پەرلەمانتارێکی سویسرا ڕەشنوسی یاسای چەکی کیمیایی تورکی پێشکەشی حکومەت کرد
کروتاز بریگیت پەرلەمانتاری سویسرا لەسەر لیستی پارتی سۆسیالیست، لەبارەی بەکارهێنانی چەکی کیمیایی لەدژی کورد لەلایەن دەوڵەتی تورکەوە، پرسیاری لە حکومەت کرد.
بریگیت بۆ ئەوەی حکومەتی سویسرا لێکۆلینەوە لە چەکی کیمیایی دەوڵەتی تورک بکات، ڕەشنوسی یاسای چەکی کیمیایی ئامادە کرد و پێشکەشی پەرلەمانی وڵاتەکەی کرد.
لەم چوارچێوەیەدا پەرلەمانتارە سویسریەکە ئەم پرسیانەی لە حکومەت کرد:-
-ئایا حکومەت ئاگادارە کە لە ساڵی ٢٠٢١دا دەوڵەتی تورک لەدژی هەرێمە کوردیەکان چەکی کیمیایی بەکاردەهێنێت؟
-سویسرا چۆن وابەستەی پەیمانی قەدەغەکردنی چەکی کیماییە کە خۆشی ئیمزای کردووە، بە تایبەتی لە هەرێمە کوردیەکان؟
-بۆچوون و هەڵسەنگاندنی حکومەتی سویسرا لەبارەی ڕێبازی شەڕی تورک لە دەرەوە و ناوخۆدا لەدژی گەلی کورد چۆنە؟
-ئایا حکومەتی سویسرا دەتوانێت سوپای سویسرا بۆ لێکۆلینەوە ئەرکدار بکات؟
-حکومەتی سویسرا چۆن سەیری ئاشتیەکی هەمیشەیی لەو ناوچانە دەکات کە شوێنی نیشتەجێبوونی گەلی کوردە؟
-کێشەی کورد لە نێوان کورد و تورکیا و لەو ناوچانەی کە زۆربەی دانیشتوانەکەی کوردن، لەنێو پەیوەندی دیپلۆماسی نێوان سویسرا و تورکیا چۆن جێی خۆی گرتووە؟
ف.ق
