ساڵێوە زیاتەرەن کە دۆسیەو هەرێمو هەورامانی جە دیمو وەرهۆرزو کوردستان (ئێران)ی دریان بە ڕکوزیاو پەروەردە، زانست و فەرهەنگو سەر بە نەتەوەیۆگێرتەکان کە ئەژناسیان بە یونسکۆ تا هەورامان چوون میراتی جیهانی تۆمار بکریۆنە.
جەی ئی بارەوە  ڕاوەبەری گردیی میراس فەرهەنگی و پیشەی دەستیەکێ و گەشتوگێڵی جە ئوستانو کرماشانی ئاشکراش کەردەن: "بڕیاربێ جە  مانگەکێ ئوردیبهشت‌ و خرداد-ی ویەردەێ پەی تۆمارکەردەیش بە میراتی جیهانی، ڕێکوزیاو یونسکۆ سەردای هەورامانیش کەردەبیێ. بەڵام بەنوگەو وەڵاوبییەی پەتا و نەوەشی کۆرۆنا ڤایرۆس-ی ئا سەردایە دما وزیا و جە ئیسەنە بڕیارەن جە مانگەو شەهریوەر-ی ئایندەیەنە ڕێکوزیاکە سەردای ئێرانی،و هەورامانی بکەرۆنە".

دۆسیەو هەورامانی کە پەی یونسکۆی کیانیان، ونەکۆڵیای و پەیجوری فراوان جە بوراەکێ (ئەندازیاری بیناسازی و باغداری، گەل شناسی، ژیوگەپارێزی، ئاوی، خاک، فەرهەنگ، زوان و تاریخ) جە وێش مەگێرۆنە و جە میانشەنە ئاماژە بە جیاوازیێ و تایبەتمەندییە زەنگینەکێ هەورامانی و گەلەکەیش دریان و داوا جە یونسکۆ-ی کریان پەی پارێزنایشان، هەرێمو هەورامانی کە مەگنۆنە شارستانەکێ مەریوان، سەوڵاوا، پاوە و سنە-ی سەر بە ئوستانەکێ سنە-ی و کرماشان-ی پێسەو میراتی جیهانی مرۆڤایەتی تۆمار بکەرۆنە.

ئەگەر یونسکۆ هەورامانی چوون میراتی فەرهەنگی جیهان تۆمار بکەرۆنە، ئاوەختە نەتەوە یۆگێرتەکێ و دەوڵەتو ئێرانی ناچارێنێ بودجەی تایبەت بە پارێزنای هەورامانی جە گردوو بوارەکانە دیاری بکەرانێ و ڕا نەڎانە ئا میراتە دەوڵەمەندە جیهانییە دەستکاری و وێران بکریۆنە. ئانێچە هەنگامێوە گرنگەنە تا جە ڕاشەوە زوان، وێژە، فەرهەنگ، تاریخ و جیاوازیێ و تایبەتمەندیێ هەورامانی و هەورامییەکان جە فەوتیای ڕزگارێ بکریانێ و هامکات گەشەشەان پنە بدریۆنە.