گۆشەگیرکەردەو ڕابەروو گەلوو کوردی عەبدوڵا ئۆجالانی جە ئیمراڵینە ٢٥ ساڵێش تەمامنا، نزیکەو ٣ ساڵان حیچ زانیاریێوە جە بارەشۆ مەزانیۆ. جە دژوو گرڎوو ئی بێ یاساییا، هەڵمەتەو 'ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کوردی" ڕۆ دماو ڕۊی فراوانتەر بۆ و جە مێڎانی میان نەتەوەیینە پاڵپەشتیێوە ۋەرفراوانش چننە کریۆ.

سیاسەڎمەدار و وەزیری وەڵینوو پەشتیوانی گلێرگەیی پاولۆ فەرێرۆ پەیوەس بە گۆشەگیری ئیمراڵی و هەڵمەتەو 'ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کوردی' پۍ ئاژانسوو هەواڵوو فوراتی (ANF) قسێش کەردۍ.

'ئۆجالان شۆڕشگێڵن و فەیلەسوفێوە سەرمەشقا'

فەرێرۆ باسش جە نایاسایی گۆشەگیری ئیمراڵی کەرد و ئاماژەش پانەی دا کە تورکیا گەرەگشا پی ڕۍ ڕا جە فکروو عەبدوڵا ئۆجالانی گێرۆ و واتش: "مەڵامەتوو گۆشەگیری فرە ڕۊشنا، عەبدوڵا ئۆجالان ڕۆشنۋیر، شۆڕشگێڵن و فەیلەسوفێوە کوردا. دەوڵەتوو تورکی گەرەکشا جە ڕاو گۆشەگیرییوە، فکر و ڕامانوو عەبدوڵا ئۆجالانی دلێنەبەرۆ".

'ئامانجوو گۆشەگیری ئێمراڵی و ئانەی جە دژوو گرامیشی کریا پێسە یۊینۍ '

وەزیر فەرێرۆ پی جۊرە درێژەش بە قسەکاشدا و واتش: "ئا گۆشەگیرییەی کە تورکیا ۋەران ۋەر بە عەبدوڵا ئۆجالانی ئەنجامش مڎۆ، پێسە ئا ڕەفتارە فاشیستیا ڕژێموو مۆسۆلۆنی بێ کە جە دژوو نویسەر، تیۆریست و ڕابەروو ئاخێزوو ئیتالیای ئەنتۆنیۆ گرامیشی کەردش. پۍ ئانەی عەبدوڵا ئۆجالان نەتاوۆ بە سەربەسی جمۊوە، یان فکرەکەش وەڵا بۆوە، گۆشەگیریشا پێکئاردەن سەرش. ئامانجوو دەوڵەتوو تورکی فرە ئاشکران، پۍ ڕا گێرتەین جە وەڵابیەیۆ فکروو عەبدوڵا ئۆجالانی".

'ئازاڎیی ئۆجالانی پرسێوە گلێرگەییا'

پاولۆ فەرێرۆ سەرنجش وست سەروو پارادایموو ئۆجالانی و واتش: "ئازاڎیی ئۆجالانی بەرەو چارەسەریی پرسوو کوردین. عەبدوڵا ئۆجالان ئەکتەری بنەڕەتی چارەسەرکەردەی پرسەکا کوردین، ئینە فرە ڕۊشنا. عەبدوڵا ئۆجالان پۍ چارەسەرکەردەی پرسوو کوردی چارەسەری ئاشتیانە وزۆ ڕووە. پۍ چارەسەرکەردەی پرسەکا تەریچ، ئازاڎیی ئۆجالانی هەنگامەی یووەمەنە. سەروو ئی بنەمایۍ ئازاڎیی عەبدوڵا ئۆجالانی تەنیا پرسێوە کەسی نیا، بەڵکم پرسێوە گلێرگەییچا".