جە کەسایەتی گرڎ ئینسانێنە هونەرێوە هەن. پۊکەی ئا حەزوو ئارەزووەی ئینا دڵوو کەسەکانە، بەردەوامی ئا هەرمانۍ کە ئینسانەکۍ ئەنجامش مڎا، وردە وردە پاسە بە ئینسانی کەرا ئا حەزوو  ئارەزووەو دلۍ دڵیشا جە هەرمانکەردەینە بەربڕا و بەرهەمی هونەرییشا بۆ.

متاومۍ واچمۍ مرۆڤایەتی جە ڕاو وێنەکێشتەیۆ هەم ژیۋای ۋێش، دەوروبەروو ۋێش و ڕودایەکا و چاندوو ۋێش نیشانە دا و چنیچش هەست و ڕامانەکاو ۋێش ئامێتە کەرۆ و نیشانەش مڎۆ. سەروو ئی بنەمایۍ هونەرمەنڎە نەقاشەکۍ ئارۊیچما، تاوانشا جە ڕاو نەقاشیۆ هەست و پەیاموو ۋێشا پۍ گلێرگەی بەربڕا و پەیاموو ۋێشا چی ڕێوە بیاونا بە گلێرگەی.

یووە چا نەقاشا شیفا یوسفەنە، کە جە تەمەنوو ١١ ساڵیوە خەریکەو نەقاشینە، ڕۆ دماو ڕۆی خەیاڵەکۍ ۋێش فراونتەرۍ کەردێنۍ و جە ڕاو نەقاشیۆ بە ئامانجوو ئیسفاڎە بەخشای بە گلێرگەی خەریکەو هەرمانەو نەقاشینە.

جە ساڵەو ٢٠١٧ دەسش بە وێنەکێشای کەردەن

شیفا دنیاو هونەری ۋێش بە فڵچە و قەڵەمەکەیش خولقنا بە هەستێوە قوڵۆ واتش: "جە ٢٠١٧ دەسم کەرد بە وێنەکێشتەی، جە زارۊڵەیمۆ حەزم پۍ وێنەی و ڕەنگەکا بۍ. جە سەرەتانە وێنەکام بە قەڵەم ڕەساس کێشێنا. دماتەر وردە وردە هەرمانەکێم بە شێوەو تابلۆی زەیتی کێشتۍ".

شیفا بەردەوامە بۍ جە قسەکاش و واتش: "ئینسان چنی گەورەبیەیش ئەرکەکێچش گەورەتەرۍ با. من خۊنکارەنا و جە وەختوو ئیسراحەتەکامەنە خجڵەو هەرمانەو نەقاشی بوو. سەرەتا وێنەکام سەروو کاغەزیۆ کێشێنا، بەڵام ئیسە جە شێوەو تابلۆینە وێنەکام نەقاشی کەروو. جە هەمان وەختەنە بەشداریم جە چنڎین نمایشگۍ نەقاشینە کەردەن و وێنەکێم سەرکۊتەیشا بەدەسئاردەن. جە ئیسەیچەنە ۋێم ئاماڎۍ کەروو پۍ بەشداریکەردەیم جە نمایشگێوە نەقاشی ژەنانە، کە جە مانگەو ئازارینە کریۆ".

'ئینسان مشۊم ۋێش وەڵۍ وزۆ'

شیفا بەردەوامیش بە قسەکاش داو واتش: "وەختۍ یاوانینە چانەی حەز بە هونەری کەروو، ئەڎاو تەتەم پاڵپەشتیۍ فرەشا ۋنە کەردا، ئینە بی بە مۆراڵێوە بەقوەت پێم. داوام جە گەنجا و بە تایبەت ژەنا ئانەنە، هەستوو ۋێشا و حەقیقەتوو گلێرگەی جە ڕاو هونەری و بەهرەکاشاوە بەربڕا و ۋێشا وەڵۍ وزا".