سەرۆکو فراکسیۆنو پارتی یەکسانی و دیموکراسی گەلا (دەم پارتی)ی پەڕلەمان سەزای تەمەلی جە پەڕلەمانەنە کۆنگرێوە ڕۆنامەوانیش ئەنجامدا و ڕۆژەڤەکێش هورسەنگنێ.

تەمەلی بە مەڵامەتو ٢١و شوباتی ڕۆو جەهانی زوانو ئەڏێ سەرنجش وست سەرو ئا زوانا چێرو فشار و سەڕیەیۆ و باسش چانەیە کەرد جە تورکیانە چنین زوانێ ئینێ دۆخو دلێنە بەردەینە.

گۆرەتەرین فشار سەرو زوانو کوردییا

تەمەلی واتش: "جە تورکیانە فرەترین و سەخترین فشار ئینا سەرو زوانی کوردییۆ. جگە جە زوانی کوردی، نزیکایەتی دۆڵەتی وەراوەرو زوانەکا تەری حەر چنە کەمیچ بۆنە ئەرێنییا."

جە بەردەوامیینە تەمەلی دەسنیشانش کەرد، دەرفەتو بەکارئاردەو زوانو کوردی ڕۆ بە ڕۆ کەمتەر بۆوە، ڕاگیری جە شانۆی کریۆنە، ڕاگیری جە خزمەتو شارەوانییەکا بە زوانو کوردی کریۆنە، مافو دادگای کەردەی بە زوانو کوردی ئاستەنگ کریۆنە، بە تەمامەتی مافو پەروەردەکەردەی بە زوانو ئەڏێ قەدەغەکریان.

تەمەلی ئاماژەش پانەیەدا، بە ئیسەیچۆ جە پەرلەمانەنە تەنانەت سڵام کەردەی بە زوانو کوردی قەدەغەن و واتش: "چی وڵاتەنە ٢٥ ملیۆن هاموڵاتیێ کوردێما هەنێ. مشۆم تاومێنە بە زوانو ئەڏایا وێما سڵام کەرمێنە. بە گرڏ شێوێ ئی قەدەغەکارییا ڕەتمکەرمێوە و قبوڵش مکەرمێنە."

پەرلەمان جوانپبو چەمەڕای مەرۆوە

تەمەلی واتش: "زوانو ئەڏایا مافا، مەبۆنە کریۆنە بابەتو گفتوگۆکەردەی و قەدەغەکەردەی." سەرنجش وست سەرو پەڕلەمانی و واتش: "چارەسەری پەی مافو هاموڵاتییا مەئێزاوە."