کۆردیناسیۆنو تەڤگەرو ژەنا کوردی جە ئەوروپا (تەژەکە-ئە) بە ئەرەیاۋنێوە ئاشکراش کەرڎ پەی مردنای ئەشکەنجەی جە ئیمراڵینە جە ئارۆ بەدماوە (٢١و ئۆکتۆبەر)ی دەس بە هەڵمەتەو نامە کیانای مکەرا پەی کۆمیتەو وەزیرا ئەنجومەنو ئەوروپای و جە ڕاو ئی هەڵمەتێوە دەنگ و داواکاشا مېیاۋنا بە گەلا.

جە سەرەتاو ئەرەیاۋناکەینە باسو گۆشەگیری سەختو ئیمراڵی مکەرۆ و چا بارۆ ئامان: "گۆشەگیری سەرو ڕابەر ئاپۆی فاڕیان پەی سیستەمو قڕکەردەی جە دژو گرڎو گەلو کوردی." ئاماژە پانەیچ کریان، هەڵمەتەو 'ئازادی پەی عەبدوڵا ئۆجالانی، چارەسەری سیاسی پەی پرسو کورد'ی ساڵێوە پەڕ جە دەسکەوتو ئەرەکۆشایش ۋییەرنا و جە گرڎو جەهانینە ویرۆکەکۍ ڕابەرو گەلوو کوردی عەبدوڵا ئۆجالانیش وەڵا کەرڎۍ.

بانگەواز پەی گەلا ئۆروپای

جە بەردەوامینە ئاماژە پانەی مکەرۆ جە چوارچێوەو هەڵمەتەو ئازادینە و جە ساڵەو دووەمو ئەرەکۆشایشەنە دەس بە هەڵمەتەو نامە کیانای مکەرا و باسش چانەی کەرڎەن: "پېسە تەڤگەرو ژەنا کوردی جە ئۆرروپانە سەرو بنەماو هەڵمەتەو 'تیشکەو ۋەری' جە  ٢١و ئۆکتۆبەرینە دەس بە کیانای ناما مکەرمۍ پەی ئەنجومەنو ئۆروپای. داوا جە گەلەکەیما مکەرمۍ جە ئۆروپانە، بە داوا-نوسیاکاشاوە پەشتگیری بڎا بە ئاژەو ڕابەرایەتی. پی هەڵمەتێوە دەنگما بیاونمۍ بە گەلا ئەڵمانی، فەرەنسای، ئینگلیزی و گەلا تەری و بازنێوە تازە جە دەورو ڕابەر ئاپۆیرە زیاڎ مکەرمۍ."

جە دمادماینە ئاماژە پانەی مکەرۆ کە جە ڕاو ئی هەڵمەتێوە سەفەربەرۍ بیمۍ پەی ڕاپیمایۍ گۆرەی کە جە ١٦و کەڵەهەرزینە پەی ئازادی ڕابەرو گەلوو کوردی عەبدوڵا ئۆجالانی جە کۆڵنو ئەڵمانیاینە ئەنجام مڎریۆ.