بەمەڵامەتو ناڕەزایی بەربڕیەی ۋەرا ۋەر بە جە قەنارەدای زینانیێوە سیاسی کوردی، دادگێوە تارانی بە تۆمەتو تێکدای دیسپلینو زینانی و رووبەڕووبیەیۆ پاسەوانا زیڼانو ئێڤینی، سزاش سەرو پەنج ژەنە زینانیا سیاسیرە سەپنا.
چا بارۆ هەڵمەتەو ئازادی پەی پەخشان عەزیزیۍ وەڵاش کەرڎۆ، جە لایەنو لقو دووۍ دادگاو سزادای گلېرگەو دادوەریی قودسو تارانیوە بە سەرۆکایەتیی دادوەر ئەبولفەزل عامری پەنج ژەنە زینانیکریۍ سیاسیۍ جە زینانو ئێڤینینە جە دۆسیێوە هامبەشەنە سزای تازێشا سەرەرە سەپیا.
ڕۆشنیچش کەرڎەنۆ، پەخشان عەزیزیە، وریشە مورادیە، مەحبووبە ڕەزاییە و نێرگس محەمەدیە بە تۆمەتو " رووبەڕووبیەیۆیشا چنی پاسەوانا زینانی و گۆشنەڎای بە قەرار و رانماییەکاشا" هەر یۆشا بە ٦ مانگۍ سزاو زینانیی کەردەی تەری سزادریێنۍ و پەریوەش موسلیمیە بە تۆمەتو “شێونای نەزم و دیسپلینو زینانی” بە ٣ مانگۍ و یەک ڕۆ زینانیی کەردەی سزا دریێنە.
کەردەیۆ ئی دۆسێیەیە گێڵۆوە پەی مانگەو ئابو ئێساڵی، کە ئا ژەنە زینانیە سیاسیۍ جە ۋەرا ۋەرو جابەجێ کەردەی سزاو جە قەنارەدای ڕەزا ڕەسایی کوردو یارسانینە، دلۍ گێرتەخانەو ئێڤینینە ناڕەزایشا بەربڕی.
