هێرش هۆرامان: گەریلا تاکە هێز بێ فریاو شەنگالی کەوت

گەریلا هێرش هۆرامان کە یۆ جە ئا گەریلایانە بێ کە بەهاناو شەنگالیەکانەوە لوابێنە و سەبارەت ئانەیە و بە هێرشەکەو داعشی پەی سەو ئێزیدیەکان مەواچۆنە: “جە وەختێوەنە دنیا وەرانوەر بە قڕکەردەی ئێزیدیەکان بێدەنگ بێ، گەریلا تاکە هیز بێ فریاشان کەوت“.

وەختێ کە داعش جە ٣ ئابو ٢٠١٤ هێرشش بەرد سەرو و شەنگالی بە ئامانجو قڕکەردەی ئێزیدیەکان، یۆ جە ئا ١٢ گەریلایە کە پەی ڕزگاری و پارێزناو خەڵکوو ئێزئیدی وێش یاونا شەنگال، هێرش هۆرامان بێ.

جە بێدەنگی دنیایەنە ١٢ گەریلایێ هەپەگە-ی فریاو شەنگالی کەوتێ

هۆرامان باس جە قڕکەردەی ئێزیدیەکان، مدرامانو گەریلای،  کوشتەی چەتەکانو داعشی و ئەرەگێرتەی موسڵ-ی جە لاو داعشیوە مەکەرۆنە و مەواچۆنە: هێزەکێ پارێزنای گەلی - هەپەگە، چەنی هێرشەکەو داعشی پەی سەرو شەنگالی جە زووتەرین وەختەنە بڕیاروو کیاستەی تیمێ تایبەتیی گەریلایش پەی پەیجۆری بارودۆخەکەی وئاژەو ئێزیدیەکانو شەنگالیش دا. سەرو ئا بڕیاریە یۆ جەئا گەریلایانە کە ئەندامو تیمە تایبەتەکەی بێنە، من بێنێ. من وەڵتەر شەنگالم هەرگیز نەدیەبێ و مەنتێقەکەی خاس نە ئەژناسێنمێ. شەنگالەنە هیچ و هێزێوە پەی وەرگیری نەمەنە بێ. گرد ڕەمێ بێنێ، ئێمەیچ تەنیا ڕووەو شەنگال لوێنمێ. ئانە کە ئێمە دیما هیج وەختێ جە ویرم نمەشۆوە. خەڵکی گرد ناڕاحەتێ بێنی. تەنیا ڕەماڕەمێنێ. وەختێ باسوو ئانەی مەکەرێنێ کە پێشمەرگە چەنیشا ڕاست نەبیەنێ و تەنیاشا ئاستێنی.بارودۆخەکە یاگێ داخێ بێ. بە ژنیەو ئی قسا و باسا تووڕەیی جە ناخمانە پەنگیش واردێبێوە. وەختێوە کە بارودۆخو شیویاو خەڵکیما دی، ئەرکوو وێما زیاتەر پەیما بەرکەوت.

سەرجەم چەمەڕێ گەریلای بێنێ

گەریلا هێرش هۆرامانجە درێژەو قسەکاشەنە باسش جە ئانەیە کەردەن، کە نە خەڵکوو ئێزیدی ئێمە خاس ئەژناسێنێ، نە ئێمە ئاشنایەتی پاسەمان سەروو شەنگاڵی و خەلکەکەیش بێ، بەڵام وەختێ ئیمەشا دیەمێ و زاناشا گەریلا پەی چ ئەرکی ئامێنێ، جارێوی تەر ئۆمێد جە چەماشانە وینینی. ساحێبداری گەریلای جە خەلکێوە کە ئۆمێدش چەنە بریابێ و هیچ کەسی بە پەشت و پەناو وێش نەزانێ، گەورەتەرین هەڵوێست بێ. گەریلا جە وەختوەنە کە گردوو جیهانی جە وەرانوەروو کۆمکوشتەو ئێزیدیەکاوە چەمێش قووجنێبێنێ و بێهەڵوێستبێ، گەریلا وێش یاونا شەنگال و بە هەزاران کەسێش جە هێرشو وەحشیانەو داعشی پارێزنێ و ڕزگارێ کەردێ. جیهان بە چەمێ وێش دیش کە گەریلا هێزو پارێزناو گەلەکەیشەن. ڕاستینەو کۆشیای و ئامانجەکا گەریلای فرەتەر بەرکەوت .

هەنگامێ تازێ نریێ و ئارۆ شەنگال شەنگالەکەو ویەردەی نییەن

هێرش هۆرامان جە درێژەو قسەکاشەنە دەستنیشانش کەردەن: گەریلا سەرەراو پارێزناو خەڵکی، هاموەخت دەستشدا ڕێکوستەی خەڵکی و بە ئی جۆرە سەر جەنۆ هیواش بەخشاوە بە خەڵکەکەی کە هیچ هیوێوەش بە ژیوای نەمەنەبێ. دەرەنجامو ئانەیەنە کە ئیسە شەنگاڵ پەی وێش هێزوو پارێزنای (یەبەشە - یەبەشە - ئاسایش)یش هەن. ئینە بە ئاسانی بە دەس نەئاومان. وەختێ گەلێ وێش ڕێکوبزۆن پا ماناینە کە ئی گەلە ئۆمێدش بە دماڕۆ وێش هەن. ئارۆ ئێزئیدیەکێ ئینە جە ئاژێوە پاسنەینە.

ئێزیدیەکێ وێشا تاریخەکەیشان منویسانەوە

هۆرامان جە درێژەنە باسو ئانەی مەکەرۆن، کە شەنگاڵ ئیتر شەنگاڵو وەلێ ٣و ئابو ٢٠١٤ی نییەن، ئێزیدیەکێ ئیسە ساحێبو ئیرادە و رێکوستەو وێشانێ و وێشا مەبەرانێ راوە  ئینە پا مانایە نیا کە ئیتر خەتەری سەرشاوە نەمەن. هێرشە تازەکێ تورکیەی بە فرۆکە و شەهید کەردەو سەرکردەکا گەلوو ئێزئیدی نیشانێ درێژەو پیلانگێڵنایەن سەرشاوە. ئێمەیچ پسۆ گەریلای پارێزناو گەلەکەیما بەئەرکوو وێما مزانمێ و جە ئی ڕێنە سۆز  و بەڵێنمان دان کە گیانوو وێچما بەخت بکەرمێ. ئیتر مەبۆنە جارێ تەر کۆمکوشتەی جە شەنگالەنە ڕووە بدۆنە و بوینمێنە. تاریخو ئێزئیدیا ئیتر وێشا منویساشەوە. پەی ئا ئامانجێچە ئێمە چێش جە دەستمان بەیۆنە، درێخی نمەکەرمێ.