جە پاۋە شارو هەورامانی، بە سەرپەرشتی ئەنجومەنو شنەو فەرهەنگو هەورامانی و بە هەمکاری ئیدارەو فەرهەنگ و ڕانمونی شارستانو پاۋەی، یەرەمین جەژنەوارەو شیٛعرو زاڕوٙڵان-و هەورامانی بەشێوازێ سەرکەوتە ساز کریا. 

جە جەژنەوارەکەنە، کە جە هاڵ-و ئیدارەو فەرهەنگ و ڕانمونی پاوەی بریاڕاۋە، باخچێ زاروڵانی چوون: “باران، پەرنیان، کەوسەر، (ۋلەکێ ژیۋای، گوٙلهای زندگی)، ئارون، باخچەو گوڵان ،شنیان و  ئەنجومەنو نماییشی (ئەرمانای)” بەشدارێ بیێ و چنڎین چالاکیێ هونەریێ و ئەدەبیێ جۆراوجۆرێ ڕەنگینێ و زەریفێ-شان ئەرمانێ و جەژەنەوارەکەشان ڕازنا و ۋناراۋە.

یەرەمین جەژنەوارەو شیٛعرو زاڕوٙڵان-و هەورامانی، کە بە بەشداربییەی سەڎان زاروڵان و جەماوەری فرەی بریاڕاۋە، بی بە یاگێ ڕەزامەندی و دڵوەشی زارۆڵان بە تایبەتی و خەڵکی بە گردیی و ئومێڎواری نیشانە دریا تا بە ساڵێ ئایندەیەنە جەژنەوارەکە بەردەوام ببۆنە و زیاتەر پەرەش بدریۆنە و زارۆڵێ سەرجەم "شارێ و شارچێ و دەگایەکێ" هەورامانی بەشدارێش ببانە.

جە کۆتایی جەژنەوارەکەیەنە، ڕێز جە کار و هەرمانە هونەری و ئەدەبییەکان زارۆڵەکان نریا و فرە ستاییش کرێ و هیواو بەردەۋامی و سەرکەوتەیشان پەی وازیان.