ئەڎایا ئاشتی کە بە هەڵسې وەشحاڵیۆ تەماشەو مەراسیمو چەک دلېنەبەردەیشا کەرڎ، واتشا: "ئەوەکۊشای فرەما کەرڎ پەی ئاشتی، جە ئیسەنە موینمې دوعاکێما قبووڵې بیێنې، هیواڎارێنمې ڕۆڵەکێما دلې ئاشتیینە بژیوا."
سەرو بانگەوازەکەو ڕابەر ئاپۆی، گرووپو ئاشتی و گلېرگەی دیموکراتیک جە مەڕەو جاسەنەو سنوورو سلێمانینە مەراسیمو چەک دلېنەبەردەیشا ئەنجامدا. جە مەراسیمەکەنە کە ٢٥٠ کەسې پېسە شایەتحاڵی بەشدارې بێنې گرووپەکەو گەریلای جە کەشۆ ئامې دلې مېڎانوو مەراسیمەکەی. گەریلاکې کە جە ١٥ ژەنا و ١٥ پیایا پێکئامێبێنې، بە ڕیز ئامې دلې مېڎانوو مەراسیمەکەی. مەراسیمەکە سەعات ١١:٢٥ دەیەقې دەسشپنەکەرڎ و ١١:٤٥ دەیەقې دمایش ئاما. چنی هۊرئێستەی سەرو پەیا بەشدارا مەراسیمەکەی دروشمۊو "بژیۋۆ سەرۆک ئاپۆ"ی وچیاوە. جە مەراسیمەکەنە دماو قسەکەردەی هامسەرۆکۊو کەجەکەی بەسێ هۆزاتې، چەکەکېشا دلې ئێرینە سۆچنې.
گەلو کوردی جە شاشەکاوە تەماشەو مەراسیمەکەیشا کەرڎ، ئەڎایا ئاشتی فرێوە جە شارەکاو کوردەسانینە گلېرې بیێوەو و جە ئەرەمەرزیاکاوە تەماشەو دیمەنەکاشا کەرڎ. ئەڎایا هەم فرە بە جۆشوخرۆشې بێنې و هەمیچ خەمبارې بێنې. ئەڎاڎا جە لێوە دوعا کەرێنە، جە لێوەتەرۆ بە هەڵشەو شاڎمانیۆ تەماشەو ئا هەنگاما کەرێنې کە پەی ئەوەکۊشای ئاشتی بریێنې. هەنگامە تاریخیەکێشا پی جۊرە باس کەرڎە: "دوعاکێما قبووڵې بیې. ئیساتې نۊبەو دۊڵەتیا، هەنگامەی دماتەرە پەنەوازا دۆڵەت بنیۆش. چی وڵاتەنە پەنەوازا چیولای جیای هەڵسې، ئاشتی سەروەر بۆ."
ئەڎایا وانی کە بە جۆشوخرۆشێوە فرۆ تەماشەو دیمەنەکا کەرێنې، جە ڕاو ئاژانسو هەواڵو فوراتی (ANF) یۆ هەستەکێشا بەربڕیې.
یووە جە ئەڎایا ئاشتی، گوڵستان کایا: گیانو ئێمە سۆت، گەرەکما نیا گیانو حیچ کەسێوەتەری سۊچۆ. هەنگامېوە گۊرې بې. ئارۆ پەی ئانەی ۋنی زیاتەرە نەمجیۆ چەکەکې ئێرشا ۋەردریانە.
حەنیفە کاچاکە : ئی ڕووەیە مکەرمې بە سەوقاتی پەی ژەنا و کەسانی بە ئینسافی. ئێمە ئی ڕوێما دیې و پەی ئێمە ڕوێوە پەڕ جە فەخریین. ئی دیمەنې ئارۊیە و گرڎو ئانەی کریا پەی ئانەی بې کە جیلی تازە و زاوڵې کوردی ژیۋایې یەکسان بژیوا. چەکیچ هەر پی مەرامۆ هۊرگیریا، بەڵام ئارۆ گرڎو جەهانی کوردش ئشناسا و گۊشش جە داواکاریەکاش بې. ئێمە دوعاما پەی بەدیئاوردەی ئاشتی کەرڎ. پەی قبووڵبیەی ئی دوعایا چێشما دەسەنە بې درێخی نمەکەرمې.
مەدینە کیاکیشە: ئێمەی ئەڎا ئێشما فرە لا یاوا، جەرگما فرە سۆت. ئێمە تەنیا ئاشتیما گەرەکا. دماو پەیامەکەو حەفتەی ۋیېەردەی، ئی دیمەنې دڵو گرڎیماش ئارامکەردۆ. هەم هەڵسیما متۍ، هەمیچ دڵوەشې بێنمې. چیولای پەنەوازا ئاشتی بە ۋەنای بە زوانو ئەڎې، یەکسانی و ئەرەمەرزنای دەستووری بنەڕەتییوە بەدیبې.
