ژەنە زینانییەو سیاسیەو کوردی جە دژو سزاو جە قەنارەدای سەرو هەردووی ژەنە چالاکێ وەریشە مورادیە و پەخشان عەزیزیە نامێوەش وەڵا کەردۆ و واتش: " سزاو جە قەنارەدای کە باڵش سەرو وڵاتەکەیمارە کێشان شەرمەزار مکەرو."
زەینەب جەلالیانە زینانیەو سیاسیی کوردی جە زینانو یەزدی دژو پەسەن کەردەو سزاو جەقەنارەدای پەخشان عەزیزیێ و وریشە مورادیێ نامێوەش وەڵا کەردۆ، جە نامەکەنە سەرەڕاو شەرمەزارکەردەی سەپناو سزاو جە قەنارەدای سەرو هەردووی ژەنە چالاکوانێ، داواش جە ژەنا ئازادیوازا جەهانی و ڕێکوزیێ مییاننەتەوەییەکا مافەکا مرۆڤی کەردەن جە دژو سزاو جە قەنارەدای مرداوە کە جە لایەنو دۆڵەتو ئێرانیۆ سەپنریۆنە.
دەقو نامەکەو زەینەب جەلالیانێ پی جۆرەن:
"چنین تاوان وەشەویسی ئەڏایانەو، وەشەویسی تاتەیانە، و وەشەویسی پەی مرۆڤو وێتا پشگۆش وستێ؟، پەی چ ئیسفادێوە؟ ویژدان و مرۆڤایەتیتا بە چێش ورەت؟ بە چ نرخێوە مافو ئاڏشا پەی ژیوا و هەناسەدای ئاڵوگۆڕ کەرد؟، بە چ نرخێوە ئی گرڏو وەرماتا وێران مکەردێ؟ چنین متاودێنە بە ئاسانی جوانێ نیشتیمانەکەیتا کەردێنە قوربانی؟ وێ پەرستەی شمە یاوان ئا ڕادە کە تاکە چێوێ کە شمە ڕازی مکەرۆ حوکمو جەقەنارەدای کەسا تەرین.
شمە کە دەسێتا بە ونەو کەسا تەری لەکەدارەنە، مزاندێ کە هیچ کەسێ و تەنانەت شمەیچ، شایستەو ئانەی نیەندێ مافو ژیوای جە مرۆڤی ساندێوە. چنین تاواتا سزاو جەقەنارەدای پەی پەخشان عەزیزیێ و وریشە مورادیێ و براکاما بەر کەردێ کاتێ قەڵەمەکێتا هورگێرتێ؟ ئایا ژیواو مرۆڤی ئنە بێ بەها بێ پەی شمە؟ بە چ خەڵەتێ ؟ پەی چ گوناهێوە؟ سەرو بنەماو چ مافێوە مرۆڤی؟
چێش شمەش ئاردیدێ دلێ ئی دۆڵە تاریکەیە؟ داواو ویەردەی مکەرو جەنەتا، پەی ئانەی کە گرڏ بنەماکا مرۆڤایەتیتا پاشێل کەردێنێ و گرڏو سردەکا دمایتا وێران کەردێنێ. ئەی ئەشکەنجەدەرێ و دادوەرا نادادپەروەری!
سەرەڕاو ئا گرڏ ستەمەی کە چەنەتا کەردیمێ، زاندی من داواو تۆڵە مەکەرووە. من جە مافو وێم وەشەبییەنا و چەنەتا وەشەبونو. ئینە جیاوازی بەینو من و تۆ یان شمە.
وریشە گیان و پەخشان گیان دڵتەنگەنا…
خەمبارەنا کاتێ پنەم ماچانە هیزی قەڵەمێوەت هورگێرت و دژو جەقەنارەدای من و هەمڕێکام نووستت، بەڵام ئارۆ وێت حوکمو جەقەنارەدایت سەرەرە سەپیان. ویرو شارێوە مکەرو کە پاداشتو مرۆڤایەتی یان شەرمەزاریی یان مەردەی بە قەرارو فەرمانڕەواکان.
ویرو خاکێ مکەرو کە خەڵکەکەش جە مافو ئازادی و ویرکەردەیۆ و مافو ژیوای بێبەش مکەرۆ. من دڵتەنگە بونە کاتێ دێر تەلەفۆن پەی ئەڏاما مکەرمێ و ئاڏێ بە ناباوەریی پەرسانە، “ڕۆلە، ئایا تو؟” چونکە سێبەرەو شومەو جەقەنارەدای سێبەرەش سەرو شار و وڵاتەکەیما کێشێنە.
من بە دڵۆ سزاو جەقەنارەدای مەحکوم مکەرو. داوا جە گرڏو ژەنا جەهانی و ئازادیوازا جەهانی و ڕێکوزیاکا مافو مرۆڤی و هەر کەسێ مکەرو کە خە تواناشەنە بۆنە پشتگیری نەکەرا پەی حوکمو جەقەنارەدای. جە وەراوەرو حوکمو جەقەنارەدای براکاتا بێدەنگێ مەبیدێ."
