دەسەو ڕاوەبەری ئەنجوومەنو جوانا دەم پارتی، جە گلێرۆبییەکەینە دەربارەو داواکارییەکەو ڕابەر ئاپۆی داواش جە جوانا کەرد وەرپرسیاراتی هورگێرانە و دەورێ سەرمەشق گێڵنانە و واتش، پەی وەڵکەوتەو پرۆسەکەی مشۆم ڕابەر ئاپۆ ئازاد کریۆنە.
دەسەو ڕاوەبەری ئەنجوومەنو جوانا دەم پارتی، ئەنجام نامەو گلێرۆبییەکەیش ئاشکرا کەرد کە دماو داواکارییکەو ڕابەر ئاپۆی ئەنجام دریا. ئاماژە پانەیە کریان وەڵێ گلێرۆبییەکەی، چنی هامسەرۆکا گرڏی دەم پارتی و ئەنداما شاندو ئیمراڵی، تولای حاتەم ئۆغۆللارە و تونجەر باقرخان گلێرێ بیێنێ و گفتوگۆشا کەردەن.
دەسەو ڕاوەبەری ئەنجوومەنو جوانا دەم پارتی جەختش وست سەرو داواکارییەکەو ڕابەر ئاپۆی، جەخت مکەرۆنە چی قۆناغەنە داواکارییەکەو ڕابەر ئاپۆی گرنگییێ ژیوایش هەن.
هەرپاسە ئاماژە پانەیە کریان، پارادایمو دۆڵەت_نەتەوەی دماو کاریگەرییە نەرێنییەکاش (کۆمکوژی و نکۆڵی کلتووری و هورشێونایۆ کۆمەڵایەتی) جە وەرکەوتوو دلێڕاسەی و تورکیانە، جە سەدەو ٢١نە شکستش ئاردە و جە هەرمانێ نەکەوتەن.
هەرپاسە جەخت مکەرۆوە، هەوڵەکێ ڕابەر ئاپۆی پەی ئاشتی، جەلایەن دەسەڵاتیۆ بەخراپی قۆسریانۆ و بە پیلانگێڵی خواب دریانۆ.
هەرپاسە واوەی کریانۆ، ئەر ناوەڕۆکو داواکارییەکەی جابەجێ نەکریۆنە و هامپەیمانی کورد_تورکی و ژیوای هامبەش پێک نێ، هێزەکا سەرمایەی بە ویستو وێسا هەرێمەکەی مچاراوە، واتس: "ئێمەی جوانا پێسەو هێزو سەرمەشقو گلێرگەی دیموکراتیکی، مشۆم سەرمەشقایەتی ئی پرۆسە تازەیەو فارییای کۆمەڵایەتی بکەرمێنە و دەوری کاریگەر گێڵنمێنە و گەلی بەشداری پرۆسەو دیموکراتیکی کەرمێنە. مشۆم وەرپرسیارێتی وێما جە بوارەکا پەروەردەی و ڕێکوستەی و کلتوور و هونەری و وەرزش و کۆمۆن و ئەنجوومەنەکا جابەجێ کەرمێنە. پەی ئانەی پرۆسەکە سەرکۆتە بۆنە، مشۆم هەلومەرجو ئێژا ئۆجالانی خاستەر کریۆنە کە ملیۆنان مرۆڤێ بە ڕابەرو وێشا مزاناش. تا ئینە نەکریۆنە، پرۆسەکە ڕوانگەو متمانەی و پراکتیکینە لاواز مەنۆوە".
