تولای حاتیموغلاریە، هامسەرۆکەو دەم پارتی جە چوارچێوەو گلێرۆبیەکا "نان و دادپەروەری"نە سەرش ۋنەو ژوورو بازرگانی کابزیمالاری ئەدەنەی دا. جە سەرۋنەداکەیشەنە، چنی سەندیکاکا سەوزەی و میوەی کوەبیۆ و گۆش ۋنەو گرفتەکاشا دارا. سەندیکاکاو کرێکارا گلەیێشا جە بەرزبیەیۆ قیمەتو کەلوپەلەکاشا کەرڎ و واتشا ۋەرپەرسۍ وڵاتی ۋەرپەرسێنۍ چی ئاژەیە.

حاتیموغلاریە ئاماژەش پانەیە کەرڎ، گەل پەنەوازش بە نانی و دادپەروەرییا و واتش: "جە ماوەو ٢٢ساڵا حوکمڕانی ئاکەپەینە وڵات ڕووبەڕوو هەژاری و ئاورایی بیەنۆ. ئی دەسەڵاتە نمەتاوۆ گرفتەکا چارەسەر بکەرۆ. گەل هەڵای هەمڕان چنیش. ئاکەپە خراپتەرین کارەساتش سەرو ئی وڵاتەیرە ئارڎەن."

حاتیموغلاریە ئاماژەش پانەیچ دا کە تورکیا وڵاتێوە کشتوکاڵییا بەڵام بەمەڵامەتوو سیاسەتەکا حکومەتیوە گرڎ چێوۍ جبەرو سیاسەتەکاشۆ مەنەنۆ. ئانەیچ ئاورایی و هەژارییش چنە کۊتەنۆ. بەمەڵامەتوو سیاسەتی غەڵەتو دەسەڵاتیوە، ئیتر هیتیارۍ نمەتاوا بەرهەم بارانۍ. مرۆڤەکۍ وڵاتی جیامازا. پۊکەی پەنەوازا بیمۍ بە هیواو جوانا و پەی ئینەیچ ئەرەکۊشای شەرتێوەنە. ئەگەر نان نەبۆ، دادپەروەریچ نییا، ئەگەر دادپەروەری نەبۆ، بەڕاسی نانیچ نییا."

دماتەر حاتیموغلاریە و شاندی یاوەرش سەرشا ۋنەو شۊنەکا و چین و توێژەکا تەری دا.