تۆڕەو هامپەشتو ژەنا جە وەرنیشتوو ئاسیای و سەرنیشتوو ئەفریقای پەی پەخشان عەزیزەی ڕۆنامەوانە و وەرگری کارەو مافەکا ژەنا کە جەلایەن دادگاو باڵاو ئێرانیۆ سزاو جەقەنارەدایش پەسەن کریان، بانگەوازێوە  بەپەلەشا پەی ئەنجامداو چالاکی ئەرەیاونا.

ئەرەیاوناکەی بی جۆرە: "ئێمە پێسەو ئەنداما تۆڕو هامپەشتی ژەنا، داواو چالاکی و هەنگامێ بەپەلەی جە گلێرگەو مییاننەتەوەیی، حکومەتەکاو، رێکوزیاکا مافو مرۆڤی و وەرگری کارا مافەکا مرۆڤی مکەرمێ پەی ئانەی سزاو جەقەنارەدای پەخشان عەزیزیێ کە چالاکوانێوە بوێرەو هامکارەو مرۆیی و هۆرسوڕیای مافەکا مرۆڤینە، هۆرشاناوە. دادگاو باڵاو ئێرانی سزاو جەقەنارەدای پەخشان عەزیزیێش پەسەند کەردەن و دوور نییا کە کتوپڕ سزێکێش جابەجێ بکەرۆ.

جە درێژەو ئەرەیاوناکەینە ئامان، "پەخشان عەزیزیە جە هەمان کاتەنە بە درێژایی ژیوایش وەرگری کارەو مافەکا ژەنا بییەنە، جە دژو نایەکسانی ئەوەکۆشیێنە و پەی دادپەروەری جەنگیێنە. دڵسۆزی و پابەن بییەی بەهێزی بە مافەکا مرۆڤی پەی فرەو کەسی نییەنە سەرچەمەو هیوای. جەقەنارەداو ئاڏێ نەک هەر بۆ بە نادادیێ زەق، جە هەمان کاتەنە دەنگو وەڵکەوتەی و یەکسانیش جە ئێرانەنە کپ مکەرۆ".

تۆڕەو هامپەشتەو ژەنا ئانەیشش وست ڕووە، "پەی بێدەنگکەردەی چالاکوانا پێسەو پەخشان عەزیزیێ سزاو جەقەنارەدای سەپنریۆنە، ئینەیچ پاشێلکاریی ڕۆشنو مافە سەرەتاییەکا مرۆڤین و پەڵێوە شەرمەزارییا پەی مرۆڤایەتی" و بی جۆرە دمای بە ئەرەیاوناکەی ئاما: "پەی ڕاگیری چا نادادیا مشۆم ئێمە دەمودەس گنمێ وێما. داوا جە گرڏو داکۆکیکارا دادپەروەری و مافەکا مرۆڤی و، گرڏو رێکوزیێ و ئەرەمەرزیاکا مکەرمێ پەی شەرمەزارکەردەو ئا نادادیە شان بە شانو ئێمە ئەوەکۆشانە. هامپەشتی وێما پەی پەخشان عەزیزیێ، بنەیانە و گلێرگەکەیش بەربڕمێ و داواو هۆرشانایۆ سزاو جەقەنارەدای مکەرمه. کات فرە گرنگا. مشۆم ئێمە جارێوە تەر پێوەرە بەهاو ژیوای نیشانە دەیمێوە و بە ئاشکرا ئانەیە وسمێ ڕووە کە جەهان وەراوەر بە کێرتەی ئامانجی چالاکوانا ژەنێ بێدەنگ مەبۆنە. پەی ڕاگری چا تراژیدیایە و پەی ئانەی دەنگو ژیواو پەخشان عەزیزیێ پەی نەوەی تازە بۆ بە سەرچەمەو هیوای، بەیدێ یۆیگێرمێ".