سەرۆکو گرڏی پارتو جمییەرەو کار (ئەهەپە) هاکان ئۆزتورک دەربارەو داواکاریی "ئاشتی و گلێرگەی دیموکراتیک"ـی ڕابەر ئاپۆ پەی ئاژانسو هەواڵو فوراتی (ANF) قسێش کەردێ و واتش: "داواکارییەکەو ئۆجالانی، داواکاریێن پەی چەک نییارەی و بەدیئاردەو ئاشتی و گلێرگەی دیموکراتیکی و سیاسەت. دماو ڕووەدایە تاریخییەکا و ڕووەدایەکا ئی دماییە، پەنەوازی کەرێ داواکاریێ چانە کریێ". ئۆزتورک واوەیش کەردۆ، مشۆم ئێمە بە ئەرێنی وینمێش، جە بابەتو پرسو کوردینە فشار و کۆدەنگی هەن، ئی فشارە بەهێزا و پەشتی بە حەقیقەتی بەسۆنە و ڕەوان.

ئۆزتورک جەختش وست سەرو "پرۆسەو چارەسەر"ـی وەڵینی و ئەرەیاوناش تەنیا مدرناو ونمتەی ڕەنگە پێسەو ڕەوشێ ئەرێنی وینریۆنە، جە ژینگەو پرۆسەینە بڕێ دەسکەوتێ پەیوەس بە بەکارئاردە و زوانی کوردی بەدەس ئاما، مڏرامانی گەزی بێ، هەدەپە ١٣٪ دەنگەکێش بەدەسئاردێ، ئیتر ئاکەپە نەتاواش بەتەنیا حکومەت پێک بارۆنە، هەرپاسە واتش: "پرۆسەی تازە ئەنجامێوە چی جۆرەش بۆنە. فشار پەی داواکەردە و دیموکراسی، جە فشارە ڕاگیرییەکا بەهێزتەرا".

ئامادەکەردەو گلێرگەو تورکی پەی ئاشتی

ئۆزتورک ئەرەیاوناش گەلوو تورکی متاوۆنە پەی پرۆسەو ئاشتی ئامادە بۆنە، دەیان ساڵێن پرۆپاگەندەو شۆڤێنی کریۆنە پۆکەی هەرمانەکێ ئاسانێ مەبانە، بەڵام هەمیشە ئەوەکۆشای واڵە و برایەتی بەهێز بییەن، ئی ئەوەکۆشایە جە ئیسەنە دەرفەتێوە گۆرە بەدەس مارۆنە، واتش: "گلێرگە دەسکەوتی فرێش کۆکەردێوە، پی ئەزموونا تاوۆنە وەرچەم ڕۆشن بۆنە. واتش: "دەسپێکێوە خاسش هەن، زوان و هەڵسوکەوتەکێ بەرەو دیموکراسی و ئازادی فاڕیا. ئینەیچ فرە بە خێرایی ڕووەمڏۆنە. هەمیشە دەسپێک قورسترین هەنگامەنە. جە سنوقە وزیارەکە ڕۆشنای بەرکەوت. بە کاریگەریی هەنگامە سەرەتاییەکا تاومێنە پەیوەندیێ دلێ ئامانج و مەرجەکا دیموکراسینە وەش کەرمێنە، پینەی هەرمانەکێ فاڕیا پەی هەنگامێ سیاسیێ".

سۆسیالیستەکێش پەی ئی پرۆسەیە ئامادێ نییەنێ

ئۆزتورک ئەرەیاوناش پارتە سۆسیالسیتەکێ تورکیای پەی ئی پرۆسەیە ئامادێ نییەنێ، بەڵام تاومه ئامادێشا بکەرمێنە، واتش: "ئەرکو ڕۆشنکەردەیۆ پرسو کوردی و واڵە و برایەتی و ئاشتی، بەردەوام جە ئەستۆو سۆسیالیستە کوردەکا بییەن. پەنەوازا جگە جە سۆسیالیستە کوردەکا، ئەوێ تەرێچ ئی ئەرکەیە گێرانە ئەستۆ. پەی نموونەی، باسکەردەی جە پرسو کوردی و ئاشتی و واڵە و برایەتی نموونێوە خاس بێ. پەنەوازا سەرو ئی بناغەیە هەنگامە بنیا. دماتەر پەنەوازا ئینە پەی تەمامو گلێرگەی ڕۆشن کریۆوە. هەرمانەو سەرەتاو سۆسیالیستەکا ئانەن، بڕوا بینەیە بارانە ئی پرسە کریۆ چارەسەر کریۆنە"