"خالیدە ئەنگیزەک"ە ئەنڎامەو کۊمیتەی ناوەنڎی پەکەکەی یاڎو قاسم ئەنگینی-ش بەرزنرخنا کە ٢٧ و ئایارو ٢٠٢٠ینە گەشمەرڎەبی. چا بارۊ ئەرەیاۋناش، "هەڤاڵ قاسم شۆڕشگێڵێوە گۊرەبۍ کە یاگېش پەرەمەکریۊوە. جە دژوارتەرین وەختەکانە ئەرەکۆشای گۊرەش ڕاوەبەر کەرڎ ".
ئەنڎامەو کۆمیتەی ۋېراوەبەری پەکەکەی "خالیدە ئەنگیزەک"ە باسش جە ئەنڎامو کۆمیتەی ناوەنڎی پەکەکەی قاسم ئەنگینی کەرڎ کە ٢٧و ئایارو ٢٠٢٠ ینە گەشمەرڎە بی.
ئەنگیزەکە ئەرەیاۋناش کە مانگەو گەشمەرڎانە و ۋیرش ئاورڎۊ کە سەرمەشقای پېسە "حەقی قەرار، دەنیز گەزمیش، ئیبراهیم کایپاکایا، فەرهاد کورتای، مەحمود زەنگین، ئەشرەف ئاینک و نەجمی ئۆنەر"ی چی مانگېنە گەشمەرڎۍ بیۍ. ئەنگیزەکە حەرپاسە ویرشئاورڎۊ کە قاسم ئەنگینیچ ٢٧ و ئایارو ٢٠٢٠ ینە گەشمەردە بی و ۋاتش: "جە کەسایەتی هەڤاڵ قاسم ئەنگین-ینە گەشمەرڎا مانگەو ئایاری و گەشمەرڎا ئازاڎی گرڎیشا بە رێزۊ یاڎ کەرووە. وەعد واوەی کەرووە کە ئا کۊشیایەی کە گیانو ۋېشا پۍ بەخشا، بیاۋنمۍ سەرکۊتەی".
یەرەم ساڵیاڎو گەشمەرڎەبیەو هەڤاڵ قاسم ئەنگینیا. پارتەکەما پەکەکە پېسە پارتێوە گەشمەرڎا کۆت را. ئێمە سەرو خەتەو گەشمەرڎاماوە خۆتانکەرڎەی جە راسی پارتەکەیما مکەرمۍ و ئەرەکۊشمۍ. پسە چنی پەکەکە جە ڕاو گەشمەرڎاوە بی بە پارت، جە ڕاو گەشمەرڎایچۊ گۊرەبی، جە راو گەسمەرڎایچۊ یاۋان ئی ئاستە، جە ڕاو گەشمەرڎاوە مەعناش پېڎاکەرڎ، بی بە خۊتان شکۊ و جە ڕاو پەکەکەیوە بیۍ بە گۊرەتەرین بەهاکا گەلی. ئەگەر پی جۊرە مامەڵە چنی راسی گەشمەرڎا نەکەرمۍ، ئا وەختە ئێمە مافو گەشمەرڎاما پاڎیشا نەڎان.
هەڤاڵ قاسم هەڤاڵێوە پا جۆرە بۍ کە حەر جە زارۊلەیوە دڵسۆز و هۊگرو بەهاکا ۋڵاڎپارێزی و خاکەکەیش بۍ. هەڤاڵ قاسم حەجگیز پېسە ئانەی نەبۍ کە جە ئۊروپا گۊرەبیەبۊ، بەڵکم پېسە کادرێوە پارتی ئاما مېڎانو رابەرایەتی، بەشڎاریش جە پەروەردەنە کەرڎ و ڕووە و مېڎانەکا گەریلای پڕاوە. ماوېوە کەمەنە چنی ژیای گەریلاینە ڕائاما و زیاڎ جە ٣٠ ساڵا عمرو ۋېش بە کۊشیای بەخشا. حەربەگەنجی شانەش دا وەرو وەرپرسیاری".
