جە هەورامان سیاسەتو دارایی ئێرانی پیشەو کڵاش-یش وێران کەردەن

جە هەورامان سیاسەتو دارایی بانکی ناوەندی ئێرانی پیشەو کڵاش-یش وێران کەردەن و کیاستەی کڵاشیش پەی پانیشت (باشور)و کوردستانی مانگانە جە ٥٠ تا ٦٠ هەزار هیتێوە پەی ٢٠ هیتان نزیک کەردەنەوە.

سیاسەتو دارایی بانکی ناوەندی ئێرانی پیشەو کڵاش-یش وێران کەردەن و کیاستەی کڵایش پەی بەروو هەورامانی جە سفری نزیک کەردەنەوە.
سەرچەمەکێ هەواڵی جە بازارچەو شۆشمێ سەر بە شارستانو پاوەی ئاشکراشان کەردەن: "وەڵتەر ڕوانە ٢ هەزار هیتێ کڵاشێ تەنها جە مەرزو شۆشمێ/تەوێڵێ ڕوانێ پانیشت (باشور)و کوردستانێ کریێنێ، یانی تەنها جە ئا مەرزەوە مانگانە ٥٠ تا ٦٠ هەزاڕ کڵاشێ ورەشیێنێ. بەڵام جە دمایی سیاسەتو دارایی کە بانکی ناوەندی ئێرانی سەپان، ئانە زیاتەر جە ٤ مانگێن، مانگانە تەنها ٢٠ هیتێ کڵاشێ کیانیێنێ باشور.
بە ئی جۆرە، هەزاران خانەوادێ هەورامیێ کە پیشەشان (پێکەنەگێرتەی، چێرە دروستکەردەی-پەرگەمانیای، کاڵاش چنیەی، ئەسای و ورەتەی کڵاشی)یەن و بژێوی ژیوایشان پنەش دابین مەکەرانێ، سەرچەمەی دارایشان کەوتەن مەتەرسی.
هامکات بەگردی پیشە و پیشەوەری کڵاشیش وستەن مەتەرسی و فرەکەسێ وازشان چەنە ئاوردەن و مەتەرسی هەن ئەگەر بارودۆخەکە بە ئی جۆرە بەردەوام ببۆنە، زیانی فرەتەرش شنیەرە بەیۆنە.

 بە پاو زیانیاری بەدەستوزیای، جە سەرجەم بەشەکێ هەورامانیەنە ساڵانە زیاتەر جە نیم ملیۆن هیتێ کڵاشێ دروستێ مەکریانێ و ڕەوانێ بازارەکێ، کوردستان، ئێران، ئێراق و چەند وڵاتێ تەرێ جیهانی مەکریانێ.