هۆرام: جەژنەو قۆربانی، ڕۆو ستایش و ئاخێزوو پەیغەمبەر ئیبراهیم-یەن

پلاتفۆرموو هۆرام-ی بەبۆنەو جەژنەو قۆربانی پەیامی پیرۆزباییش دان و جەژنەکێش بە ڕۆو ستایش و ئاخێزوو پەیغەمبەر ئیبراهیم-ی بەنامێ کەردەێنە.

پلاتفۆرموو هۆرام-ی بەبۆنەو جەژنەو قۆربانی پەیامی پیرۆزباییش دان و جەژنەکێش  بە ڕۆو ستایش و ئاخێزوو پەیغەمبەر ئیبراهیم-ی بەنامێ کەردەێنە و ئاشکراش کەردەن: "پەیامو پەیغەمبەرا و دینەکاشا بە گردی پەی ئاشتی، دادپەروەری و یەکسانی و برایەتی گەلان و رێزگێرتەیەن جە ئینسانەکان".

تەمامی پەیامەکەو پلاتفۆرموو هۆرام-ی:

خەلکوو وەشەویس و باوردارو هۆرامانی و کوردستانی و بە گردی سەرجەم ئیماندارێ  ئایینو ئیسڵامی، بە یاگێ وێش مزانمێ کە جە ڕوێ پسۆ جەژنەو قۆربانی مۆبارەکبایی وێما پێشکەشتا بکەرمێ. جەژنەو قۆربانی پسۆ کەلتوورێ تایبەت هەنگامێنە کە جە لاو پەیغەمبەری گەورە ئێبراهیمی خەلیل-ی پەی پارێزناو ئینسانی جە کەلتوورێ غەڵەت و نادرووست و سەردەموو وێش نریەنە.

ئا هەنگامێ کە پەیغەمبەر ئیبراهیم-ی جە وەختوو وێش نیاش، تاومێ پسۆ ئاخێزێ پەی پارێزناو گیانوو ئینسانی جە وەرانوەروو ویری دماکەوتەی وینمێش. ئیبراهیمی نامدار بە قۆربانی کەردەو حەیوانی کەڵتوورو دماکەوتەو قۆربانی ئینسانیش بن بڕ کەرد. چەنڎە یاد کەردەیۆ جەژنەو قوربانی پەی باوەردارا ڕاو پەیغەمبەر ئیبراهیمی گرنگا، پارێزناو کەلتوورو و فەرهەنگ و ئاخێزوو قوربانی پەی باوردارا ئی مەکتەبەیە ئانڎە گرنگتەرا. مشۆم باوەردارێ بە جەژنەو قۆربانی پەی سەروستەو ئینسانیەتی و یەکسانی سەرەراو پارێزناو بەهاکا پەیاموو پەیغەمبەر ئێبراهیمی جە خۆرافات و دماکەوتەی کە کەسانێ و لایانی ئارۆ بە مەراموو یاوای بە دەسەڵاتی و مادیاتی بە نامێ دینی و باوەریوە بە تایبەت بە نامێ ئیسڵامیوە وەلاش کەراوە، وێشا پارێزنا.

پەیاموو پەیغەمبەرا و دینەکاشا تا ئارۆ بە گردی پەی ئاشتی، عداڵەت و یەکسانی و برایەتی گەلا و رێز و حۆرمەت نیای جە ئینسانەکا بیەن. مشۆم جە ڕوێ پسۆ جەژنەو قوربانی مسڵمانێ بە تایبەت مسڵمانێ گەلەکەیما بە رۆحوو ئاشتی و عەدلڵەتی، کۆمەڵگای جە زڵمی و ناعەداڵەتی پاک بکەراوە و وەشەویسی و پێوەرە ژیوای بکەرا بە بنەڕەتوو پەیوەندەیە ڕوانەکاشا.

پسۆ پلاتفۆرموو هۆرام-ی سەرەراو مۆبارەکبایی  ئی ڕوەیە جە مسڵماناو جیهانی بە تایبەت هۆرامانی، هیواما ئانەن چەژنە پەڕە بۆنە جە وەشی، ئاشتی و یەکسانی پەی گردوو باوەردارا جیاوازەکا دلێ کۆمەڵگاکەی. پەنەوازەن و باوەڕما ئانەن کە جیاتی دژایەتیکەردەی یۆترینی جە ڕوێ پسۆ ئی  ڕوە پیرۆزانەکە هەر یۆشا یاد کەردەیۆ پەیامێ و ئاخێزێ گەورەن، کەرمێش بە بنەڕەت و  ئامیان پەی نزیکایەتی و پێوەرە ژیوایگەڵا. هەر پاسە کە مزانمێ کۆمەڵگا چەندە بە جیاوازیەکاشۆ مۆهیما، رێز گێرتەی چا جیاوازیا دوێ ئنە مۆهمتەرا. بێگومان هەر سەرو ئا ئەساسەیە سەربەرزی ئینسانەکا و یاوای بە کۆمەڵگایە پەر جە یەکسانی و ئاشتی جە ڕاو رێز گێرتەی جە یۆترینی مومکنا و سەربگنۆ.