جە مەخوور، کەرکوک، حەویجە، خورماتو، داقوق، کفری، کوڵەجۆ، قەرەتەپە، جەلەولا، خانەقین و دەوروبەرو مەندەلی و بە درێژایی زنجیرە گردۆڵەکانو حەمرین-ی تاقمە چەتەکێ داعشی جارێوتەر بوژیێنێوە و  کەردێ تەرۆرستیێ ئەنجامێ مەڎانێ، کەمینێ منیانەوە و خەڵکی مەڕفانانێ.

دمابەدامای ئانەیە کە جە چەنڎ ڕوێ ویەردێنە چەتەکێ داعشی هێرشان کەرد سەرو کامپو پەنابەرانو شەهید ڕۆستەم جوودی مەخموور-ی و جەلاو پارێزوانەکانو کەمپەکەیەوە شکست دریێ، شەوێ ویەردێ جە قەرەتەپە ـ کفری چەتەکێ بۆسەشان نیانەوە و دوێ ماشینێ مەدەنیێ بەچەنڎین سەرنشیێنوە ئەڕفانێنێ.
سەرچەمەکێ هەواڵی جە ناوچەکەوە ئاشکراش کەردەن: "سەرسەبای ئارۆی تەمرێ دوێ جە هاموڵاتیە ئەڕفانیایەکان ئێزیێنێوە و بریێنێ نەوەشخانەو قەرەتپەی".
هەمان سەرچەمێ باسشان جە ئانەیە کەردەن؛ "هاموڵاتیە ئەڕفانیەکێ ٦ کەسێ بیێنێ کە ۲ێشان ئەرەنیشتێ جەلەولا و ٤شان ئەرەنیشتێ خانەقین-یەنێ و تا بە ئیسە ٤شان چارەنویسشان نادیارەن".

سەرەڕاو ئانەیە کە ئێراق و ئەمەریکا بە ئەرەیاونای فەرمی ئاشکراشان کەردەبێ کە کۆتاییشان بە داعشی ئاوردەن، بەڵام تاقمە چەتەکێ داعشی جە مەخموور هەتا مەندەلی و بە درێژایی زنجیرە گردۆڵکەکێ حەمرین-ی بوژیێنێوە و دەستشان دان جموجوڵ و ئەنجامدای کەردێ تەرۆرستیێ، کەمینێ منیانەوە و خەڵکی مەڕفانانێ و ئاساییش و ئەمنیەتو هاموڵاتیانیشان وستەن مەتەرسیەوە.
جە وەرانوەرەنە هێزە ئێراقیەکێ کە باڵادەستێنێ جە ئا ناوچانە هیچشان جە بارەنە نییەن و توانایی پارێزنای خەڵکیشان نییەن و تەنانەت فرە جارێ بەشێشان بە هامکاریکەردەی داعشی تۆمەتبارێ مەکریانێ.

شارەزێ بوارەکەی و ئەرەنیشتێ ناوچەکەی هۆکارەکێ ئەوەژیویای داعشی پەی چەنڎ خاڵان مەگێڵنانێوە کە گرنگتەرینێشان ئینێنێ:

۱- هێزە ئێراقیە جیا جیاکێ هەماهەنگی جە میانشانە نییەن.

۲- هێزە ئێراقیە جیا جیاکێ جە ڕاستیەنە توانایی پارێزنای خەڵکیشان نییەن و ئەرەنیشتەکانشان و شارەزێ شارچە وناوچەکان نیەنێ و بێگانێنێ پنەشان.
۳ـ دمای بەحساب ئازادکەردەی ناوچەکەی جە داعشی بەشێوی فرێ جە چەکدارە ناوچەیەکێ داعشی دلێ هێزە چەکدارە جیا جیاکانو ئێراق-یەنە یاگێشان گێرتێنە و ڕۆنە چەکدارێ دەوڵەتیەنێ و شەوێنە چەتێ داعش-یەنێ.
٤- ئەوەکێشیای هێزەکێ پێشمەرگەی جە ئا شارچە و ناوچانە بۆشایی جددی ئەمنیشان دروست کەردەن و ئاستەمەن بۆشایەکە بەبێ پێشمەرگەی پەڕ بکریۆنەوە.
٥- بەعەرەبکەردەی و کۆچبەری کوردی جە ناوچەکانە زەمینەسازەن پەی زیاتەر دروست بییەی بۆشایی ئەمنی و تشەنەکەردەی داعشی.
٦- باس جە ئانەیە مەکریۆنە کە لایەن و کەسێ کوردیێ هەنێ ناڕاستە ڕاست هامکارێ و زەمینە وەشکەرێنێ پەی سەرهۆردای داعشی و تەشەنەکەردەیش.
۷- جە گردی گرنگتەر جموجوڵی گوماناوی ڕژێمە ئەرەگێر و دژە کوردەکەو تورکیایەن جە ناوچەکەنە و باس جە ئانەیە مەکریۆنە تورکیا بە هامکاری چەنڎ هێزێ و کەسایەتیێ ناوچەکەی ڕاستە ڕاستە هەوڵ پەی ئەوەژیونای و بەهێزکەردەی داعشی مەڎۆنە.
۸- نەبییەی پلان و بەرنامەی جەلاو دەسەڵاتداری هەرێمو کوردستانی پەی ناوچەکەی و بە تەمامی پەشتگۆش وستەیش.
۹- دەستنیشاننەکەردەی پارێزگاری پەی کەرکوکی کە جە پشکو کوردیەن و هۆکارو ئانەیە مەوزیۆنە ئەستۆو پارتو دیمۆکراتو کوردستانی کە هەر جارەو بەجۆرێ ئاستەنگیش پەی درۆست مەکەرۆنە.