جە هەورامان کۆرۆنا زیاتەر تەشەنەش کەردەن

جە چوار شارێ هەورامانی (پاوە، جوانڕۆ، ڕەوانسەر و سەلاس) کۆرۆنا زیاتەر وەڵاو بیەنەوە و ئامارە نافەرمیەکێ باس جە تووشبیەی هەزاران کەسان مەکەرانێ.

جە شارەکێ (پاوە، جوانڕۆ، ڕەوانسەر و سەلاس)ی سەر بە هەرێمو هەوراماناتی جە دیمو وەرهۆرز (ڕۆژهەڵات)و کوردستان، بە هۆکارو کەمتەرخەمی دەسەڵاتی و خەڵکی و گۆشنەڎای بە ڕانمونیە تەندروستیەکان، ڕۆچ بە ڕۆچ پەتا و نەوەشی کرۆرۆنا ڤایرۆس-ی زیاتەر تەشەنەش کەردەن.
هەرمانگەکێ بهداشتی و تەندروستی جە هەرێمەکەنە وریایشان بە دەسەڵاتی و هاموڵاتیان دان تا ڕاکارێ وێپارێزنای جە ڤایرۆسەکەی بگێرانەوەر و ڕانمایە تەندروستیەکان ورچەم بگێرانێ، ئەگینا بارودۆخەکە زیاتەر ڕوو بە خراپ تەر بلۆنە و دەرەنجام پەتاکێ جە کۆنترۆڵ بەربشۆنە. 
بەپاو سەرچەمە فەرمیەکان، جە ئیسەنە زیاتەر جە هەزار کەسێ هۆرگێرێ کۆرۆنا ڤایرۆس-ی نەوەشخانەکانە چارەسەرێ مەکریانێ. بەڵام ئامارە نافەرمیەکێ باس جە تووشبەی هەزاران کەسان مەکەرانێ و ئاشکراشچ کریان کە، دەوڵەت هەوڵ پەی ئەوەشارای ژمارەو تووشبیەکان مڎۆنە.

بەپاو ئامارێوی کە چەنڎ ڕوێ ویەردێنە پەلیانەو هەورامان نیوزی وەڵاوش کەردەنەوە، نیشانەش مڎۆنە کە کۆرۆنا هەرێمەکەنە پەرەش ئەسانان و خەڵکێوی فرەتەر تووشش بییەن.
جە ئا بارەوە پەلیانەکە ئی ئامارەشە وستەن ڕووە کە کۆو ئا کەسانە کە هۆرگێرێ ڤایرۆسەکەیەنێ و جە ئیسەنە جە نەوەشخانەکانو شارەکێ (پاوە، جوانڕۆ، ڕەوانسەر و سەلاس)یەنە چارەسەرێ مەکریانێ.

جوانڕۆ: ٢٩٧ کەسێ
پاوە: ٥٣ کەسێ
ڕوانسەر: ٤٤ کەسێ
سەلاس و باوەجانی: ٢٩ کەسێ

هەر بە پاو ئامارەکەی بە کۆرۆنا ڤایرۆس ئی ژمارە جە تووشبیەکان گیانشان جەدەستدان:

جوانڕۆ: ٢١ کەس
پاوە: ١٠ کەس
ڕوانسەر: ٩ کەس
سەلاس: ٢ کەس