پارت و لایەنە سیاسییەکانی ڕۆژهەڵاتی کوردستان بانگەوازییان لە هەمووان کرد لە دژی سزای لە سێدارەدانی هەردوو ژنە چالاکوان پەخشان عەزیز ی و وریشە مورادی مانگرتی گشتی ڕابگەیەنن.
لە ڕاگەیاندراوێکی نوسراودا پارت و لایەنە سیاسییەکانی ڕۆژهەڵاتی کوردستان بانگەوازییان لە گەلی ڕۆژهەڵاتی کوردستان کرد ڕۆژی چوارشەممە ٣ی کانوونی دووەمی ٢٠٢٤ لە دژی سزای لە سێدارەدانی هەردوو ژنە چالاکوان پەخشان عەزیز ی و وریشە مورادی وەک ناڕەزایەتییەک مانگرتنی گشتی ڕابگەیەنن.
دەقی ڕاگەیاندراوەکە بەم شێوەیە:
"بۆ کۆمەڵانی خەڵکی ئازادیخوازی کوردستان!
لە بارودۆخێکدا که گرانی و بێکاری و نەداری و دەیان کێشە و گرفتی ئابووری، خزمەتگوزاری و نەبوونی هەر چەشنە ئازادییەکی سیاسی بەربینگیان بە کۆمەڵگەی کوردستان و ئێران گرتووە، ڕێژیمی ئێران، لەبری وەڵامدانەوە بە ویست و داخوازییەکانی جەماوەر، شمشێری لە دژی زیندانیانی سیاسی لە ڕوو بەستووە و حوکمی لە سێدارەدانی بۆ دەیان تێکۆشەری سیاسی لە کوردستان و سەراسەری ئێران دەرکردووه. له‌و په‌یوه‌ندییه‌دا بە تایبەت بەهۆی مەترسیی لەسێدارەدانی “پەخشان عەزیزی” و “وریشە مورادی”، پێوستە هەنگاوی خێرا و بەپەلە هەڵبگیردرێت لە پێناو ڕزگارکردنیان لە پەتی سێدارە. یەکێک لەم هەنگاوانەش بریتییە لە بەڕێوەچوونی مانگرتنێکی گشتی لە کوردستان.
مانگرتنی گشتی و جەماوەریی لە کوردستان بەردەوام وەک ڕێکارێکی بەرەنگاریی مەدەنی لە کاتە هەستیارەکاندا بووەتە نەریتێکی جێکەوتوو لە کۆمەڵگەی پێشکەوتووی کوردستاندا. ئەمڕۆ که لە بەردەم یەکێک لەو کاتە مێژووییانەداین، پێویسته ئیرادەی جەماوەری لە بزووتنه‌وه‌یه‌کی شایستەدا خۆی نیشان بداتەوە بۆ ئەوەی پێش بە تراژێدیایەکی دیکە بگرێت و گیانی کۆمەڵیک مرۆڤ کە هیچ کردارێکیان جگە لە خۆشەویستی خەڵک و خەبات لە پێناو ئازادی و یەکسانیدا نەبووە، لە پەتی سێدارە ڕزگار بکات. بێگومان ئەو یەکگرتوییەی جەماوەر کە لە شێوازێکی مەدەنی و ئاشتیانەدا خۆی دەنوێنی، دەتوانێت جارێکی دیکە هەروەک چۆن لە شۆڕشی “ژن، ژیان، ئازادی”دا، کوردستان خاوەنی پەیامی خەبات و خۆڕاگری بۆ هەموو کۆمەڵانی خەڵک لە سەرتاسەری ئێران بوو، دووپات ببێتەوە. ئەم بزووتنەوەیە لە هەمان‌کاتدا بەدەنگەوەهاتنێکە بۆ ئەو زیندانییە سیاسییە تێکۆشەرانەی کە هەموو ڕۆژانی سێشەممەیەک لە زیاتر لە ٣٠ زیندانی ئێران، بە مانگرتنی بوێرانەی خۆیان، دروشمی “نا بۆ لەسێدارەدان” بەرز دەکەنەوە.
ئێمە ئه‌و حیزب و لایەنە سیاسییانه‌ی که ناومان له‌م ڕاگه‌یاندراوه هاوبه‌شه‌دا هاتووه، داوا لە هەموو جەماوەری تێکۆشەری کوردستان دەکەین کە ڕۆژی چوارشەممە ٣ی مانگی ڕێبەندان، لە هەموو کوردستان لە مانگرتنێکی گشتی لە دژی حوکمی لە سێدارەدانی ڕۆڵەکانمان بەشدار بن و هەروەها سەرجەم ناوەندەکانی کار، بازاڕ و خوێندن دابخرێن. بەمجۆرە هێزی یەکگرتووی جەماوەر لە پێناو دابینبوونی ئامانجی سیاسی و ئینسانی خێرادا، نیشان بدرێتەوە.
ئەم هەنگاوە پێشگیرانەیە دەرفەتێکە بۆ ڕزگارکردنی گیانی مرۆڤەکان و لە هەمان‌کاتدا ڕێگریکردنە لە تازییەباربوونی زیاتری بنەماڵەکان. با جارێکی دیکە نیشانی بدەینەوە کە کوردستان لە بەرامبەر وەها حوکم گەلێکی نامرۆڤانەدا بێدەنگ نابێ و هەڵوێستی دەبێت.
بژی یەکگرتوویی و یەکدەنگیی جەماوەریی لە کوردستان.
