فرێو جە دەگایەکێ سەر بە شارستانەکێ (پاوە، جوانڕۆ، ڕەوانسەر و سەلاس و باوەجانی) جە هەرێمو هەورامانی، جە خزمەگوزاری تۆڕەکێ ئەنتەرنێتی و تەلەفۆن و مۆبایلی بێبەشێنێ. دەسەڵاتدارێ  ئێرانی جە هەرێمەکەنە فرە جارێ بەڵێنێشان دێنێ کە بەزووتەرین کات، ئا خزمەتگوزارییە بیاونانە بە فرەتەرین دەگایەکانو هەورامانی. بەڵام ئا بەڵێنێ تا ئیسە کەردەیی نەکریێنێ.

جە ئی بارەوە هەرمانگەو گردیی یاونەری و هونەری زانیاری ئوستانو کرماشانی "مدیرکل ارتباطات و فناوری اطلاعات" ئاشکراش کەردەن: "جە کۆو سەرجەم دەگایەکێ سەر بە شارستانەکێ (پاوە، جوانڕۆ، ڕەوانسەر و سەلاس و باوەجانی) کە هەر چوارشان سەر بە هەرێمو هەورامانیەنێ، ۳۰۶ دەگایێشان دەستڕەسشیان بە تۆڕەو ئەنتەرنێتی هەن. بڕیارەن تا ساڵە کۆتایی ساڵەو (۱۴۰۰)ی وەرەتاوی، ۸۰ دەرسەدێ جە دەگایەکێ هەرێمەکەی کە ئەرنیشتەکێشان زیاتر جە 20 خانەوادانێ تٶڕەکێ تەلەفۆنی زەمینی و مۆبایلی و ئەنتەرنێتیشان پنە بیاونیۆنە.

بە پاو هەرمانگەکەی، جە ئیسەنە جە شارستانو پاوەیەنە ٣١ دەگایێ تۆڕەو ئەنتەرنێتیشان هەنە، ۴۳ دەگایێ جە تەلەفۆنی زەمینی، ۴۷ دەگاێێ جە تەلەفۆنی مۆبایلی بەهرەمەندێنێ.

هەرپاسە جە جوانڕۆ، ۸۶ دەگاێی جە مۆبایلی و ۶۰ دەگایێ تەرێ جە تۆڕەو ئەنتەرنێتی بەهەرمەندێنێ.

هەرچی شارستانو ڕەوانسەریەن، ۱۲۴ دەگایێش مۆبالیشان هەن و ١١٩ دەگایێچ ئەنتەرنێتشانپنە یاونیان.
جە سەلاس و باوەەجانی-یچ،  ١١٣ دەگایێ تەلەفۆنی زەمینی و ١١١ دەگایێ مۆبایل و ٩٦ دەگایێ تەرێ جە تۆڕەو ئەنتەرنێتی بەهرەمەندێنێ بیێنێ.

جەلایێ تەرەوە، بەکاربەرێ ئەنتەرنێتی و مۆبایلی، گلیەیێشان جە لاوازی تۆڕەکێ ئەنتەرنێتی و مۆبایلی هەنێ و وازیارێنێ پێسەو دلێ شارەکان، ئا گرفتە جە دەگایەکانو هەورامانیچنە چارەسەر بکریۆن.

هەورامانات یان هەورامان هەرێمێوی گەورە و فراوانەن، مەگنۆنە پارێزگاکێ سنە، کرماشان و هەڵەبجەی. هەورامان جە پارێزگاو کرماشانی کە چوار شارستانێ (پاوە، جوانڕۆ، ڕەوانسەر و سەلاس و باوەجانی) جە وێ مەگێرۆنە نزیکە بە ٣٥٠ هەزارێ ئەرەنیشتێش هەنێ و گەورەتەرین بەشو هەورامانیەن.