"فەرەح کەریمی"ە سەرۊکەو شانڎو ڕێکوزیای هاریکاری و ئاسایشو ئۊروپا (OSCE)ی جە پەرلەمان و ئۊروپای پۍ چەمڎاریکەرڎەی هۊرچنیەکا سەرۊکایەتی تورکیای نیگەرانیی ۋېش چانەی بەربڕی، کە هەڵمەتەکۍ بانگەشەو هۊرچنیەی جە گەری دوۋەمو هۊرچنیەکانە بە یەکسانی ئەنجام نەڎریېنۍ.

کەریمی-ە ئەرەیاۋناش، ئەردۆغان بە شێۋېوە ناداڎپەروەرانە ئیسفاڎەش جە توانا و دەرفەتەکا دەسەڵاتی هورگېرت و ۋاتش، " جە گەڕو دوۋەمو هۊرچنیەی سەرۊکایەتینە جە ٢٨و ئایاری، دەنگدەرۍ مەجالشا پنەدریا، کە جە بەینو ئەڵتەرناتیڤە سیاسییە ڕاسەقینەکانە هۊرچنیەی کەرا و بەشڎاریېوە بەقوەت جە دەنگداینە کریا، بەڵام حەر پېسە جە گەڕی یوۋەمو هۊرچنیەکانە ئەنجامدریا، پەخش و ۋەڵاکەرڎەیۊ لایەنگرانەی میدیای و نەبیەی هەلومەرجی یەکسانی ئیسفاڎېوە ناداڎپەروەرانەش بە پارتو دەسەڵاڎ داری یاونا. دەسەی  هۊرچنیەی بە شێۋېوە تەکنیکی سەرۊکایەتی هۊرچنیەکا کەرۍ، بەڵام کەموکوڕیېوە گۊرەی بۍ پېچو پەنا جە یاۋنەرینە بۍ.

بەڵام جە قۊناغو بانگەشەی و هەڵمەتەو هۊرچنیەینە، کاندیدەکۍ نەتاۋاشا بە ئازاڎیی هەڵمەتەکېشا ڕاوەبەر بکەرا. جە کەش و هەوێوەنە، کە ئازاڎیی بەربڕیەی وەربەس کریابۍ، هەم میدیای تایبەت و هەمیچ میدیای گرڎی جە پەخش و ۋەڵاکەرڎەیۊ پەیوەنڎیدار بە هەڵمەتەکاوە بە شێۋېوە سەربەخۊ و بێلایەنانە هەرمانەشا نەکەرڎە. ئینەیچ بی بە مەڵامەتو کەمبیەیۆ تواناو دەنگدەرا پۍ هۊرچنیېوە وشیارانەی. ڕۊو هۊرچنیەی تا ڕادېوە بەبۍ قۊرتۍ ۋیەرڎ، بەڵام وەختو ئەژماراو دەنگەکانە بڕۍ جە ڕاوجایەکا بە کەموکوڕییوە جابەجێکریۍ".

هـ . ش