کەشتی هامپەیمانی فیلۆی ئازادی (Freedom Flotilla Coaliton-FFC) کە گەرەکش بۍ هامکاری بیاونۆ غەززە کە ئینا چېرو هرووژم و تەوقدای ئیسرائیلینە، هېزی (٩و حوزەیرانی) جە لایەنو ئیسرائیلیوە دەسش سەرەرە گیریا و ١٢ چالاکۍ دەسبەسەرۍ کریۍ. دماتەر کەشتیی مادلینی جە لایەنو کەشتییە جەنگییەکا ئیسرائیلیوە بریا بەندەرو ئاشدۆدی ئیسرائیلی.

وەزارەتو جبەرو ئیسرائیلی سەرو پلاتفۆرمو ئێکسی (X) ئەرەیاۋنێوەش وەڵا کەردۆ و ئەرەیاۋناش، چالاکا کەشتییەکەیش پېسە 'کەشتی سەلفی' پێناسە کەردۍ، بە مەبەسو گێڵنایشاوە پەی وڵاتەکاشا بریۍ فڕگەخانەو بن گوریۆنی. جە ئەرەیاۋناکەینە ئامان، "تەسەور مەکریۆ جە ماوەو چن سەعاتێنە بەشێوە جە سەرنشینەکا بلا. ئانۍ ڕەڎش مەکەراوە ئیمزا سەرو بەڵگەنامەو دیپۆرتکەردەیۊیشا بکەرا و ئیسرائیلی جیابازا، بەپاو یاساکا ئیسرائیلی وزیا ۋەردەمو دەسەڵاتی دادوەری پەی دیپۆرتکەردەیۆ. جە فڕگەخانەنە جە لایەنو کونسوڵو وڵاتاوە سەرنشینا پێشوازیشا ۋنەکریا."