کوردۍ و دۆسەکێشا پێوەرە جە گلېرۊبیەو ستراسبۆرگینە بانگەوازشا پەی ئازادی ڕابەر ئاپۆی کەرڎ و واتشا مشۊم پەیوەندی ڕابەر ئاپۆی چنی گەلوو کوردی و تەڤگەرو ئازادی بۍ ئاراوە.
ڕاپیمای جە شارو ستراسبۆرگینە بە مەرامو شەرمەزاکەردەی پیلانگێڵنی ١٥و شوباتی و داواو ئازادی بەڎەنیی ڕابەر ئاپۆی ئەنجام دریا، بە گۆرانیۍ گلېرۊبیەکەی بەردەواما.
جە گلېرۊبیەکەینە پەیامو لایەن و کەسایەتییە جیاوازەکا ۋنیاوە:
پەڕلەمانتارەو پارتو سەوزو فەرەنسای ساندرا ڕیگۆلە: پاڵپەشتی ئی مڎرامانەو گەلوو کوردی مکەرمۍ. مشۊم ئۆجالان ئازاد بۆ. ئازادی ئۆجالانی چارەسەری پرسو کوردین. گرڎ گەل و کەسێوە مافو دیاری کەردەی ژیۋای ۋێش هەن.
هامسەرۆکۊو کەنەکەی زەینەب مورادە: مشۊم ئێساڵ دمایی بە پیلانگێڵنی مېیاننەتەوەیی بێنە. ئارۊنە گەلوو کوردی تاریخو ۋێش منویسۆوە. گەلوو کوردی ٢٦ ساڵێن ئینا مڎرامانوو ئازادی و دیموکراسینە. مشۊم ئەوەکۊشایما گۊرەتەر بکەرمۍ. پاڵپەشتی جە پەیام و نەخەشەڕاکا ڕابەر ئاپۆی مکەرمۍ. ئیتر کاتو ئانەینە ئی ئەوەکۊشایە بیاوۆ بە مەرامو سەرکۊتەی.
ئامای سەرو سەکۆو ڕاپیماییکەرا ڕاپیمای درێژو ئازادی
چالاکا پەیامو بەردەوامیدایشا بە ئەوەکۊشای واوەی کەرڎۆ و سڵامشا جە مڎرامانوو ڕابەر ئاپۆی کەرڎ و بانگەوازشا پەی ئەوەکۊشای ۋەرفراوانتەری کەرد.
ئەندامو تەڤگەرو سەرهۊردای فەرەنسای، ئیمانیول فێرنادز: دڵم وەشا کە بەشدارەنە چی ئەوەکۊشاینە. ڕاپیمای درێژ مڎرامانێوە بێهامتا بۍ. چەمپنەکۊتەکۍ ئیمراڵی گرنگێنۍ بەڵام هەڵای سېر کەرۍ نییەنۍ پەی پرۆسەکەی. مشۊم جە گرڎ لایەنەکاوە هەنگامە بنریۆ و گۆشەگیری سەرو ئېژا ئۆجالانی دمایش پنە بۍ، ئازادی گەلوو کوردی بێنە ئاراوە.
نوێنەرو کەنەکەو ئۊرووپای شێخ شەماڵ: گەلوو کوردی ئینا قۆناغێوە تاریخینە و پەنەوازش بە ئاردەی ئارای یەکڕیزی نەتەوەیی هەن. ئاردەی ئارای ئاشتی پەنەوازش بە ئازادی ڕابەر ئاپۆیا. مشۊم چا ڕوانگۆ ئەوەکۊشای ۋەرفراوانتەر بکریۆ.
دماو نامبڕێوە جە پەیامەکا، هونەرمەڼ جڤات مەروان بە پێشکەشکەردەی هونەرەکەیش جۆشش دا بە گلېرۊبیەکەی و چنیش درووشمەکۍ وچیێوە.
دماتەر نامەو وریشە مورادیۍ ژەنە زینانیکریۍ سیاسیەو کوردی جە گېرتەخانەو ئەۋینینە ۋنیاوە
وریشە مورادیە: پیلانگێڵنی شەرمەزار مکەرو
نامەکەو وریشە مورادیۍ پی جۊرەنە:
پەشتەو دیوارەکا زینانو ئەۋینیوە پەی گرڎو ئازادییوازا!
من ٢٦ـەمین ساڵڕۆو پیلانگێڵنی و ناپاکی مېیاندەوڵەتی دژو ڕابەر ئاپۆی شەرمەزار مکەرو. ناپاکیێوە کە بە ئامانجو دلېنەبەردەی بەڎەنی ڕابەر ئاپۆی و قڕکەردەی گرڎو گەلوو کوردی ئەنجامشا دا، بەڵام بێ ئەنجام مەنۆ.
