سالار مەحمووڎ: ئەقڵیەتوو سەڎساڵەو لۊزانی هەڵای بەرڎەواما

ئەنداموو کەنەکەی سالار مەحمووڎ بارەو ویەرڎەی سەد ساڵا سەروو لۊزانیرە واتش : "ئەقڵیەتوو سەد ساڵی ویەرڎەو تورکیای وەروەروو کورڎیوە هەڵای بەرڎەواما و ڕەنگا کورد ئا وەختە لاوازۍ بیێا، وەلۍ ئارۊ فرسەت و تواناو ئانەیە هەنە، کە کورد ئی سەدەیە کەرۊ بە سەدەو وێش".

بە سەرمەشقبییەی کۊمەڵەو زانستە سیاسیەکاو کورڎسانی و رێکوزیاو گەشەپەنەدای مەدەنیەت (سی دی ئۊ)ی، جە سلێمانینە  بارەو سەڎساڵەو لۊزانیوە لایو ئەندامێوە کەنەکەیۊ سالار مەحمووڎ سمینارێوەش پێشکەش کریا.

سمینارەکەنە گرێوە جە ڕۊشنویر و چالاکە سیاسییا ئامادۍ بێنۍ، کە ئەندامۍ دەسەو ڕاوەبەریی کۊنگرەو نەتەوەیی کورڎستان (کەنەکە)ی سالار مەحمووڎ بە ناموونیشانوو 'یاگۍ کورڎی وەرکەوتوو دلێڕاسەینە جە سەد ساڵەو پەیمانوو لۊزان'ینە سازش کەرد.

سالار مەحمود ئاماژەش پانەیە کەرد، کە کورد جە لۊزاننە تووشوو گەورەتەرین شکسی بییەن  و واتش، "کورڎسان جە وەرکەوتوو دلێڕاسەینە دماو لۊزانیوە پارچە کریا. ئەو پارچەپارچەکەرڎەیە پاسەش کەرد کە فاڕیای گەورە بۊنەو نەبییەی سەقامگیریوە جە مەنتێقەکەنە بۍ ئاراوە.

'ئەقڵیەتوو سەد ساڵی ویەرڎەی هەڵای هەن'

سالار مەحمود سەرنجەش کێشتە پەی سەروو ئەقڵیەتوو قاڕچنی و پاکتاوکەروو تورکیای جە سەرڎەموو لۊزانی و دماو ئانەیە و چی بارۊ واتش: "ئا ئەرەگیرۍ وەڵۍ سەد ساڵا ساعیبۍ هەمان ئەقڵیەتی بێنۍ، ئارۊ درێژە بە هەمان ئەقڵیەتی دژوو گەلوو کورڎی مدا. جە ڕاو لۊزانیوە وەرموو دەوڵەتبییەی کورد جە بار بەرا،. جە لۊزاننە بە حیچ نۊعێوە نامۍ کورڎی ناما. لۊزان کوردش پێسەو ئایینی دلۍ گەلوو تورکیاینە گوم کەرد. تورکیا سەروو بنەماێوە نەژادپەرسی ئەرەمەرزیا و بە حیچ نۊعۍ ڕاش پەی کورڎی نەکەرڎۊ. جیای ئانەیە تورکیا بییەی وێش سەروو ستراتیژوو دلینەبەرڎەی کورڎی ئەرەمەرزنا. دەوڵەتاو هامپەیمانییچ هامکاریی ئاسیاسەتەو تورکیایشا کەرد نەوە دوای نەوەی ئا ئەقڵیەتەشا درێژە پەنە دا.

'لۊزان مافی نەتەوەیی کورڎییش زەوت کەرد و ڕاش وەرڎەموو کۊکوشینە کەرڎۊ'

سالار مەحمود باسش جە دماو پەیمانوو لۊزانی و دۊخوو کورڎی کەرد و واتش: "جە ١٤٣ ماددا وپەیمانەکێنە عەرگیز باس جە کورڎی نەکریان، بەکوڵی و کورڎی لۊزان مافوو دەوڵەتبییەیش جە کورڎی زەوت کەرد، کوردش پێسە نەتەوەی سڕیەنۊ. دماو لۊزانی کە کورڎسان بەش کریا، دەس بە کۊکوشکەرڎەی و قاڕچنیەیۊ کورڎا کریا. پێسە کۊکوشیی دێرسیمی، دۊڵەو زیلانی و سەرکوتکەرڎەی سەرەورڎایەکاو کورڎا، ئینۍ گردشا دەرەنجامۍ لۊزانینۍ. تورکیا جە لۊزانۊ سەروو بنەماو ئانەیە چکۊ کورد بۊ، دەستکەوتوو کورڎی بۊ، ئاد دلێشنە بەرۊ، قبووڵش مەکەرا، دژش مرڎاوە، مامەڵە کەرا".

' چارەسەرش یۊبییەی ویۊگێرتەی نەتەوەیی گەلوو کورڎین'

ئەندامەکەو کەنەکەی باسشچانەیە کەرد، کە ئا وەختە کورد لاواز بۍ و واتش، "ئیسەتێنە کورد ئامادەن، بەقووەتا. سەروو ئاستوو عێراقی ساعیبوو قەوارەی فیدڕاڵین، جە وەرنیشت، پانیشت، وەرکەوتوو سوریایچنە سیستموو وێڕاوەبەری هەن. کورد سەروو ئاستوو مەنتیقەکەی لۊبیێوە خاسش هەن، متاوا بوارێوەنە بەشدارۍ با.

پەی ئێمەی کورڎی گرنگا دماو ویەرڎەی سەد ساڵا سەروو لۊزانیرە یۊبییەی نەتەوەیی گەلوو کورڎی کەرمۍ دەرمانوو ئا دەرڎۍ. مشۊم ئێمە کرێڵوو ئا قوفڵەیە یۊبییەی و یەکڕیزیی نەتەوەییمان کەرۊوە وێزمێوە. مشۊم ئێمە ئی سەرڎەمی کەرمۍ بە سەرڎەموو گەلوو کورڎی".

س.ز