هەرمانەکۍ ئەرەمەرزنای زانشتگەکەی سەرو پرسەکا وەشکەرڎەی تیمی، پێکئاوردەی بودجەی، ئاماڎەکەردەی پڕۊگرامی و بەهێزکەردەی چېرخانی پەروەردەیی ئەنجام مڎریۆ. جە چوارچێوەو پرۆژەکەینە، دەسەو ئەرەمەرزنەری پێکئامان، دەسە کارگێڕییەکێش یاوێنۍ بە قۆناغی دماین، تەسەور مەکریۆ جە ساڵۊو ٢٠٢٦ینە زانشتگەکە دەس بە ۋەنای بکەرۆ.

زۋانی سەرەکی زانشتگەکەی زۋانی کوردی بۆنە؛ هەم بە کرمانجی و هەمیچ بە سۆرانی ۋەنای ۋنریۆ. هەرپاسە جە بوارو زانستە کۆمەڵایەتییەکا و موهەندیسینە جگە جە زۋانی کوردی بە ئەڵمانی و ئینگلیزیچ ۋەنای ۋنریۆ. زانشتگەکە نیازش هەن جگە جە فاکەڵتی پزیشکی جەمۍ پرۆگرامۍ ۋەرفراوانۍ بەکالۆریۆسی و بەرشیەی پێشکەش بکەرۆ. بەتایبەت بەشەکۍ ۋەنای کوردی، ئەدەب، زانستە کۆمەڵایەتییەکۍ، موهەندیسی سەرمەشقێنۍ.

پرۆژەکە دەرفەتێوە تازە بۆ پەی ئا خۊنکارا کە بە بڕوانامەو ئامادەیی کوردی جە ۋەرنیشت و پانیشتوو کوردەسانینە بەرێشیێنۍ. دماو تەمامنای پرۆسەو داواکاری و تاقیکەردەیۆ ئۆنلاینی، خۆنکارۍ متاوا بڕوانامەکاشا بەدەسبارا کە جە ئەڵمانیا و مېیاندەوڵەتینە هەرمانەش پنە بکریۆ. پێگەو سەنگەو زانشتگەکەی هەمان ئاستو ئەرەمەرزیاکا تەرو ۋەنای باڵاو ئەڵمانیاینە بۆ؛ هەرپاسە کوالیتی ئەکادیمی چنی ستانداردەکا ئەڵمانیای گونجیۆ.

یۆ جە ئامانجە گرنگ و بنەڕەتییەکا زانشتگەکەی، جە دوورمەودانە بنیاڎ نیای و ئاردەی ئارای کوردیێوە هامبەشو ئەکادیمییا جە ما بەینو شێوەزارو کرمانجی و سۆرانییەنە.

سەرۆکو کۆڕبەندو ئەڵمانی-کوردی (Deutsch-Kurdisches-Forum e.V.) د. یونس بەهرام ئاماژەش پانەیە دا ئی کۊششە بە تەنیا پرۆژێوە ۋەنای باڵای نییا، بەڵکم پەی کوردا ئۊروپای قۆناغێوە گرنگو ئەکادیمی و کولتوورییا. فکرەو ئەرەمەرزنای یووەمین زانشتگەو کوردی گێڵۊوە پەی کاتو شۆڕشو ۋەرنیشتی و واتش: "ئا کاتە هەنگامەو ۋەننگەی سەرەتایی یان پەروەردەی کوردی بێنۍ، بنەیانەکۍ واچێنۍ، زاوڵەکېما بە چ جۊرۍ زانشتگە بوانا؟ ئارۆ ئینایمۍ ئاستو جوابدایۆ ئا پرسیارێنۍ کە خەمو بنەیانەکا بۍ."

د. بەهمەن ئانەیچش وات، جە سەرەتانە تەنیا بە فکرەو ئەرەمەرزنای ئەنیستیۆدیۆو کوردی جە ئەڵمانیانە دەسشا بە هەرمانۍ کەرد و چنی وەختی فکرەکەشا فاڕیان پەی وەشکەردەی زانشتگێوە سەربەخۆی و جە گرڎ لېوە پاڵپەشتی فکرەکەیشا کریان و بەپاو پەیلواو شاندو ئەرەمەرزنەرو زانشتگەکەی تا ئاخرو ساڵۊو ٢٠٢٦ ئاماڎەکارییەکۍ تەمامیا و خۊنکارۍ هۊرگێرا.