کژار جە ئەرەیاۋنێوە نویسیانە هرووژمەکې دۆڵەتو ئێرانیش دژ بە ژەنا بەلوچی و دیپۆرتکەردەیۆ ژەنا ئەفغانی شەرمەزار کەرڎې و ئاماژەش پانەیە دا بە ئەوەکۊشای یۆگێرتەو ژەنا متاویۆ دمایی پی سیاسەتە دژەژەنا ئێرانی بێنە.
گلېرگەو ژەنا ئازادی ۋەرکۊتوو کوردەسانی (کژار) جە ئەرەیاۋنێوە نویسیانە هرووژمو هێزەکاو دۆڵەتو ئێرانیش پەی سەرو خەڵکی و ژەنا بەلوچی و بەرکەردەی کۆچبەرا ئەفغانی شەرمەزارکەردەن و سەرەڕاو بەرکەردەی ئانەی کە ۋەرەنگاربیەیۆ و سەرمەشقایەتی ژەنا بەمەبەسو بەدیئاوردەی ژیۋای ئازادی و دیموکراتیکی بە ئەرک و هەرمانەی یووەمې مزانۆ.
جە ئەرەیاۋناکەینە ئامان: "پەیلوایما چامنەن کە پرسو ئازادی ژەنا، پرسێوە مېیاننەتەوەیییا و جە ئاژێوە پا جۆرەنە یەکدەنگیی ژەنا جە وەرگریکەردەی جە یۆی متاوۆ ئاستو کۊششیما بەرز بکەرۆوە. هېزی کە ژەنی دەگاو گونیچی هرووژمشا کریا سەر، با بە یەکڕیزیی و یۆگێرتەیما، نازمې کۆمارو ئیسلامی سەوایې ۋناوی تەر بارۆنە ئاراوە."
جە بەردەوامی ئەرەیاۋناکەو کژارینە ئامان: " ڕۆو ١و تەممووزی هێزە ئەمنییەکې کۆمارو ئیسلامیی ئێرانی، جە مېیانەو هرووژمېوە سەروازیینە پەی سەرو دەگاو گونیچ-ی جە ناوچەو بەلوچستانی، هرووژمشا کەرڎ سەرو ژەنا دەگێکې، جە ئاکامو هرووژمەکەینە زیاتەر جە دەیان کەسا گیانشا جە دەسدا یاخوڎ زامڎارې بیې. فرە سەرو ئینەیرە نە وېیەرد کە لێشاوې گۊرەو بەرکەردەی پەنابەرا، کۆچبەرا و هاموڵاتییا ئەفغانی جە لایەنو کۆمارو ئیسلامییوە دەسشپنە کریا."
جە درێژەنە باس چانەی کریان، "بەگرڎیی ئەسۆ وچیۆ، باجو شکسەکا کە جە ئەنجامو جەنگی و سیاسەتە دلېینەیی و جبەریەکاوە ڕووە مڎا، گلېرگە مڎۊش. بەجۆرێوە کە جە درێژەو جەنگی ١٢ ڕووە و پاڵپەشتینەکەردەی گلېرگەی و خەڵکی جە لایەنە جەنکەری و پاوانوازەکا، تووڕەیی کۆمارو ئیسلامیش چنە کۆتۆ و ئی ڕژێمە بە پەست بینای بە سەرکوتکەردەی، جە قەنارەدای و باڵبەسکەردەی ۋەرفراوانی، هەوڵمڎۆ بەشێوە گۊرە جە شکسەکاش پەردەپۆش بکەرۆ."
هرووژمەکە و دۆڵەتی پەی درێژکەردەیۆ تەمەنیشا
ئاماژە پانەیچ کریان، "مەبۆنە ڕەهەندی تاریخی ئی هرووژما وەرچەم نەگێرۆ. هەرکات کۆماری ئیسلامی هەر یاگێنە تووشو تەنگانەی بێ، ئامڕازو سەرکوتکەردەی وزۆنە گەڕ و تنوتیژی ئەنجامرڏۆ و ئی ڕێکارێ هەڵای بەردەوامیش هەن. ئانەی کە چی ژەنی بەر جە هەر توێژێوە تەر هرووژمشا کریۆ سەر جەلایەنو ڕژێمیۆ، جەماوەو چن ساڵی ویەردەینە و بەتایبەت دماو شۆڕشو 'ژەنێ، ژیوای، ئازادی' ڕۆشن بییەینۆ. پەیامو ڕۆشن و ئاشکراو ژەنا و ئامادەیی دیارشا سەرو جادەی تا زینان جە شۆڕشو 'ژەنه، ژیوای، ئازادی'ـدا نیشانێ بۆشاییێ قووڵ و دووریێ فرە بەینو کۆمارو ئیسلامی و گلێرگەی، بەتایبەت ژەنی بێ."
جە درێژەنە ئاماژە بە هەڵوێسو دژەژەنی دۆڵەتو ئێرانی سەر و ژەنا هەرێمەکەی کریان و ئامان: "حەر چنین تێڕوانینو ئەمنییەتو ڕژێمی پەی ژەنا جە کەسی شاراوە نییا، بەهەمان شێوە تەرسی و دڵەڕاوکێی ڕژێمی جە هێز و ئیرادەو ژەنێ پەی گرڏی ئاشکران."
جە دماو ئەرەیاوناکەی بانگەواز پەی یۆگێرتەو ژەنا جە دژو هرووژمرکا کریان و ئامان: "سەرەڕاو ئیدانەکەردەو هرووژمە سیستەماتیکییەکا کۆمارو ئیسلامی دژو ژەنا بەلوچی و بەرکەردە و کۆچبەرا ئەفغانی، پێسە و کژاری ئەرەیاونمێش ئەوەکۆشای و سەرمەشقایەتی ژەنا بەمەبەسو بەدیئاردەو ژەنا ئازادی و دیموکراتیکی بە ئەرک و هەرمانەی جەپێشینەی مزانمێ، ئینایمێ جا بڕوێنە کە پەرسە و ئازادی ژەنا، پەرسێوە مییاننەتەوەییەنە و جە بارودۆخێوە چا جۆرەنە یەکدەنگیی ژەنا جە وەرگری کەردەی یەکتری تاوۆنە ئاستو خەباتیما بەرز بکەرۆوە. هیزی کە ژەنا دەگاو گونیچی هرووژمشا کریا سەر ، با بە یەکڕیزیی و یۆگێرتەیما، نازمێ کۆمارو ئیسلامی ئایندێوە وناوی بارۆنە ئاراوە."
