سیاسەتەمەدار هۆشیار ئۆزسۆی ئاماژەش پانەیەدا پەکەکە پی قەرارەو ئی دماییە جە پرۆسەو چارەسەری دەسو ڕابەرەکەیش بەهێزتەر کەردەن و واتش: "پەکەکە بە خاوەنداریکەردەی جە ڕابەرەکەیش فیداکاریێ گۆرەتەر مکەرۆ و دەسو ڕابەرەکەیش جە گفتوگۆ و پرۆسەکەینە بەهێز مکەرۆ."
پەڕلەمانتارو وەڵینو هەدەکەی هۆشیار ئۆسزای پێوەس بە پرۆسەکەی پەی ئاژانسیما قسێش کەردێ و ئاماژەش پانەیەدا قەرارەکەو پەکەکەی دەستپێکێوە تازەن و سەرو ئی بنەمێ ئەوەکۆشای سیاسی کوردی بەهێزتەر بۆنە.
ئۆسزای جە دەسپێکو قسەکاشەنە یاڏو سری سورەیا ئۆندەریش کەردۆ و دەستنیشانش کەرد بییەن بە سیمبوڵو ئاشتی، ئۆسزای هورسەنگنایش پەی پرۆسەکەکەی کەرد کە بە پەیامەکەو ڕابەر ئاپۆی دەسش پنەکەردەن و واتش: "بەروارد بە دۆخو ئێژا ئۆجالان یو وە ئا سیاسەتە فشارکەرەییە و هێڵەو باخچەلی-ئەردۆغان، ئا رووەدایا جە ئیسەنە ڕووەمڏا یاگێ هیواینێ. چونکە دەرفەتو ئاشتی سەر جەنۆ ڕەخسیان و بڕێ دەرفەتێ کریێنێ، بەڵام هەڵای تەرسی و نیگەرانی ئینا ئارانە.
دەستپێکو قۆناغێوە تازەین
ئۆزسۆی دەستنیشانش کەرد پەکەکە بە خاوەنداریکەردەی جە ڕابەر ئاپۆی، بەدڵنیاییۆ دەسو ڕابەر ئاپۆییش سەرو مێزەو دانوستانی بەهێزتەر کەردەن و واتش: "ڕەنگە ئینە دماین فیداکاریی پەکەکەی بۆنە. ڕێکوزتێوە چەکداری کە زیاتەر جە ٥٠ ساڵێن بەردەواما یاوا بەئاستێ کە دمای بەوێش بارۆنە، بەڵام ئینە دمای نییا بەڵکوم دەسپکێو قۆناغێوە تازەین. ئیرادەو سەرجەنۆ ڕێکوزتەی ئەوەکۆشای کوردین جە تورکیا و کوردەسانەنە."
ئۆزسۆی ئاماژەش بەگرنگی پرۆسەکەکەی کەرد و هیواش وازت بۆنە سەرەتایێ کە کورد بە ئازادانە پەرسەو کوردی هورسەنگنانە و یاوانە چارەسەر. بێگومان پەرسێوە گۆرێنە و واتش: "بێگومان کورد هەوڵمڏۆ زوان و دەرفەتو چارەسەری ئی پەرسا جە چوارچێوەو ئازادی و دیموکراسینە بارانە ئاراوە."
