هامکات چنی بەردەوامی هەڕەشەکا ئیسرائیلی پەی هرووژمکەردەی سەرو ئێرانی، شالیارو جبەرو حکومەتو ئێرانی عەباس عێراقچی ئەرەیاۋناش، وڵاتە هەمسێکێما ڕانمەڎا 'خاک و کایەی ئاسمانیشا' پەی ئا مەبەسیە بەکاربێنە.
دماو هرووژمە موشەکیەکەو ١و ئۆکتۆبەرو ئێرانی پەی سەرو ئیسرائیلی، مشتومڕەکۍ سەرو جوابدایۆ تەلئەبیبی جە دژو تارانی بەردەوامێنۍ و جە ڕوانی ۋییەرڎەنە گریمانەکۍ نزیکبیەیۆ وادەو هرووژمەکەو ئیسرائیلی قەوەتتەرۍ بیێنۍ. شالیارو جبەرو ئێرانیچ سەرو ئا مژاریە قسێش کەردۍ.
عەباس عێراقچی کوەیتەنە کۆنفڕانسێوە رۆنامەوانیش سازکەردو واتش، "گرڎو وڵاتە هەمسایەکاما دڵنیایشا دان چانەی ڕا نمەڎا خاکەکەشا یاخود کایەی ئاسمانیشا جە دژو کۆماری ئیسلامی بەکار بێنە".
