سوپاو تورکی ٣٠٠ تانکێ و زرەپۆشێش ئاردێنێ هەرێموو کوردستانی
ڕێکوزیاو CPTـی ئەمریکى ڕاپۆرتێوەنە کدا وەڵاش کەردەنۆ، ماوەو ١٠ڕۆی ویەردەینە سوپاو تورکی ٣٠٠ تانکێ و زرەپۆشێش ئاردێنێ دلێ هەرێموو کوردستانیوە.
ڕێکوزیاو CPTـی ئەمریکى ڕاپۆرتێوەنە ئەرەیاونانش، ماوەو ١٠ ڕۆی وەڵینینە سوپاو تورکی، چا ڕا سەروازییاوە، کە مانگەو کانوونوو دووەموو ئێساڵینە وەشێش کەردێنێ دلێ پانیشتوو کوردستانینە، ٣٠٠ تانکێ و زرەپۆشێش داخڵوو دەگایەکاو، ئورە، سەرەڕۆ، ئەرادنا، کێستە، چەلکێ و بابیرێ کەردێنێ. جگە چانەیچە بەینوو دەگایەکاو بابیرێ و کانی بەلاڤێو سنووروو بادینانینە خاڵێوی وشکنایش نیێنەرە و ڕا بە ویەردەی هاموەڵاتا نمەدۆ.
کامەران عوسمان، ئەنداموو تیموو کوردستانوو عێراقوو ڕێکوزیاو CPTـی ئەمریکى، پلانێوى سوپاو تورکیایش پەی ئەرەگیرکاریى زیاتەروو خاکوو پانیشتوو کوردستانی ئاشکرا مکەرۆ.
کامەران عوسمان ڕاپۆرتەکێنە واتش: "ماوەو یەرێ ڕوانە نزیکەو هەزار سەروازاو تورکیای بەینوو مۆڵگە سەروازییەکانە کەشوو باروخی و مەتیناینە پەشتەو ناحیەو بامەرنێنە هاموشۆ مکەرا و ٢٥حوزەیرانیوە خاڵێوی وشکنایسا بەینوو دەگایەکاو بابیرێ و کانی بەلاڤێنە نیێنە، شناسنامەو هاموەڵاتا کۆنترۆڵ مکەرا".
ڕاپۆرتەکێچەنە ئامان، "ئیساتێنە تورکیا گەرەکشەن ناحیەو شیلادزێوە پەی قەزاو باتیفای خەتێوە ئەمنییە وەشە بکەرۆ، ناحیەو دێرەلووکی و بامەڕنێ و بێگۆڤایرە بویەرۆ، پیبەیچ گردوو دەگا و شارەدەگا و زنار و زەمین و دۆڵ و خاک و ئاوەو پەشتەو ئی خەتێ مگنۆ چێروو کۆنتڕۆڵوو سوپاو تورکی"
