ئەنجومەنوو فەرهەنگی – ئەدەبی ڕۆجیاری بۆنەو ٢وو سیاوکامی ڕۆجەهانی زوانی ئەدٚاییۆ پەیامێوەش وەڵاکەردۆ کە چنەشەنە ئامان،'' گرد تاکێ مافوو ئێنسانی و مرۆیی وێشا بە زوانوو ئەدٚایی وێش وانگانە وانۆ، میدیاش بۆ و قسێ کەرۆ. ئینە سەرەتاییتەرین مافوو ئێنسانەکان''.
چا وەختەوە زوان پێسە ئەشناسەو خەڵک و نەتەوەیە دریا قەڵەم، تاکە ویر بەرزەکێ گلێرگای هێمەتشا فاڕاوە پەی ماندگاری زوانوو ئەدٚایی و بڕیارشا دا بە پشتیوانی گەلی و خەڵکی ئی ئەرکە پیرۆزەیە یاونا بە مەخسەد.
یاگێ شانازینە ئارۆ بۆنەو چەم و ویر کریاوەیی جە دنیانە چەمکوو زوانی پێسە داغتەرین و وەرچەمتەرین ئێلمان ئەژمارە کریۆ و گەل و نەتەوە وێشا تەیار و ئامادٚە کەردٚەن چی بارەوە بە دڵ و گیان هەزینە و مانیایی وزا سەروو شانەیشا، نازا هازەو زوانیشا کزە و لاوازە بۆ.
پەرمای بە وێ، قەڵاو پشتیوانی نەتەوەی وزەش جە ئا بانگەوازە زانستی و عێلمیە گێرتەن: زاڕۆڵە ئەگەر بە زوانوو ئەدٚایی وێش جە وانگانە وانە نەوانۆ، پەی هەمیشەی ڕۆح و زەینش کاڵ و سیس و ناپۆختە مەنۆوە. هەست بە کزی و لاوازی کەرۆ.
هەڵمەتەو دێفاع و سەرەمڕەیی داواکاری گەلە ماف وریاکا جە باری زوانیەوە، پاڵپشتی زوان شناساشا کەردٚێنە نوونگە و عەلەمەو داخوازیشا ئانەن گرد تاکێ مافوو ئێنسانی و مرۆیی وێشا بە زوانوو ئەدٚایی وێش وانگانە وانۆ، میدیاش بۆ و قسێ کەرۆ. ئینە سەرەتاییتەرین مافوو و حەقوو ئێنسانەکان.
وەڵاتە وەڵکەوتەکانە کێشەو چند زوانیشا چارەسەر کەردٚەن و تاوانشا ئا تاپۆ و وەرپەنگا لابەرا. گردٚ کەس ئازادانە بە زوانی ئەدٚایی وێش قسێ کەرۆ و... بێ دەردیسەر بۆنەو ئەقڵیەتی کریاوەی و فەزاو دیموکراسینە، درێژە بە ژیوایش مدۆ.
یاگێ داخێنە هێشتەر لاو ئێمە دەس بەردٚەی پەی قەڵاو زوانی ئەدٚایی لاو ئەقڵیەت و ئاوەزی دوگمەوە بڤە دریۆ قەڵەم.
حەنناو بانگەوازی و نویستەی و قسە کەردٚەی و پەرەدای بە زوانوو هەورامی و... وشەو ناڕیک و سەقەتوو ناوچەگەرایی و خێڵەکی و عەشیرە گەرایی زۆڵمێ ناڕێک و نا‌ڕەوا پەیما تاشیان .
ئێمە پێسە کوردێ ڕاستەقینەی، کوردەسانی پێسە وێش وینمێ و باوەڕما پاسەن کوردەواری چند پازێڵێ ڕەنگاوڕەنگا و مشۆم ئی ئەمرەو واقێعیە لاماوە پەسەند و یاگێ باوەڕی بۆ. ئی ڕەنگاڵەیە بە فرسەت زانمێ، بوەو هەڕەشا جە دماخیما دوور وزمێوە. گۆزار جە دەورانوو نەریتی و قەبوڵوو عەقڵیەتی سەردەمی خاڵێ ئەرینێ و پۆزیتیڤە لەیکدەیمێوە.
ئەنجومەنوو ڕۆجیاری پێسە مەکۆیە فەرهەنگی هەورامانی ئەوپەڕوو سەحیە و تەلاش کەرۆ پەی ترۆقی و گەشەدای بە فەرهەنگ و ئەدەبیاتوو هەورامانی. حیچ وەخت حەز و باوەڕما بە جیاوازی و پەرتەوازی و قڵیشیای زوانی و نەتەوەی، وەش کەردٚەی گولانەتەرین ئاژاوێ و هەزینەدای چی ڕاسەوە نیا.
بەرەو گوفتمان و باسی بە کریاوەیی مازمێوە و باوەڕمەندێنمی دیالۆگ بەرزتەرین و سادەتەرین ڕاو پێوەرەیی، شێوەو ئەندێشەی و ویرین.
فەخر و شانازین تاومێ چی وەزعە گێچەڵاویەنە ئەرکوو پارێزنای و پەرەدای بە کولتوور و فەرهەنگوو هەورامانی بەرمێ ڕاوە.
گەشاوە و بەرز بۆ ئاڵاو لایەنگیری جە زوانوو ئەدٚایی.
