بەپاو ئامارەکاو تۊڕەو مافەکاو ئینسانوو کورڎسانی مانگەو ڕەزبەرینە، لاوکەمیو ٤٨ ھاموەڵاتۍ و چالاکۍ جە شارە جیاجیاکاو وەرکەوتوو کوردسانینە دەسبەسەرۍ کریێنۍ و ٩ کەسێچ دریێنۍ قەنارە و ١٨ کۊڵبەرێچ بیێنۍ قوربانی.
تۊڕەو مافەکاو ئینسانوو کورڎسانی ئاماروو پاشێلکارییەکاو مافەکاو ئینسانیش وەرکەوتوو کورڎسانینە ماوەو مانگەو ڕەزبەرینە(٢١وو ئەیلوولی تا ٢١ۍ تشرینوو یوەمی) وەڵۍ کەرڎێوە.
مانگەی وەڵینە ١٨ کۊڵبەرۍ و کاسبکارۍ بیۍ قوربانی
بە پاو ئا ئامارەیە مانگەو ڕەزبەرینە ٢ کۊڵبەرۍ بانە و مەریوانوو پارێزگاو سنەینە بە تەقەی ڕاستەوخۊو هێزەکاو دەوڵەتوو ئێرانی کوشیێنۍ و لاوکەمیوە ١٤ کۊڵبەرێچ بە تەقەو ئا هێزا بریندارۍ بیێنۍ.
هاموەخت مانگەی وەڵینەیچ کاسبکارێوە سەقزنە دماو ئانەی هێزەکاو پۊلیسی کەوتێبێنۍ شۊنیش، وەختوو ورئامایشنە سەیارەکەش وەروێڵییا و مەرد، مەنتێقە سنووریەکاو پیرانشاریچنە کۊڵبەرێوە بە تەقایۊ مینی بریندار بی.
٩ زینڎانیۍ دریێنۍ قەنارە
پێسە جە بەشێوە تەروو ئامارەکەینە ئامان مانگەی وەڵینە زینڎانەکاو خۊڕەمئاوا، هەمەدان، ڕەشت و کەرەجینە ٩ بەندکریۍ کوردی بە تۊمەتەکاو "کوشتەی بەئەنقەس"ی و "بازرگانی بە ماددەی هۊشبەر"یوە دریێنۍ قەنارە.
کوشتەی ژەنا
تۊڕەو مافەکاو ئینسانوو کورڎسانی بەشێوە تەروو ڕاپۊرتەکۍ تەرخان کریان پەی تندوتیژی وەراوەروو ژەنا و ئاماژەش پانەیە کرڎەن، کە ئەوەڵ مانگوو پایزینە لاو کەمیوە ٣ ژەنۍ سەرڎەشتنە و پیرانشارنە ئەنداماو بنەیانەکاشا کوشتێنۍ.
تەقایوە مینی
هاموەڵاتێوە خەڵوو شاروو بانەو وەرکەوتوو کورڎسانی بە تەقایۊ مینی سلێمانی، پانیشتوو کورڎسانینە مەرد.
دەسبەسەرکەرڎەی ٤٨ هاموەڵاتا و چالاکا
هەڵمەتەو سیاوگیری و گێرتەی چالاکا و هاموەڵاتا وەرکەوتوو کورڎسانی بەرڎەواما و پێسە ئا ڕێکوزیا ئاماژەش پەنە کرڎەن مانگەو ڕەزبەرینە لاو کەمیوە ٤٨ هاموەڵاتۍ و چالاکۍ بە تۊمەتەو چالاکیی سیاسی و مەدەنی شارەکاو پاڕێزگاکاو ورمۍ، سنە، ئیلام و تارانینە بە دەسوو هێزە ئەمنییەکا دەسبەسەرۍ کریێنۍ.
حەرچندە بەشێوە جە دەسبەسەرکریایا بە کاتی و بە نیایرەی بارمتەی دارایی ئازاڎۍ کریێنۍ، وەلۍ فرێشا تا ئیساتۍ دەسبەسەرێنۍ و حیچ زانیاریێوە بارەو چارەنویسیشاوە وەرڎەس نییا.
