گەریلاکاو ئازاڎیی کوردەسانی سەرەڕاو هەلومەرجی سەختی، پېوەس بیەی ۋێشا بە ڕابەر ئاپۆی پارېزنان و گۊرەتەرین مڎرامانشا ۋەرا ۋەر بە پیلانگێڵنی نیشانە دا. گەریلاکۍ کە جە مەڕەکا جەنگینە وەرەنگارۍ هرووژمەکا دۊڵەتو ئەرەگیرو تورکی باوە، سەبارەت بە مڎرامانی بێوێنەو ڕابەر ئاپۆی جە ئیمرالینە پەی ئاژانسوو هەواڵوو فوراتی (ANF) قسێشا کەرڎۍ.

بەستا سیدارە، گەریلۍ یەژا ستاری: ئێمە ئی پیلانگێڵنیە نەک تەنیا دژو کەسایەتیی ڕابەر ئاپۆی، بەڵکم بە تاوانێوە دژو گرڎو گەلا مزانمۍ و ئیدانەش مکەرمۍ. مەرامو ئی پیلانگێڵنییە ماڕای ئیرادەو جمېیەرەکەیما و گەلوو کوردی بۍ. بەڵام ڕابەر ئاپو جە یووەم ڕۊو دیل کەردەیشەنە جە ئیمرالی تا ئارۆ ئەوەکۊشایش چڕتەر کەردەنۆ. مەرامو پیلانگێڵنا ئانە بۍ کە رابەر ئاپۆی جە چوار دیوارێنە زینانی بکەرا و پا جۊرە جمېیەرەکەیما دلېنە بەرا. بەڵام مڎرامانوو ڕابەر ئاپۆی پلانەو پیلانگێڵناش پووچ کەردۆ و هیواش دلۍ گەلا جەهانینە زیڼە کەردۆ.

پې مەڵامەتۆ جە هەر شۊنێنە نامۍ ڕابەرایەتی ئامێ بۆ هەڵوێست ۋەرا ۋەر بە پیلانگێڵنا گیریۆنە ۋەر و دژشا ئەوەکۊشای مکریۆ. ڕەنگە ڕابەر ئاپۆ جە چوار دیوارێنە زینانی بۆ، بەڵام فکرەکێش جە ئەوەکۊشای گەلینە مژیوا. نەک هەر گەلوو کوردی، بەڵکم گەلاو جەهانیچ جە فکرەکاش ئیلهام هۊرمگێرا و دژو ئی پیلانگێڵنییە کۊشش مکەرا.

ناڕەزایی ملۊڕاوە، ڕاپیمای ئەنجام مڎریۆ، مانگېرتەی جە واردەی بەردەواما و جە ڕاو چالاکییە جۆراوجۆرەکاوە مڎرامان دژو پیلانگێڵنیی ئەنجام مڎریۆ. ئینە هێز و مڎرامانوو رابەرایەتییا. دەسەبەرکەردەی ئازادی بەڎەنی ڕابەرایەتی مەرامی سەرەکی گەریلاکاو ئازادی کوردەسانی و گرڎو گەلان. پەی ئینەیچ گرڎ جۆرە بەدیلێوە قورس دریان و بەردەواما. ڕابەرایەتی جە ئیمرالینە مڎرامانی بێهامتاش نیشانە دان و ئی مڎرامانە هێز و ئیرادە بە ئەوەکۊشای ئازادیی گەلەکەیما مڎۆ.

ئەوەکۊشای ئێمە حەجگیز نمەمردۆ و تا مۍ بەهێزتەر بۆ تا ئازادی بەڎەنی ڕابەر ئاپۆی مسۆگەر مکریۆ. چانەینە چی ماوەنە ئەرەنیشتەی ئەنجام بڎریۆ، بەڵام ئینە پا مەعنۍ نیا کە گۆشەگیری هۊرگیریان. تا گۆشەگیریی سەپیا بەردەوام بۆ، ئێمە قەد دەسبەردارۍ کۊششی و ئەوەکۊشای نمەبیمۍ.

فەرهاد عەگید، گەریلاو هەپەگەی: گرڎ ملیتانێوە پەکەکەی فیدایی ڕابەر ئاپۆیا؛ کەواتە تا گۆشەگیری سەپیا بەردەوام بۆ، ئەوەکۊشای بەردەوام بۆ. هەڵای پیلانگێڵنیی بەردەواما، بەڵام ڕابەر ئاپۆیچ مڎرامانی تاریخی نیشانە مڎۆ. ئیرادەو ئاڎیی ئی پیلانگێڵنیەشە پووچ کەردەنۆ. پیلانگێڵنا مەبەسشا بۍ پی پلانۍ گەلوو کوردی و کۊششو ئازادی دلېنە بەرا، بەڵام ڕابەرایەتی، بە ساڵان ئەوەکۊشایش پەی گەلی، کەرڎ بە ئەوەکۊشای باوەڕی و ئیرادەی. ئێمەیچ پېسە گەریلاکاو ڕابەرایەتی، ئەوەکۊشایما فراوانتەر مکەرمۍ پەی ئانەی زیاتەر شایستەو ئەوەکۊشای و مڎرامانوو ڕابەرایەتی بیمۍ. ئێمە حازرێنمۍ پەی دەسەبەرکەردەی ئازاڎیی بەڎەنی ڕابەر ئاپۆی گرڎ جۆرە بەدیلێوە بڎەیمۍ.

