چەندین نوسەر، پارێزەر، چالاکوانی مافەکانی مرۆڤ و سینەماکاران لە ناوەوە و دەرەوە (دیسپۆرا)ی سووریا پشتگیرییان دا بە دەقی هەڵمەتەکە کە تێیدا بە تایبەت باسی بابەتی پرسی کورد و حکومڕانی دەکات.

بە گوێرەی ئاژانسی فرانس پرێس (AFP) لە دەقی هەڵمەتەکەدا دەستنیشان کراوە لەگەڵ ئیدارەی خۆبەڕێوەبەری باکوور و ڕۆژهەڵاتی سووریادا لە چوارچێوەی سیستەمێکی ناناوەندی (لا مەرکەزی) حکومڕانیدا بە شێوەیەکی یەکسان پرسی کورد چارەسەر بکرێت.

خواستی مافە بنەڕەتی و ئازادییەکان

واژۆکاران لە سەرەتادا داوای ئازادی ڕادەربڕین و کۆبوونەوە و باوەڕبوون، بۆ گەڕاندنەوەی ئازادییە مەدەنییە سەرەتاییەکان، مافی پێکهێنانی سەندیکا و پارتی سەربەخۆیان کرد.

لە داواکارییەکەدا هاتووە پێویستە سیستەمێکی سیاسی دابمەزرێت، کە گەلی سووریا بۆی ڕاپەڕین و سەدان هەزار کەس گیانی خۆیان لە پێناودا لە دەستداوە. لە قۆناغی گواستنەوەدا بانگەوازێک هەبوو بۆ پەسەندکردنی دەستوورێکی نوێ کە دان بە ئازادیدا بنێت و هەڵبژاردنی ئەنجوومەنی دامەزرێنەر لەسەر بنەمای یاسای یەکسانی هەڵبژاردن پەسەند بکرێت.

نووسەران فاروق مەردەم بەی، سەمەر یەزبەک، مستەفا خەلیفە و یاسین حاجی ساڵەح، سینەماکاران حەلا عەبدوڵا و وەعد ئەل کاتیب لە واژۆکارانی کەمپەینەکەن.

هەڵمەتەکە بەردەوامە.