هەڤاڵ قاسم تایبەتمەنڎییەکا جەنگاوەری ئاپۆییش جە کەسایەتی ۋېشەنە بەرجەسە کەرڎ
ئەنگیزەکە دەسنیشانش کەرڎ کە قاسم ئەنگین جە ناڕەحەتتەرین یاگەکانە، جە دژوارتەرین وەختەکانە کۊشیای گۊرەش ڕاوەبەرکەرڎ و ۋاتش، "هەڤاڵ قاسم جە دژوو خەتەی پاکتاوکەری، دوژمنی، هجومەکا دوژمنی جە گرڎ مېڎانېنە هەم جە روو ئایدۊلۆجی و هەم جە روو جەستەییوە کۊشیا. ئینەیچ پاسەشکەرڎ کە هەڤاڵ قاسم جە مەجال و کۊشیاینە بۊ بە خۊتان ئەزمونێوە فرە گۊرە. فرە سەربەرزېنمۍ کە هامڕایی کەسێوە پېسە ئاڎیما کەرڎ و چنیش کۊششماکەرڎ. ئا وەختەی چنی هەڤاڵ قاسمی هەرمانە کەرېنمۍ وەردەوام هێز چاڎی ورگېرېنمۍ. وەرو ئانەی هەڤاڵ قاسم جە خەتەو پارتی و رابەرایەتینە ۋېش ئەرمانا بۍ، تایبەڎمەنڎی جەنگاوەری ئاپۆییش جە ۋېشەنە بەرجەسە کەرڎەبۍ. حەر پۊکەی ئینسان متاۋۊ واچۊ کە هەڤاڵ قاسم شۊڕشگێڵێوە راستەقینەبۍ.
چا مېڎانانە کە هەڤاڵ قاسمش چنەبۍ وەردەوام وزېوە ئەرێنیش چنەبۍ. ئانەش نیشانەو چوۋاردەورەکەیش دابۍ و هامڕایا ۋېش بەشڎارو کۊشیای کەرۍ. هێزێوە سروشتی چا جۆرە جەلاو هەڤاڵ قاسمیۊ بۍ. وزە، جۊش و خرۊش و ورە بە هامڕایاش بەخشۍ. هەڤاڵێوە رۊشنۋیر بۍ، ۋېش بە عالی پەروەردە کەرۍ، وەختەکۍ ۋېش بە عالی رێکوستېبېنۍ. وەردەوام وەنېوە، ۋنەکۊڵیای کەرۍ. بەتایبەتی سەرو کورڎی و کورڎسانی، ونەکۊڵیای سەرو تاریخو کورڎی و جوگرافیاکەیش کەرۍ. چا مەجالەنە فرە حۊل و مانیایش کێشت، جە مەجال و هۊشمەنڎی، فەلسەفە، سیاسی، کولتوری، ئایدۊلۊجینە فرە ۋېش وەڵۍ وست. وەرو ئانەی جە هەرمانو کارو پەروەردەینە دەوری فرە گۊرەش گېڵنا. چا یاگېنە هەڤاڵ قاسمش چنەبۍ هەرمانەکۍ پەروەردەی بە عالی لوۋېنۍ ڕاوە. گرڎو جەنگاوەرەکا، کادرەکۍ پارتی و شەڕڤانەکا پەروەردەکەرۍ".
کادرێوە گۊرەی یاۋنەری بۍ
ئەنگیزەکە ئانەیچش وست ڕووە کە قاسم ئەنگین سەرمەشقی هەرمانەو یاۋنەریچش کەرڎەن و ۋاتش، "هەڤاڵ تاقېوە چا جۊرشە بۍ، کە هەم هەرمانەکا یاۋنەری بەرێکوستەی کەرۍ، هەمیچ جە روو ئایدۊلۊجیوە جە وەڵۍ وستەی یاۋنەرینە دەورۍ گۊرەش بۍ. پۍ نمونەی پۍ گرڎو رۊنامەکا و مجەلەکا نۋیسۍ، بەرنامەیچ پۍ تەلەڤزیۊنی ساز کەرۍ. پەیلواکا تیۊری ۋېش پێشکەش بە یاۋنەری کەرۍ، سەرمەشقی پۍ ئانەی کەرۍ. جە مەجالو یاۋنەرینە بڕۍ ۋیرکەرڎەیۍ خەڵەتۍ بېنۍ. پېسە ئانەی هەرمانەو یاۋنەری جە گرڎ چېۋېنە سەربەخۊن، نەبەسیانۊ ئایدۊلۊجیایۊ، پېسە ئانەی پەشتەو حەر یاۋنەریېوە ئایدۊلۊجیېوە بیەیش نەبۊ، پا جۊرە هەرمانەو یاۋنەری لوۋۍ ڕاوە. مامەڵەکەرڎەیۍ پا جۊرە بۍ کە چېرو کاریگەری لیبڕاڵیزمینەبۍ.