دووۍ چالاکۍ سزاو قەنارەدایشا پەی بەرەشییە
مانگەی وەڵینە لاو دادگاکاو شۊڕشیوە شارەکاو سنە، سەقز، مهاباد، ئیلام، ورمۍ، مەشهەد و کرماشانینە سزاو زینڎانی، قامچی و قەنارەدای پەی ١١ دەسبەسەرکریایا بەرەشییە.
ڕەزا ڕەسایی هاموەڵاتوو کوردوو یارسانی، کە خەڵکوو شاروو سەحنەو کرماشانین بە تۊمەتەو بەشداریکەرڎەی جە کوشتەی وەرپەرسێوە ئەمنیی ئا شارەینە میانەو وێنیشانەدایەکاو ساڵۍ ویەرڎێنە سزاو قەنارەدایش ملەرە سەپیێنە.
هاموەخت نایب عەسکەری زینڎانی سیاسیی کوردی، کە وەڵتەر بە تۊمەتەو "یاخیبییەی و چەکورگێرتەی" جە ڕاو ئەندامبییەینە پارتوو ژیوای ئازاڎوو کورڎسان (پەژاک)ینە بە بۍ ئامادەبییەیش لاو لقوو یەرۍ دادگاو شۊڕشوو ورمێوە سزاو قەنارەدایش ملەرە سەپیێبۍ. داواکارییەکەش پەی لوایۊپۊرەی تێهەڵچوونە و دماو لوایڕاوەو چند ئەرەنیشتاو دادگای بە ئامادەبییەی وێش ڕەت کریاوە و واوەی لاو هەمان دادگایۊ سزاو قەنارەدایش ملەرە سەپییاوە.
مانگێرتەی زینڎانییا
نایب عەسکەری و عەبدولعەزیز گوڵ محەمەدی دووۍ زینڎانیۍ سیاسیۍ کوردی زینڎانوو ورمێنە مانشا جە وارڎەی گێرت.
نایب عەسکەری جە ششوو ڕەزبەرینە دژوو فشاروو ناوەندە ئەمنییەکا سەروو دادگایۊ تاسەرجەنۊ سزاو قەنارەدایش ملەرە سەپییۊوە، دەسش بە مانگێرتەی کەرد و دماو یەرۍ ڕوا جە مانگێرتەکەیش بە ئەمرەو وەرپەرساو زینڎانی فاڕیاوە پەی ژووری تاکەکەسی.
عەبدولعەزیز گوڵمحەمەدی جە ٢٢ۍ ڕەزبەرینە دژوو ئاستەنگەکاو هەواڵگێریی سوپاو پاسدارا وەرڎەموو ئیسفادەکەرڎەینە جە ورگێرتەی مۊڵەتینە دەسش بە مانگێرتەی کەرد و تا ئیساتێچ بەرڎەواما.
دۊخی تەندروسی و جەستەیی زینڎانییا
ئەرسەلان خودکام زینڎانی سیاسیی کوردی زینڎانوو ورمێنە، کە سزاو زینڎانیی تاهەتاییش ملەرە بڕیان، بۊنەو بێبەشبییەیش جە خزمەتگوزاریی تەندروسییوە رەرسەو کۊربییەی چەمێوەش هەنە.
ئا زینڎانییە سیاسییە، کە ماوەو زیاتەر جە پەنج ساڵان ئینا زینڎانداننە بۊنەو دۊخی دژواروو وەختوو دەسبەسەری، ئەشکەنجە و بێبەشکەرڎەیش جە خزمەتگوزاریی تەندروستییوە تووشوو چندین نەوەشییە جەستەیی و دەروونییا بییەنۊ.
ئا زینڎانییە سیاسییە دلێڕاسەو مانگەو ڕەزبەرینە بۊنەو وەستەیرەی فشاروو ونێوە فاڕیاوە پەی بنکەی تەندروسیی دلۍ زینڎانی، وەلۍ چاگە بەغەڵەت چەنێوەش دریێبۍ وەنە و باری تەندروسییش تێک شی و چەمێوەش وەستەنرە و تەرسەو جەدەسدای ئا چەمیشە هەنە.
