جمیەرو ژەنە ئازادا (تەژەئا) سەبارەت بە 1و ئایاری ڕۆو جیهانیی کرێکارا ئەرەیاوناێوەش وەڵا کەردۆ. دلێشنە ئاماژە پانەیە کریان، سەرەڕاو فشاری و هجوومەکا، داواو ئازادیی گەورەتەری مکەرا و پەی هەرمانێ، جەسە، شناسنامە و ئازادیی پاگێرتەیرەی وێشا١و ئایاریینە ئەوەخوای مکەرانێوە.

هەرپاسە تەژەئا واتش، ئاکەپە/مەهەپە حکومەتێوی فاشیست، ڕەگەزپەرس، نەتەوەپەرس و دژو چینی کرێکارین و واتش، کە ١و ئایارینە دژو ئینەیە مەیا مەیدانەکا و بەردەوام سەرنجەش پەی مافوەریی ژەنا کێشتە و واتش، ڕۆو ١و ئایارینە دژو ئی ناعەدالەتییا و پەی دماییئاردەی پی دۆخەیە مەیدانەکانە بیمێ. درێژەنە ئانەیچ وچیان، کە مۆدێرنیتەی سەرمایەداری ڕەنجو ژەنا وەرەچەم نمەگێرۆ، بێکاریی ژەنا ئینا فرەتەربییەینە، کە دژو مافوەریی ژەنا، ڕەگەزپەرەسی، جەنگی، مووچەی یەکسان و ژیواێوی خاستەری  مەیدانەکانە مبیمێ.  

تەژەئا واتەنیچش کە سیاسەتەکاو جەنگی ئاژەڵدارییش کوردستاننە ناست، یاگە کشتوکاڵییەکانە بەنداوێ وەشێ کریێ، کشتوکاڵ سنووردار کریاوە و ڕاو پەرەسانای هجوومی ڕەگەزپەرسییش کەردۆ، هەرپاسە واتش، پەی هەلومەرجی ئابووریی ئیکۆلۆژی و  ئاشتی و دماییئاردەی بە کۆیلایەتیی یەکو ئایاری مەیدانەکانە بیمێ.

میانەو ئەرەیاونایەکەو تەژەئاینە ئاماژە پانەیە کریان، بە پلێ یوەمە کێشەو کوردی، گردو کێشە کۆمەڵایەتییەکا تەنیا بە پارادایمی دیموکراتیک، ئیکۆلۆژی و ئازادیی ژەنا چارەسەرێ مکریا و مواچۆ: "ڕابەرو گەلو کوردی عەبدوڵا ئۆجالان ماچۆ 'پاگێرتەیرە جە سۆسیالیزمی پاگێرتەیرەین سەرو ئینسانبییەی' و پا باوەڕە کە سەدەو ٢١، سەدەو ژەنێن، کۆشیایما گەورەتەر مکەرمێوە. سەرو ئی بنەمێوە ئازادیی جەسەیی ڕابەرو گەلو کوردی عەبدوڵا ئۆجالانی ناوەندو ئی کۆشیایەنە و ١و ئایارینە پەی ئازادی و دژو گۆشەگیری مجیەیمێرە مەیدانەکا.

هەرپاسە تەژەئا واتەنیچش، کە تورکیا یۆ چا وەڵاتانە فرەترەین زیندانیێ سیاسیێش چەنەنێ و واتەنش، تا ئا وەختە سەرجەمو زیندانییە سیاسییا ئازادێ بانێ، بەردەوامێ بیمێ جە کۆشیای و داواش وەنەو گردو ژەنا کەردە، ١و ئایارینە پەی وەرفراوانکەردەی کۆشیای ئازادی، دژو هەژاری، نایەکسانی، جەنگی و وێرانکاری بزیارە بەیا مەیدانەکا.

ئەرەیاونایەکە بە دروشمو 'بژیوۆ ١و ئایاری ' و 'ژەنی، ژیوای، ئازادی'ی دماییش ئاما.