سەمسورنە پەی ئەندامو شاندو ئیمراڵی دەم پارتی و یاگەگیرو سەرۆکو پەرلەمانی، سری سورەیا ئۆندەری ماوەو ٣ ڕووا تەعزیە لواڕاوە. تەعزیەکۍ جە یەرەم ڕۊنە دمایش پنە ئاما. تەعزیەکۍ جە لایەنو بنەیانەکەیش و دۆساو ئۆندەریۆ نریێبێرە، شیاوو باسیا جە ماوەو ٣ڕوانە بە هەزاران کەسۍ جە گرڎ چین و توێژەکا گلېرگەیۆ سەرشا ۋنەو تەعزیەکۍ دا. جە دماین ڕۊنە عەلی بۆزان، یاگەگیرو مێرسینو دەم پارتی، عەبدولڕەحمان توتدەرە، سەرۆک شارەوانی جەهەپەی، ڕاوەبەرا دەم پارتی شاری و پارتو هەرێمە دیموکراتیکەکا (دەبەپە)ی و پێکئامایەکا پلاتفۆرمو کرێکارا و دیموکراسی سەمسوری و نوێنەراو پارتە سیاسییەکا و ڕێکوزیا دیموکراتیکەکا سەرشا ۋنەو تەعزیەکۍ دا.

هەرپاسە پیرۍ عەلەوییەکایچ سەرسەعبو ئارۊی سەرشا ۋنەو تەعزیەکۍ دا و مەولودشا ۋەناوە. دماو ۋەنایۆ مەولودی مەراسیمەکە بە دوعاکەردەی دمایش پنە ئاما.