ئانە دلېنەبەردەیۍ بەڎەنی بۍ پەی کەسێوە کە تەنیا تاوانە و سوچش گېڵای بۍ شۊنەو ژیۋایۍ ئازادیرە پەی ۋێش و گرڎو گلېرگەی، ئاڎ شۊنەو ئێستەیۆ مۆدێلێوە ژیۋایرە بۍ کە چنی ڕەنجی نامۆ نەبۆ، ئاڎ ئەنەیاوایۍ هامچەرخ و ژیۋای و ئازادیش پێشکەش بە جەهانی و جەهانیا کەرڎ، ئەنەیاوایۍ کە هینو ئارۊین و مکریۆ جابەجێ بکریۆ و پا جۊرە بی بە ڕابەرو گرڎو چېردەسا جەهانی، بی بە سەنتێزێوە جە ئەزموونەکا گرڎو گێڵاڵا حەقیقەتی بە درێژایی تاریخی هەتا ڕۊو ئارۊیما.
ڕابەرما پا جۊرە مڎرامانش کەرڎ و جوابو تەنیاییە بێوێنەیشە داوە جە دوورگێوەنە و جە ژورێوەنە و هەڵای بەردەوامی پا هەرمانە گۊرۍ مڎۆ. پیلانگێڵنا خیاڵ کەرێنۍ کە دیوارو ئیمرالی متاوۆ فکری ئازاد دیل کریۆ، بەڵام ڕابەر ئاپۆ پا جۊرە سەرجەنۆ شێوازو یاوای بە حەقیقەتیش پێناسە کەرڎ و واتش "ژیۋایۍ کە چېرو دەسەڵاتۍ ۋۍ فریودای و دروێنە بۆ، ژیۋایۍ جە دەس شیەین، ژیۋایێن کە خیانەتش ۋنەکریان!"
ئاڎ بە پابەندبیەی بە پرەنسیپەکا ئەخلاقی و ۋێشناسای پەی بنیاڎنیای کوردەسانی، ۋەرکۊتوو مېیامینی و جەهانێوە ئازادی پارادایمێوەش جە ئیمرالینە متەرە کە مۆدێلێوە تازە بۍ جە پرۆسەو ئەوەکۊشایشەنە. زینانش کەرڎ بە شۊنێوە پەی فێربیەی شێوازە بەهێزەکاو جابەجێکەردەی ئەرکە ئەخلاقی و سیاسییەکا ۋەرا ۋەر بە گلېرگەی. ئاڎ بە کردەوە زانستی، فەلسەفی و ئەخلاقی و ئیستاتیکییەکاش ۋەرا ۋەر بە ژەنا بی بە ڕابەر و هەمڕاو ڕاو ژیۋای و ئەوەکۊشایما. ڕاو ئەوەکۊشای پەی یاوای بە کەسایەتی و جەوهەری ۋێش و ۋێبیەیش فێرۍ کەردیمۍ. بە ئازایەتی و پاڵەوانیەتیێوە کەم وێنە ڕەخنەش جە پیا سالاری و حەقکەردەیۆ جە زیهنیەتو پیاسالاری جە ۋێشۆ دەسش پنەکەرڎ و پا جۊرە بنەماکاو ئایدۆلۆژیاو ئازادیی ژەناش متەرە. بە شۆڕشو ڕووانەی جە زینانەنە ژیۋایش وەشکەرڎ. زینانی تاکەکەسی ئیمرالی کە چاڵەو مەرگی بۍ کەردش بە ژوورو ژیۋایۆ.
من یووەنا جە ملیۆنان کەسا کە ڕووبەڕوو پرسیارەو "من کێنا"ی بیێناوە و جوابو ۋێم جە ویر و ڕامان و فەلسەفەو ئاپۆچینە دیۆ. ئێمە جە ڕاو ڕابەر ئاپۆینە بە زیهنییەتە تاریک و دەسەڵاتدار و دەوڵەتدارەکا واتما نا! من بە ئاگاییوە و بە زانای ئانەی کە قیمەتو ژیۋایۍ ئەخلاقی مەردەی یان زینانی بیەیا ۋەرا ۋەر بە زیهنییەتو نکۆڵیکەردەی دۊڵەتی و پەی ئەنەیاوای جە ماناو "ژەنی، ژیۋای، ئازاڎیی" ڕاو ئەوەکۊشایم هۊرچنی و ئیساتۍ سزاو قەنارەیم سەرەرە سەپیان.
زیهنییەتو دۊڵەتی پەی درێژکەردەیۆ تەمەنو ۋێش هیچ ڕێوە نمەوینۆ جگە جە سەرکوتکەردەی، ئەشکەنجە، زینانیکەردەی و جە قەنارەدایا. ئێمەیچ هیچ ڕێوەما نیەنە جگە جە مڎرامانی و بەردەوامیکەردەی ئەوەکۊشای. من سەرو بەرەو ژوورەکەیمۆ نویستەبێم "ئینە ژوورو ژیۋاین، نەک چاڵەو مەرگی!" پاسەوانەکۍ کاتێ ئانەشا دی، دەمودەس سڕیشاوە و لاشا بەرد. پاسەوانەکۍ نەزانێنۍ کە هەمڕاکێم ٤٠ ساڵۍ چێوەڵی وەنەو "مڎرامان ژیۋاین"ەیشا سەرو دیوارە سەردەکا زینانو ئامەدیوە نوویستەبۍ، کە کەس نمەتاوۆ سەڕۊشۆ و لاش بەرۆ. پاسەوانەکە نەزانۍ کە ڕابەرەکەم ٢٦ ساڵێن چاڵە تاریکەکۍ ئیمرالیش کەردێنە بە ژوورو ژیۋای. پاسەوانەکە نەزانۍ کە زەینەب جەلالیانە ١٧ ساڵێن بە هەمان فەلسەفۆ مڎرامان مکەرۆ و بە مڎرامانۆ مژیۋۆ! ئاڎ نەزانۍ کە من و هەمڕا زینانییەکێم خۊنکارۍ ئا مامۆسایانمۍ و دیوارۍ ئەۋینی نمەتاوا بانۍ بە کۊسپ جە گێڵایما شۊنەو ئازادیرە.
