شارو ئامەدینە ۋېنیشاندای ئیدانەکەردەی دژو هرووژمو قڕکەردەی سیاسی دژو کۆنگرەی دیموکراتیکی گەلا (هەدەکە)ی لواڕاوە. جەیلان ئاکچا، ئەندام پەرلەمان جە چالاکییەکەنە قسێش کەرڎۍ و واتش: "هەدەکە هێڵۊو یەرەمیەنە، نمەتاوا شکسش پنە بارا. پیلانگێڵنا شکس مارا."
بە سەرمەشقایەتی جمېیەرو ژەنا ئازادی (تەژەئا)، پارتو دیموکراسی و یەکسانی گەلا (دەم) پارتی هەرێمە دیموکراتیکەکا (دەبەپە)ی جە ناوچەو یەنیشەهیرو ئامەدی گلېرۆبیەیۍ ناڕەزایی دژ بە هرووژمە قڕکاریە سیاسیەکا دژو هەدەکەی لواڕاوە.
جە گلېرۊبیەکەینە جەماوەرێوە فرە بەشداریشا کەرد و لافیتۍ، "ئێمە پاگیری سەرو جەنگی نمەکەرمۍ، بەڵکم لایەنۍ سیاسەتی دیموکراتیکینمۍ". "ئێمە هەدەکەنمۍ" جە ۋێنیشانداکەینە بەرزۍ کریێبێنێوە. محەمەد شیرین گۆربۆز هامسەرۆکو لقو ئامەدو دەبەپەی جە چالاکییەکەنە قسێش کەرڎۍ و واتش: "ئێمە گرڎ هەدەکەنمۍ، هەدەکە گەلا."
هەرپاسە جەیلان ئاکچا، ئەندام پەرلەمان قسێش کەرڎۍ و سەرەڕاو ئاماژەکەردەی بە بە ئامانجگېرتەی ئا کەسا کە باوەڕیشا بە سیاسەتو "هێڵۊو یەرەمیەنە"ـە، ئاماژەش بە قسەکا ڕابەر ئاپۆی دا و جەختش چانەی کەرڎۆ کە هەدەکە هامتەریب چنی سیاسەتو دیموکراتیکی هەرمانە مکەرۆ. پۊکەی زینانیکەردەی و تەرسنای گەلوو کوردی جە ئامانجەکاش دوور نمەوزۆوە و واتش: "ئێمە هەدەکەنمۍ. هەدەکە هێڵۊو یەرەمیەنە، نمەتاوا شکسش پنە بارا. ئانەی شکس مارۆ پیلانگێڵنەکێنۍ. ئا کەسۍ کە باوەڕیشا بە هەدەکەی و هێڵۊو یەرەمینە بە دڵنیاییوە سەرۍ گنا."
دماو دمایی ئامای گلېرۊبیەکەی، پۆلیس هەوڵشدا لافیتەکا جە ۋېنیشاندرەرا بسانۆ، بەڵام جەیلان ئاکچا بە پێچنای لافیتەکەی دەورو ۋێشەرە ڕاش ۋنە گېرتۍ. دماو گرژیێوە کەمی جە ما بەینو ۋێنیشاندەرا و پۆلیسینە، چالاکییەکە دمایش ئاما.
