عەزیزیە و مورادیە بەمەڵامەتوو چالاکییەکا دلۍ زینانی سزای تازێشا سەرەرە سەپیا
بە تۆمەتو "تێکدای دیسپلینو دلۍ زینانی"، هەریۆ جە پەخشان عەزیزیۍ ۋەرگریکارەو مافەکا ژەنا و وەریشە مورادیۍ ئەندامەو کەژاری سزاو شش مانگا زینانیشا سەرەرە سەپیا.
بەپاو هەواڵێوە تۆڕەو مافەکا مرۆڤو کورڎەسانی ئەرەنیشتەی تایبەت پا دۆسیەیە جە لقو دووۍ دادگاو سزادای جەمەو دادوەری قودسو تارانی لواڕاوە رۆو شەممەی ١٩و ئۆکتۆبەری قەرارەکەشا پنە وچیان.
ئا دووە ژەنە زینانیە سیاسیە کوردۍ ئاماڎۍ ئا ئەرەنیشتەو دادگایە نەبێنۍ و جە قەرارەکەنە ئامان بەمەڵامەتوو "تێکدای دیسپلینی و نەزمو زینان"ی هەر یۆشا سزاو شش مانگا زینانیشا سەرەرە سەپیان.
ئا دۆسیە تازە دماو ناڕەزایی زینانیا سیاسی بەشو زینانو ئێڤینی ۋەرا ۋەر بە جە قەنارەدای رەزا رەسایی زینانی سیاسی کوردی کریابێوە.
وەریشە مورادیە ئەندامو گلېرگەو ژەنا ئازادی ۋەرکۆتوو کورڎەسانی (کەژار) کە زیاڎ جە ساڵێوەن ئینا زینانەنە، تۆمەتەو بەغی یاخود یاخیبیەیش ئاراسە کریان و جە ١٠و ئۆکتۆبەرو ئێساڵیوە هامکات چنی رۆو جەهانی ۋەرەنگاربیەیۆ سزاو جە قەنارەدای، دەسش بە مانگێرتەی جە واردەی کەردەن.
تا ئیساتۍ دووۍ ئەرەنیشتۍ دۆسیەکەی جە لقو ١٥و دادگاو شۆڕشو ئیسلامی تارانی بە سەرۆکایەتی دادوەر سەڵەواتی لوانڕاوە.
هەرچی پەخشان عزیزیە توێژەرەو کۆمەڵایەتی و چالاکا مافەکا ژەنایچەنە، دماو زیاتەر جە ساڵێوە مەنەیۆ جە زینانەنە جە ٢٣ۍ تەمووزو ئێساڵینە بە تۆمەتەو "یاخیبیەی" و "ئەندامبیەی جە گروپە ۋەرهەڵسکارەکا" سزاو جە قەنارەدای و ٤ ساڵا زینانیش سەرەرە سەپیابۍ.
