جە ڕێککەوتو ۲ تا ٦و سیاوکامەو ۱۳۹۷ی وەرتاۋی، جە هەورامانی تەخت، بە بۆنەو نزیک بییەی جە ساڵیادو کیمیاۋران-و هەڵەبجەی، پێسەو ڕێزگێرتەی جە ٥ هەزار شەهیدەکێ کیمیاۋارانەکەی، بە مەراسیمێ جەماوەری ٥ هەزار نەمامێ دار ئەرغەوانی نریێ.

نەمام نیاکەی بە سەرپەرشتی هەر دۋێ ئەنجومەنێ ژیۋگەپارێزنای (گەڵا و تریفە)و هەورامانی ئەنجامێ دریێنێ و ژمارێۋی فرێ جە ئەندامێ دۋە ئەنجومەنەکەی و خەڵکی شارو هەورامان-و تەختی و دەگایەکێ دەوروبەریش بەشدارێش بیێنێ. نەمامە دار ئەرخەوانەکێ بە درێژایی ڕاو هەورامانی تەختی، مەزار و بارەگاو پیرشالیاری، دەگاکێ بڵبەری، سلێنە و ژیۋاری بە درێژایی ۱٥ کیلۆمەتران نریێنێ.