکار چنی ئازادی گرڏو گلێرگەی مسۆگەر کریۆنە".
