وادەو دمای ئاردەی با ئەفغانیا کە مۆڵەتو مەنەیۆیشا نییا پەی ٦و تەمموزی دیاری کریا بێ، ڕێکوزیا و مییاننەتەوەیی کۆچی ڕۆو دووشەممەی، ڕوێ دما و ئا وادەیە، ئەرەیاوناش کە جە سەرەتاو مانگە و حوزەیرانیۆ نزیکەو ٤٥٠ هەزار ئەفغانیێ ئێرانشا جیا ئاستەن.

واتەواچوو ڕێکوزیاکەی بە ئاژانسو هەواڵو فرانسی پرێسی (AFP)ی ئەرەیاونا: “بەینو ١و حوزەیرانی تا ٥و تەممووزی، ٤٤٩ هەزارێ و ٢١٨ ئەفغانیێ خاکو ئێرانیشا جیائاستەن و گێڵێنێ پەی وڵاتەکەو وێشا."

وچیۆ جە ساڵەو ٢٠٢٥نە ئا ژمارەیەی کە گێڵینێ یاوان ٩٠٦ هەزارێ و ٣٢٦ کەسێ.

نەتەوە یۆگێرتەکێ ڕۆو یەکشەممەی بەیاننامێوەشا وەڵاکەردۆ و ئەرەیاونانشا جە دەروازە سنوورییەکا ئەفغانستانینە قەیرانی مرۆیی ڕووەشدێنە و ڕاوشۆنەی بەپەلەی گیریێنەرە وەر.

کۆچبەرێ ئەفغانستانی ماچانە، بەمەڵامەتو فشارەکا، دەس سەرەرەگێرتری و دیپۆرتکەردەیۆ ئێرانەنە، وڵاتەکەشا جیائاستەن و گێڵێنێ پەی ئەفغانستانی.

شایانە باسین دۆڵەتو ئێرانی، جە قەرارێنە کە دماییەکا مانگە و ئایارینە دابێش، ڕۆو ٦ تەممووزی پێسە و دما وادەی پەی دیپۆرتکەردەیۆ ٤ میلیۆن ئەفغانی کە بەشێوێ نایاسایی لوێنی دلێ ئێرانی، دیاری کەردەبێ.