سەرسەبای ئارۆ شەممەی، جە زیندانو شارو سەقز-و وەرهۆرز (ڕۆژهەڵات)و کوردستانی، کاربەدەستێ ڕژێمو ئێرانی موستەفا سەلیمی تەمەن ٥۳ ساڵان زیندانیی سیاسی کوردیشان جەدار دا.
سەلیمی ۱۷ ساڵێ زیندانیش کێشابێ و جە ۸و فەروەردینو ئێساڵی دمای ئانەیە جە زیندانو سەقز-یەنە بەندکریاکێ سەرهۆردایشان کەردەبێ چەنی ۸۰ بەندکریێ تەرێ زیندانەکەی وێشان دەرباز کەردەبێ.
موستەفا سەلیمی دمای وێ دەربازکەدەیش، وێش یاونابێ شارچەو پێنجوێنێ جە پانیشت (باشور)و کوردستانی و هێزە ئەمنیەکێ شارچەکەی دەستگیرشان کەردەبێ و دماتەر  تەسلیم بە ئێرانیشان کەردەبێوە، کە ئانێچە ناڕەزایەتی فرەش شۆنیەرە ئاومابێ.

موستەفا سەلیمی زیندانیی سیاسی ساڵەو ۱۳٤٦ی جەئەدێ بییەن و ساڵەو ۱۳۸۲ی بە هۆکاری سیاسی و بە تۆمەتێ چوون، دژبەری ڕژێمی و ئەندامێتی جە پارتێوی کوردی و بەشداری کەردەی چەکداری دەستگیر کریابێ و بە ۱٥ ساڵی زیندانی و جەداردای سزا دریا بێ. بەڵام سەلیمی سەرجەم تۆمەتەکێش ڕەتێ کەردێ بێنێوە و چەنڎین جارێ تانەش جە سزاکێش دابێ و واتەبێش: بێتاوانەن و بێبەریەن جە سەرجەم تۆمەتەکان و دادگایی کەردەیش و سزاکێش نادادگەرانێنێ بەنامێ کەردێ بێنێ.