فەرماندەو یەپەژەی، ڤیان ئادارە پەیوەس بە پێشئامایەکا جە هەرێمو سەرنیشتوو وەرکەوتوو سووریا، سیستەم و گێرتەی وەرو دەسەڵاتو دیمەشقی و خەباتو یەکنیەکا پارێزناو ژەنێ (یەپەژە)ی پەیوەس بە پارێزناو ژەنا گرڏو نەتەوەکا سووریای پەی ئاژانسیما قسێش کەردێ.

ڤیان ئادارە دەسنیشانس کەرد پێسەو یەپەژەی، زهنیەتو ئی سیستەمە تازەیە کە ئیسە بریۆ ڕاوە، بە جیاوازی مەوینمێنە جە سیستەمی وەڵین و ئینەش وات: "دماو ٢٧و تشرینو دووەمی ٢٠٢٤یۆ سووریا وەرو فاڕییایێ گۆرەی کەوتەن و ئی فاڕییایێ کاریگەریشا سەرو دۆخو دلینەو سووریای و هەتا دۆڵەتا هامسێش کەردەن."

'ئەرەمەزنارەو یەپەژەی فاڕییای گۆرەش سەرو گلێرگەی ئاردەن ئاراوە'

ڤیان ئادارە ئاماژەش پانەیەدا بە سەرهورداو شۆڕشو ١٩و تەمووزی و ئەرەمەزنارەو یەپەژەی فاڕییای جددی و کاریگەر دلێ گلێرگەینە بەرکەوت و واتش: "دەسەڵاتو شامی دەسورێوەش هەن کە حساب پەی ژەنێ مەکەرۆ و وە نوێنەرایەتی گەلوو سووریای مەکەرۆ. ئی زهنیەتەی ملۆڕاوە، پاسە مکەرۆ یەپەژە سور بۆنە جە ئەوەکۆشای پەی ژەنا و پاشەکشێ جە ئامانجەکاش مەکەرۆ."

'وێ پاریزنای پەی ژیوای ژەنا پەنەوازیا'

فەرماندە ڤیان ئادارە دەسنیشانش کەرد یەپەژە گرڏو ژەنا نەتەوەکا سووریای جە وێ گێرۆنە و ئینەش وات: "پێسەو یەپەژەی حەجگیز دان بە سیستەمو ئیسەو دەسەڵاتدارینە مەنییەمێ. ئینەیچ بە ماناو ئانەی مێ بەشێوێ بەهێز تەر ئەوەکۆشایما بەردەوام بۆنە. ئا یاگێ یەکسانیش چنە بۆنە، بەدڵنیاییۆ وێ پارێزنای پەنەوازییا. ئەوەکۆشایما ئەوەکۆشای مافو رەواین، جە کاتێنە هرووژم سەرو ژەنا هەن، ئانە پەنەوازە ژەنێ جە وێپارێزنای وێشانە بانە."

'یەپەژە لایەنگرو ڕێککەوتنیا'

ڤیان ئادارە سەرنجش وست سەرو ڕێککەوتنەکەو بەینو قەسەدەی و هەتەشەی ئاماژەش پانەیەدا پێسەو یەپەژەی گرڏ کاتێ ئینایمێ چنی ڕێککەوتنی و ڕەخسناو ڕێککەوتنینە. ڤیانە ئاماژەش پانەیەدا جە سەرەتاو ئەوەکۆشایماوە جە دژو دابەش بییەو خاکو سووریاینمێ و جەختش چانەیە کەردۆ پەنەوازا گرڏو پێكئامایەکا سووریای بە یەک ڕووحیەتۆ جە پێوەرە ژیواینە بیمێ.

'ئەوەکۆشای یەپەژەی ئەوەکۆشایێ سەربەخۆن'

ڤیان ئادارە جە بەردەوامی قسەکاشەنە ئاماژەش بە ئەوەکۆشای یەپەژەی کەرد و ئینەش وات: "ئەوەکۆشای یەپەژەی ئەوەکۆشایێ خۆسەری و سەربەخۆن. پێسەو یەپەژەی بەشێوەما ئینا دلێ  قەسەدەینە. بەڵام ئەوەکۆشایما چێرو چەترەو قەسەدەینە نییا. ڕێکوزتەیما و ئەوەکۆشایما خۆسەرا. بەڵام یەپەژە و قەسەدە پێوەرە جە ئاستێوە باڵانە ئەورکۆشانە و شانە بەشانو یۆتەری جەنگ مکەرا،.پێسەو یەپەژەی تەنیا فکرس ڕابەر ئاپۆی بنەڕەتییا پەیما."

ڤیان ئادارە سەرنجش وست سەرو بانگەوازییە تاریخییەکەو ڕابەر ئاپۆی، ئاماژەش پانەیەدا بە ئیسەیشۆ دۆڵەتو تورکی هەنگامەی ڕۆشنەش نەنیێنە پەی ڕەخسناو بانگەوازییەکەی. ئاماژەش پانەیشدا چارەسەرو گرڏ و پەرسەکا تەنیا دیالۆگا و پەنەوازا دۆڵەتو تورکی هەنگامە بنیۆ.

پەیوەس بە دۆخو ئەرەگیری دۆڵەتو تورکی جە سووریانە، ڤیان ئادارە ئینەش وات: "سووریا پەی سوورییەکان، دۆڵەتو تورکی هیچ هەرمانێش پینەیە نییەنە. بە پاساوەو ئانەی هامسان و گەرەکشا کێشەکا سووریای چارەسەر بکەرۆ، ئامانجشا سووریای ئەرەگیر کەرۆنە. کێشە سەرەکییەکە دەسوەرداو تورکیاین جە سووریای."

جە دماین و قسەکاشەنە ڤیان ئادارە فەرماندەو یەپەژەی بانگەوازش جە گرڏو ژەنا کەرد هێزو پارێزناو وێشا پێوەرە ئەرەمەزنارە و جە دژو سیستەمو ئیسەو دیمەشقی مدراوە کە هیچ یاگێوەش چنە نییەنە پەی ژەنی.