یاگەگیرو سەرۆکو فراکسیۆنی و پەرلەمانتارو دەم پارتی، سری سورەیا ئۆندەر، کە بەشێوەن جە شاندو ئیمراڵی، قسێش پەی ئاژانسوو میزۆپۆتامیای کەرد و واتش: "ئانەی ئێمە جیاواز جە ڕای گرڎینی مزانمێش، دلېینەو سەرداکەیمانە. هەرکات پرۆسەکە یاوا ئاستێوە، ڕای گرڎینی ئاگاڎار مکەرمێوە، بەڵام بێجگە چینەی هیچ چێوۍ نییا شارمێشۆ".

ئۆندەر جە جوابو پرسیارەو "ئایا ناڕۊشنی ئاساییا؟" ئەرەیاۋناش نمەواچو نۆرماڵا بەڵام ناڕۊشنیەکە پېوەس نیا بە جدییەتیوە سەرو پرۆسەکەی، بەڵکم پېوەسا بە هەلومەرجەکەیۆ. ئۆندەر سەرنجش وست سەرو پێشنیار و هۊرسەنگنایەکا ڕابەر ئاپۆی دەربارەو پێشئامایەکا هەرێمەکەی و واتش: "ئیساتۍ هەڵوێسو ئەمریکا و ئیسرائیلی و تورکیای و ئەکتەرەکا تەرو سەرو مېڎانوو سوریای ناڕۊشنا و نمەزانیۆ چێش مکەرا. نمەزانیۆ دەسەڵاتی تازەو دیمەشقی چێش مکەرۆ و چنی سوریای بنیاڎ منیۆ. چی قۆناغە ناڕۆشنیەنۍ، ئۆجالان پێشنیارەکێش دەربارەو ۋەرکۊتوو مېیامینی وستەن ڕووە. چی ڕوانگۆ، هەڵوێسی هەرە ڕۊشن، هەڵوێسو ئۆجالانیا".

ئۆندەر دەربارەو هەڵوێسو ڕابەر ئاپۆی واتش: "پەی وەشکەردەی "ڕۊشنی" نەوەک جەنگ و وەربەسو بەینو گەلا، هەڵوێسێوە سیاسی نیشانە مڎۆ پەی ئاشتی و پێوەرەژیۋای و فاڕایۆ".

ئۆندەر ئەرەیاۋناش پەنەوازا حکومەت و دۆڵەت هەڵوێسشا ڕۊسن بکەراوە و واتش: "بەپەیلواو من بە مەڵامەتو نەبیەی قەرارێوە ڕۊشنیوە، هەڵای پرۆسەکە ڕۊشن نەبیەنۆ. جە لێوەتەرۆ، ئانۍ باجی گۊرەشا دان، بەتایبەت گلێرگەی کوردی، نیگەرانی فرەشا هەن. فرەو لایەنا ئی ئاژە دەروونییەو گلێرگەکەی بە "گەشوینیێوە پەڕ جە دڵەکوتۍ" پێناسە مکەرا. بیەی نیگەرانی و دڵەکوتۍ سرووشتییا چی قۆناغەنە. گلێرگێوە خاوەن ئەزموونا. پەی ئەنەیاوای چی سەردەمەیە گەشوینیێوە بە ڕاوجای عالۆ، هەڵوێسێوە ئاوەزمەندانەو گلێرگەیا. ئینە تەنیا ماناو نەبیەی چەمەڕایی نییا، بەڵکم هامکات خەباتا پەی ئاشتی. پەنەوازا ئاشتی داوای هامبەشو گرڎ کەسێوە ئەرەنیشتەو ئی خاکیە بۆ، پەی ئینەیچ پەنەوازا گرڎما کۊششی زیاتەر بکەرمۍ.

(...) بەڵێ، وەختێ مرۆڤ جە بڕۍ ڕەهەندێوە تەماشە مکەرۆ، یاگۍ سەرنجیا. بەتایبەت چی بوارانە ئەر کورد ڕەزامەندی سەرو 'ئاشتی' بڎۆ، دەرفەتێوە گۊرە جە دەس مڎا، ئاڎیچ ئەگەرو سەربەخۆیی کوردەسانیا. کەواتە ئەر ئیساتۍ ئاشتی نۍ ئاراوە بەرەو دەرفەتی پەی کوردی مکریۆوە؟ ئایا کورد جە ملەملانێ بەینو زلهێزەکانە ڕزگارش بۆ و بە ئازادی مېیاوۆ؟ ئینە ئەگەرێوەن کە مەتەرسی گۊرەش ئینا چنی. ئۆجالانیچ جە سەرەتاوە ئاماژە پینەی مکەرۆ ئەر کوردەکۍ ئی ڕیسکەیە بکەرا، ڕەنگاتی سەرەکێشۆ پەی کارەساتێوە تاریخی یان سەرکۊتەیۍ تاریخی. تیۆرو کۆنفیدراڵیزمو دیموکراتیکی ئۆجالانی سەرو ئی دووە بناغەیە ئەرەمەرزیان. پۊکەی ئۆجالان ئی تیۆرەشە وەڵێوست، نەک ۋەرو ئانەی "کوردەسانییا" بەڵکم چونکە سڵامەتی و ئازادیی کورداش کەردەن بە بنەما. جە دووۍ مەیلۍ جیاوازو دۆڵەتیوە، دووۍ نزیکایەتیۍ پەی ئۆجالانی هەنۍ کە ماچا ئیتر کاتو جابەجێکەردەی تیۆرەکەین. پۊکەی هەم ئۆجالان و هەم جمېیەری کوردی جە پرسو ئاشتیینە ڕۆشن و سەریحێنۍ. کاتێ دۊڵەت مېیاوۆ ئاستێوە جە ڕۊشنی و سەریحی، ئاکاتە "پرۆسە"ـی حەقەتین دەس پنە مکەرۆ. ڕەنگە ئی پرۆسە هەڵای بە "پرۆسەو چارەسەری" نامۍ نەبریۆ، بەڵام مشۊم ئاشتی پېسە هەنگامێوە گرنگ و سەرەکی پەی چارەسەری بوینیۆ.

پېسە شاندەکەی ئێمە سەرو وەڵێوستەی کۊششی ئەرێنی مردایمۍ. بێگومان هەرچیما دەسەنە بۍ مکەرمێش و هەوڵمڎەیمۍ ڕا جە پێشئامایە نەرێنییەکا بگێرمۍ. بەڵام تەنیا ۋەرپرسیاری ئێمە نییا، بەڵکم ۋەرپرسیاری گرڎو گلێرگەیچا بەشداری ئی پرۆسەیە بکەرا و بیاوناش بە ئەنجام. پۊکەی تا زیاتەر پرۆسەکە بەرەو وەڵۍ بلۆ، زیاتەر متاومۍ ڕۊشنتەر سەرو چێوەکا قسۍ بکەرمۍ".