نزیک بە ۲ مانگۍ و نیمەن پارتی گەمارۆش ۋستەن سەرو وارگەو مەخمووری و ئەرەنیشتێ وارگەکەیش ڕووبەڕوو سەختی کەردێنێۋە و دەرنجامشەنە تا ئیسە چەنڎین زارۆڵێ گیانشان جەدەستدان کە دماییشان زریانی تەمەن ٥ مانگانەن.
وارگەو شەهید ڕۆستەم جوودی مەخمووری کە زیاتەر جە ۱۲ هەزارێ ئەرەنیشێ مەدەنیێش دلێنە مژیۋانە کە سەرجەمشان پەنابەرێ کوردێ سەرنیشتو کوردستانییەنێ، نزیک بە ۲ مانگۍ و نیمەن دەسەڵاتدارێ پارتو دیمۆکراتو کوردستانی - (پەدەکە-PDK) گەمارۆش ۋستەن سەرش و ئەرەنیشتێ کامپەکەیش ڕووبەڕوو سەختی و دژۋاری کەردێنێۋە و جە ئاکامشەنە تا ئیسە چەنڎین زارۆڵێ گیانشان جەدەستدان کە دمایینشان زارۆڵێۋی تەمەن ٥ مانگانەن.
جەی بارەۋە ڕاۋەبەری تەندروستی وارگەو مەخمووری ئاشکراش کەرد: "زریان بلووت تەمەن ٥ مانگان نەوەشی دڵی و هەناسەیش بییەن و پنەۋاز بییەن تا پەی چارەسەری و چەمداری پزشکی ببریۆنە یۆ جە نەوەشخانەکانو هەولێری، بەڵام دەسەڵاتدارێ هەولێر ڕاگیریشان جەئانەیە کەردەن و درەنجام زریانی ٥ مانگان گیانش جەدەستدان".
خانەۋادە و کەسوکارو زریانی ۋاتەنشان: "هیزی ٤ شەممە، تەندروستی زریانی تێکشی و بەپەلە بەردمان پەی هەولێری، بەڵام جە ۳ زاڵگێ پەدەکەیەنە ڕاگیریمان ۋنە کریا و دمای چەنڎین سەعاتێ جە ئاستەنگی ئینجا ڕاشان دا درەربازێ هەولێری بێمێنە بەڵام فرە درێ بێ و دەرەنجام زریانی کورڕمان بە شێۋازێۋی غەمگین و تراژیدی کۆتایی بە ژیۋایش ئوما".
گەمارۆکەو سەرو وارگەو مەخمووری دمای ١٧ی تەمموزو ٢٠١٩ی دەستش پنەکەرد کە جە ریستورانتو هۆقەبازو شارو هەولێری بە شێۋازێۋی گوماناۋی (عوسمان کۆسە) گەورە سیخوڕ و ۋەرپرسیار جە دەستگاو هەواڵگری و سیخوڕی تورکیای (میت-MĬT)ی کوشیا. کاربەدەستێ هەولێری سەر بە پارتو دیمۆکراتو کوردستانی (پەدەکە) بە بەهانێ ئانەیە کە یۆ جە بەشدارەکانو کوشتەی عوسمان کۆسەی ئەرەنیشتەو کامپەکەیەن بە نایاسایی و دوور جە سەرجەم پیمانە ئانزانیێ و گەردوونییەکان گەمارۆش وست سەرو کامپەکەی. پی جۆرە هامۆشییە و سەردای پەی وارگەو مەخمووری و بە پێچەۋانەۋە پەی هەولێری قەدەغەن. تەنانەت کرێکارێ، وانکارێ، کاسبکارێ و نەوەشێ کامپەکەی پەیشان نییەن سەردای هەولێری بکەرانێ و ئانێچە ئەرەنیشتێ وارگەکەیش ڕووبەڕوو زەحمەتی و کێشێ و ئاستەنگیێ فرێ کەردێنێۋە. سەرەڕاو سەرجەم هەوڵێ و تەقەلاکانو ئەنجومەنو دیموکراتیی گەلی و دامودەزگاکێ تەرێ جە کامپەکەنە و ناڕەزایەتیەکێ جە بەر دلێ کوردستانیەنە، بەڵام تا ئیستە پەدەکە ئامادە نییەن کۆتایی بە گەمارۆ دۆرپێچداکەی باۋەرۆنە.