ئێمەی زینانیا کە ڕووبەڕوو قەنارەی بیێنمێوە تاریکی ناپاکی ۋەرا ۋەر بە ڕابەر ئاپۆی شەرمەزار مکەرمۍ. پېسە زەینەب جەلالیانۍ جە نامێوەنە واتش "کاتێ کە گۆشەگیری سەرو ڕابەرەکەیما ماڕمۍ، ئێمە متاومۍ گرڎو زینانەکا ماڕمۍ" پۊکەی جە پەشتەو دیوارەکا زینانو ئەۋینیوە گرڎ کەسۍ ئازادیوازی خوڵقەمکەرمۍ پەی پەشتیوانیکەردەی جە ئازادیی بەڎەنی ڕابەر ئاپۆی. ئازادی ئاڎیی بۆ بە سەرەتاو سەردەمی و ژیۋایۍ تازەی پەی ئێمە. بە هیواو ئانەی کە بە ئازادیی ڕابەر ئاپۆی و دەسپنەکەردەی پرۆسێوە تازەی پەی چارەسەری کێشەکا ۋەرکۊتوو مېیامینی، ئێمە شۆڕشو ژەنی، ژیۋای، ئازادی بکەرمۍ بە جەهانی و هەتا ئا ڕووە ئەوەکۊشای ۋێما درێژە پنەمڎەیمۍ.
مرۆ گرڎو تاوانەکا و پیلانگێڵنا
مڎرامان ژیۋاین!
ژەنی، ژیۋای، ئازادیی
بژیۋۆ ڕابەر ئاپۆ
شووباتو ٢٠٢٤
وریشە مورادیە
بەنامۍ یۊبیەی سووریانییەکا ئۊروپای سلێمان ڕحاوی: بە تنی پیلانگێڵنی مېیاننەتەوەیی شەرمەزار مکەرمۍ. ئامانجو پیلانگێڵنی پەی لاوازکەردەی پەیوەندی بەینو ڕابەر ئاپۆی و گەلا بۍ. بە مڎرامانوو ئیمراڵی مەرامەکۍ پیلانگێڵنی پوچۍ کریێوە. پاڵپەشتی جە کۊششی ئاشتییانەو رابەر ئاپۆی مکەرمۍ. سڵام جە مڎرامانی جەهانی پەی ئازادی بەڎەنی رابەر ئاپۆی مکەرو.
پەڕلەمانتار سین فەین پاوڵ گاڤان: جە ئیرلەنداوە بە تایبەتی سڵامو کۆماریوازا ئیرلەندایتا ئاڕاسە مکەرو. ئۆجالان ماوەو ٢٦ ساڵان جە دوورگەو ئیمراڵینە دیلکریان. جە ئیساتێنە مافو دیدار نیارەیش چنی بنەیانەی و پارێزنەرکاش چنە گیریانۆ، بەڕاسی عەبدوڵا ئۆجالان نیلسۆن ماندێلاو گەلوو کوردیا.
جە ئیساتێنە پرۆسێوە چارەسەری جە تورکیانە ئینا ئارانە. بەڵام پەی ئانەی ئەرەنیشتەی حەقەتینە بلۆڕاوە مشۊم عەبدوڵا ئۆجالان ئازاد بۆ. ئەر ئینە کریا ئینجا ئۆجالان متاوۆ بەشێوێوە شکۆدارانە و دادپەروەرانە بەشدارو ئی گفتوگۊیا بۆ.
بالوکێن: هەر چارەسەریێوە ئێژا ئۆجالانش چنە بۆ بە ئیسفاڎەو گەلوو کوردی مەڕیۆوە
ئەندامی وەڵینو شاندو ئیمراڵی ئیدریس بالوکێن: جە هەر گفتوگۆ و چارەسەریێوەنە ئێژا عەبدوڵا ئۆجالانش چنەبۆ، حەجگیز بە زەرەرو گەلوو کوردی نمەمەڕیۆوە. گرڎ کاتێ پەنەوازما بە گفتگۆ و دیالۆگی هەن. ئێژا ئۆجالان گرڎ جارێ واچۍ، 'هێزو گفتوگۆی هێزو چارەسەرییا'. پۊکەی مشۆم ئێمەیچ گرڎ کاتێ جە پرۆسەو گفتوگۆکەردەینە بیمۍ و حیچ کەسێ جە ئەنجامدای گفتوگۆی دوورنەگنۆوە.