باوەر حەبەش، گەریلاو هەپەگەی: یووەم: پېسە گەریلاکاو ئازادی کوردەسانی ڕێز و سڵامو ۋێما پێشکەش بە ڕابەر ئاپۆی مکەرمۍ. کاتێ جە ساڵۊو ١٩٩٩پیلانگێڵنی مېیاننەتەوەیی ئەنجامدریا، مەرامەکە تەنیا رابەر ئاپۆ نەبۍ. ۋەرو ئانەی ڕابەر ئاپۆ نوێنەرایەتی گەلا ستەم ۋنەکریای و گەلا ۋەرکۊتوو مېیامینی و گرڎو ئا کەسا کەرد کە شۊنەو ئازادیرە گێڵێنۍ بی بە مەرام. سیستەمو سەرمایەداری گەرەکش بۍ هەژموونو ۋێش سەرو ۋەرکۊتوو مېیامینیرە بسەپنۆ و هەر پا مەڵامەتەیچۆ ڕابەر ئاپۆ و جمېیەرو ئازادیش کەرڎ مەرام. هەرپاسە دۊڵەتو ئەرەگیرو تورکی جە ساڵۊو ١٩٢٥یوە سیاسەتو قڕکەردەیش دژ بە گەلوو کوردی بەردەوام کەردەبۍ.

هەردووە سیاسەتو جینۆسایدو جەسەیی و تاونایۆ بە شێوازی جیاواز دژو گەلوو کوردی جابەجێکریێ. بەڵام ڕابەر ئاپۆ تەنیا ڕابەرێ بێ کە تاواش دمای پی جینۆسایدەیە بارۆنە. سەرمەشقو گەلا وەرکەوتوو دلێڕاسەی، بەتایبەت گەلوو کوردی. ئێمە پێسەو کۆششکارا ئاڏی بەردەوامێنمێ هەتا ئازادی جەسەیی ڕابەرایەتی مسۆگەر بۆنە خەباتو وێما وەرفراوان مکەرمێ. پێسەو گەریلای ئینە ئەرکو ئەساسی ئێمەن. هەرپاسە پەنەوازا گەلوو کوردی جە هەر چوار پارچەو کوردەسانینە و ئەوروپای و وەرکەوتوو دلێڕاسەی ئەوەکۆشای وێشا بەرز بکەراوە. پەی ئازادیی ڕابەر ئاپۆی پەنەوازیما بە ئەوەکۆشای گۆرەتەر هەن. دیسان جە مەڕەکا جەنگیۆ تا ئیمرالی سڵام و حورمەتو وێما پێشکەش بە ڕابەرایەتی مکەرمێ.

حەمزە عەرەب، گەریلاو هەپەگەی: ٢٦ساڵێ سەرو پیلانگێڵی مییاننەتەوەی ویەرد، ڕابەر ئاپۆ ٢٦ ساڵێ مڏرامانی گۆرەش نیشانە دا. ئی پیلانگێڵییە نەک تەنیا دژو گەلوو کوردی، بەڵکووم دژو گرڏو گەلا وەرکەوتوو دلێڕاسەی ئەنجامدریا. زلهێزێ سەرمایەداریێ کە زاڵێنێ سەرو ئا خاکا، گەرەکشا نییا شۆڕشێوە جە وەرکەوتوو دلێڕاسەینە و بەتایبەت  کوردەسانەنە ڕووەبڏۆنە. پۆکەی تا ئارۆیچ درێژە بە پیلانگێڵی مڏانە.

من پێسەو کۆششکارێوە عەرەبی ئینای ڕیزەکا پەکەکەینە هەتا ئازادی جەسەیی ڕابەر ئاپۆی مسۆگەر بۆنە درێژە بە ئەوەکۆشایم مڏۆنە. ئی گۆشەگیرییە سەپیان نەک تەنیا سەرو گەلوو کوردی، بەڵکووم جە کەسایەتی ڕابەر ئاپۆینە سەرو گرڏو گەلا وەرکەوتوو دلێڕاسەیرە سەپیان. ئارۆ پەی گرڏ کەسێ بەرکەوت ڕابەر ئاپۆ تەنیا  ڕابەرو گەلوو کوردی نییا، بەڵکووم ڕابەرو گرڏو گەلان.جواناوە هەتا گرڏو چین و توێژەکا گرڏ لێوە پەی ئازادی ڕابەر ئاپۆی ئەوەکۆشای مکەرا. ئێمەچ ئەوەکۆشای بەردەوام بۆنە تا ئازادی جەسەی ڕابەر ئاپۆی مسۆگەر بۆنە. بە دڵنیاییۆ ساڵەو ٢٠٢٥ مکەرمێ ساڵەو ئازادی ڕابەر ئاپۆی. هەرپاسە ئینایمه جا باوەرێنە گرڏو گەلا پەی ماڕاو گۆشەگیری سەپنریای و مسۆگەرکەردەو ئازادی جەسەیی ڕابەر ئاپۆی ئەوەکۆشای مکەرا.