رۆنامەنوویس گوهدار زێباری دماو ئازاڎبیەیش ئەرەیاۋناش، ئاژەشا دلۍ زینڎانینە فرا خراپبیەن، واتیچش، دەسەڵات چێژ جە هەڵسەو ئەڎا و تاتاما وینۆ، جەختیچش کەردۆ، ئانەی ۋەران ۋەر پاڎیشا کریان، "خیانەتێوەتەر بیەن ۋەران ۋەر بە دیموکراسیەتی".
رۆنامەنوویس گوهدار زێباری، دماو ئازاڎبیەیش جە بارەو ئاژەو گیریایا بادینانیۆ دلۍ زینڎانەکا پەدەکەینە ئەرەیاۋناش، ئاژەشا دلۍ زینڎانینە فرە خراپبیەن، چونکی بەردەوام چێروو چەمڎارینە بیێنۍ تا گولانەتەرین چێوشا سەر گەورە کەراوە.
واتیچش، ئانەی چنی من و هامڕایام کریا خیانەتێوەتەر بۍ ۋەران ۋەر بە دیموکراسیەتی و خیانەتێوەتەروو دەسەڵاتی بۍ ۋەران ۋەر بە قەڵەمە ئازاکا و کپکەردەی دەنگوو ئازاڎیی .
گوهدار زێباری ئانەیچش وست ڕووە، "من و شێروان شێروانى و سلێمان ئەحمەڎ بێ تاوانێنمۍ و حیچ خراپێوەما پۍ حیچ کەسێ نەبیەن و ستەمما جە کەسی نەکەردەن، بەڵکم ئانە ئێمەنمۍ ستەمما ۋنە کریان و بەبێ بیەو حیچ تاوانێوە گیریێنمۍ".
ئەرەیاۋنایچش، بەپاو زانیاریەکاو من، ئەگەر حیچ قۊرتێوە وەش نەکریۆ ئانە مشۊم ساڵێوەتەر شێروان شێروانى ئازاڎ کریۆ.
ئا رۆنامەوانە ئاماژەش پانەیچ کەرد: ئازاڎكەردەکەی پۍ من تاڵا ۋەروو ئانەی بەشێوە جە لاشەو من كە شێروان شێروانیە هەڵای ئینا زینڎانەنە و هەست بەشەرمەزاری کەروو نیا پاڵمەنە.
باسش چانەیچ کەرد: ئانەی جە هەرێموو كوردسانینە ڕووەمڎۆ رەنگدایۆ عەقڵیەتی تاكڕەوی و تنڕەوی كۆنە پەرسیی و دماکۊتەیین كە ئی دەسەڵاتە گێرتەو ئێمە چێژ جە هەڵسەو ئەڎا و تاتاما و سیخوڕی و تەرسنای و تۆقنای خەڵكی موینۆ.
جەختیچش کەردۆ، کە گەلوو كودی لایەقوو ئی جۆڕە حكومڕانیە نییا ۋەروو ئانەی ئێمە گەلێوە مانیا و ستەم ۋنە کریێنمۍ.
گۆهدار زێباری، یۆن چا دەیان ڕۆنامەنوویس و چالاکا و هاموڵاتییا بادینانی کە ساڵەو ٢٠٢٠ جە تەرەفوو هێزە ئەمنییەکا پەدەکەیۆ بەبێ قەراروو دادگای و بەبێ حیچ تۆمەتێوە بەڵگەدار گیریا و دادگاو هەولێری سزاو یەرۍ ساڵا زینڎانىیش سەرەرە سەپنا.
هێزی شەممە دماو یەرۍ ساڵا و شش مانگا مەنەیۊوی جە زینڎانوو پەدەکەینە و بە دما یاۋنای سزاکێش گۆهدار زێباری ئازاڎ کریا و گێڵاوە دلۍ کەسوکاروو ۋێش.
ئەگەرچی سزاکۍ گۆهدار زێباری یەرۍ ساڵۍ بۍ سزاکێچش تەمام کەردە بۍ، بەڵام ئاسایشوو پەدەکەی جە زینڎانەنە تۆمەتێوە تەرشا پۍ وەش کەرد و ئاڎیچ هۊرگێرتەو چەکی بێ مۆڵەتی بۍ، پۍ ئانەیچ دادگاو هەولێری سزاو شەش مانگا تەریش سەرەرە سەپنا، جە وەختێنە ئا چەکە تاپڕێوە ساڵەو ١٩٦٠ ی بۍ و هین و بابایش بیەن، جە یانەکەو ۋێچشەنە نەبۍ، بەڵکم جە یانەو واڵێوەشەنە نریانەرە.