هەڤاڵ قاسم دژوو ئا ئەقڵیەتەیە جەنگش کەرڎ، ئەرەکۊشایۍ گۊرەش ڕاوەبەرکەرڎ. گەرەکش بۍ کە هەرمانەکا یاۋنەری، ئیدیعا-بانگەشە جە چوارچێوەو پێودانگە ئایدۊلۊجیەکانە وەڵۍ گنۊ ، بەقوەت کریۊ، بە رێکوستەی کریۊ و بۆ بە یانەو گلېرگەی. قورساییش وست سەرو ئانەی کە هەرمانەو یاۋنەری جە گلېرگەنە جیانەمەنۊ، لکدریا بە گلېرگەی بلۊڕاوە. هەڤاڵ قاسمیچ پېسە هەڤاڵا "دۊزدار، نوژیان، شیلان، دەنیز و غوربەتلی ئەرسۊز"ی لوۋا قافڵەو گەشمەرڎا خەتەو یاۋنەری ئازاڎیۊ. ئینسان متاۋۊ واچۊ کە هەڤاڵ قاسم رەنجدەر و خەباتکارێوە گۊرەو یاۋنەری بۍ. لوۋا قافڵەو گەشمەرڎا یاۋنەری ئازاڎیی. ئانەی یاۋنەری ئێمە مشۊ کەرۊش ئانەن کە سەرو خەتەو گەشمەرڎا پیمەرو ئایدۊلۊجیک پۍ ۋېش بە بنەما گېرۊ و سەرو ئا بنەڕەتیە گوڕ بە کۊشیای بڎۊ.
هەڤاڵ قاسم هونەرمەنڎ بۍ، وەرزشکاربۍ. جە گرڎ یاگېنە گۊرانیۍ چڕۍ، هورپڕۍ، شیعرۍ نۋیسۍ. فرەیچ حەز بە وەرزشی کەرۍ، پېسە مژارېوە تەندروستی گرنگیش پنە دۍ. وەرزشی پېسە بەشێوە جە ژیای گەریلایی ۋینۍ. هەڤاڵ قاسم جە هەمان وەختەنە پېسە سەرواز و فەرمانڎېوە فرە بەقوەتی بۍ. پا تایبەڎمەنڎیاوە بیەبۍ بە شۊڕشگېڵېوە فرە گۊرە".
حەتا بەدیئارڎەو ئامانجو گەشمەرڎاما ئی ئەرەکۊشایە وەردەوام بۊ
"خالیدە ئەنگیزەک"ە سەرنجش هوست سەرو هامڕایی بەینو قاسم ئەنگینی و شەڕڤانا و ۋاتش، "هامڕایی هەڤاڵ قاسمی چنی هەڤاڵا ژەنا فرە تایبەت بۍ. جە چوارچێوەو ئایدۊلۊجیکی و رێکوستەینە فرە ۋېش وەڵۍ وستەبۍ، رابەرایەتیش ۋەنەبېوە. وەرو ئانەی جە کەسایەتی رابەرایەتینە ۋېش بیاۋنۊ بە کەسایەتی پیای ئازاڎی، چنی ژەنا هامڕایەتی کەرۊ فرە حۊلشدا، زەحمەتشکېشت. لایەنی رۊحی و مەعنەویش فرە بەقوەت بۍ. چنی واڵېوەش دوانېبېنۍ، دلۍ خانەواڎەکەیشانە پەیوەنڎیش چنی واڵېش و ئەڎېش فرە بەقوەت بۍ. حەرپۊکەی مامەڵەش چنی هەڤاڵە ژەنەکا فرە سروشتی بۍ. بێگومان جە چوارچێوەو ئایدۊلۊجی و رێکوستەینە فرەتەرین هورسەنگنایش پۍ پەرسو ژەنۍ کەرۍ. وەرو ئانەی چنی هەڤاڵ قاسمی هەرمانەما کەرڎە و کۊشیایمۍ، فرە سەربەرزېنمۍ.
گەشمەرڎەبیەو هەڤاڵ قاسمی جە ژیایمانە فەراغۍ گۊرەش خوڵقنا. جە رووی جەستەییچۊ دوورکەوتەبۊوە ئێمە حەجگیز چنی ئا دوورکەوتەیۊ رانمەیمۍ. حەرکە پارتەکەما پەکەکە گۊرەبۊ، بەها و قوربانیدای ئاڎیچی پا ئەندازە گۊرە بۊ. گەشمەرڎەبیەو هەڤاڵ قاسمیچ پۍ ئێمە باج و قوربانیدای کۊشیاین. ناڕەحەتا پۍ ئێمە کە یاگۍ ئاڎی پەڕکەرمېوە. بەڵام پېسە هامڕایا هەڤاڵ قاسمی ئێمە جە گرڎ وەختۍ کۊشیاینە خۊتانکەرڎەی جە یاڎو ئاڎی مکەرمۍ. کەسایەتی ئاڎی پېسە مۆمۍ ئاینڎەما ڕۊشن کەرۊوە. جارێوەتەر بە شکۊوە یاڎو هەڤاڵ قاسمی کەرمېوە و بە رێزۊ جەسەو ۋېما وەردەمو یاڎو ئاڎینە منامنمېرە. ئی کۊشسە تا ئارڎەی دی ئامانجەکا گەشمەرڎاما وەەردەوام بۊ. جارێوەتەر جە کەسایەتی هەڤاڵ قاسمینە گرڎو گەشمەرڎا ئازاڎیی بەڕێزۊ ۋیرمارمېوە و یاڎشا کەرمېوە".
هـ . ش
