یانەو ژەناو ھۆرامانی گڵکوێ دوێ جە شەهیدەکانو ژیوگەپارێزیشان بەسەرێ کەردێوە
جە سەریاس و شمشێر، کڕێکوزیاو یانەو ژەناو ھەورامانی گڵکوێ دوێ جە شەهیدەکانو ژیوگەپارێزی هەورامان-یشان بەسەرێ کەردێوە و تانجە گۆڵینێشان سەرشاوە نیێرە.
ئارۆ دوو شەممە، ژمارێوە ئەندامێ ڕێکوزیاو یانەو ژەناو ھەورامانی، سەردای گڵکوێ دوێ جە یەرە ژیوگەپارێزەکێ هەورامانی-یشان کەرد کە جە ساتەوەختو ئەوەکوشنای ئێرو دارستانەکانو (بوزین و مەرەخێڵ)یەنە گیانشان بەختکەردەبێ.
جە چوارچێوەنە ئەندامێ ڕێکوزیاکەی جە ئوردوگاو سەریاس-ی سەردای گڵکۆو شەھید (بیلال ئەمینی) و جە دەگاو شمشێر-ی سەردای گڵکۆو شەھید (یاسین کەریمی)شان کەرد و تاجەگۆڵینێشان سەرشاوە نیێرە. هامکات هامغەمی و پەشتیوانی وێشان پەی خانەوادەکانشان نیشانەدا و جەختشان کەردەوە، درێژە پنەدەرێ ڕێبازەکەیشان ببانە. هەرپاسە چەندین پەیامێ و شعرێشان پێشکەشێ گیانو هەر دوێ شەهیدەکەی کەردێ.
ئەندامێ ڕێکوزیاو یانەو ژەناو ھەورامانی جەلاو خانەوادێ هەر دوێ شەهیدیەوە بە گەرمی پێشوازیشان ونەکریا و وەشحاڵێ بیێ بەسەرداکەیشان و نیشاندای و پەشتیوانیەکەیشان و سوپاسشان کەردێ.
بڕیارەن، ئەندامێ ڕێکوزیاو یانەو ژەناو ھەورامانی بشانە شارچەو نەسوڎێ و سەردای گڵکوو ژیوگەپارێز (موختار خەندانی) بکەرانێ کە جە هەمان ڕوودایەنە گیانش بەختکەردەبێ.
جە ماوەی ویەردەنە، دارستانەکێ (بوزین و مەڕەخێڵ)ی سەر بە شارستانو پاوە-و هەورامانی جە دیمو وەرهۆرز (ڕۆژهەڵات)و کوردستانی ئێرشان گێرتەبێ و سەروەختو ئەوەکوشنای ئێرەکەیەنە ٣ ژیوگەپارێزێ هەورامانی بەنامەکێ (موختار خەندانی، یاسین کەریمی، بیلال ئەمینی)کە ئەندامێ ڕێکوزیاو ژیوگەپارێزی ژیوای پاوەی بێنێ گیانشان بەختکەردەبێ و چەنڎین ئەندامێ تەرێ بریندارێ بیێ بێنێ و دماتەر هەر یەرە گیان بەختکەردەکێ جە سەریاس، شمشێر و نەوسوڎە بە بەشداری جەماوەری و شکۆمەندانە تەرمەکێشان ئەسپەردێ کریێ بێنێ.
