'رێپێوانی گەورەی ئازادی' کە لەپێناو ئازادیی جەستەیی رێبەری گەلی کورد عەبدوڵا ئۆجالان و چارەسەری دیموکراتیکی پرسی کورد لە ١ی شوبات لە وان و قەرسەوە دەستیپێکرد ئەمرۆ دەگاتە کۆتایی. سیاسەتمەداران و نوێنەرانی رێکخراوە دیموکراتیکە مەدەنیەکان لە ساڵیادی ٢٥ەمینی پیلانگێریی نێونەتەوەیی لە گەڕەکی عەلیگۆری ناوچەی پرسوسی رحا بەردەوام بوون لە رێپێوانەکەیان. پێشبینی دەکرێت کە بەشداربووانی رێپێوان دواتر بچنە گوندی ئامارا کە زێد و شوێنی لەدایکبوونی رێبەری گەلی کورد عەبدوڵا ئۆجالانە.

بەشداربووانی ناوچەکە لە بەردەم ناوچەکە بە دروشمەکانی 'ئازادی سەرۆک ئازادی گەلانە'، "هەزار سڵاو لە ئیمراڵی"، "بە گیان بە خوێن لەگەڵتاین ئەی سەرۆک" و "بێ سەرۆک ژیان نابێت" پێشوازییان لێکرا و لەوێ کۆنفڕانسێکی رۆژنامەوانی سازکرا.

پەرلەمانتاری دەم پارتی عومەر ئۆجالان لێدوانیدا و وتی، "ئەمڕۆ بۆ ئێمە رۆژێکی رەشە. بەڕێز ئۆجالان بە پیلانگێڕییەکی نێونەتەوەیی رادەستی تورکیا کرایەوە. ئێمە لەپێناو ئامانجێک کەوتینەرێ. ماوەی ٢٥ ساڵە بەڕێز ئۆجالان گۆشەگیرییەکی توندی بەسەردا سەپێندراوە و ٣ ساڵە هیچ هەواڵێکی نازانرێت. وەک بەشداربووانی رێپێوانی راستی ئێمە لە دوو قۆڵەوە بۆ ئازادی وڵاتمان، گەلەکەمان و بەڕێز ئۆجالان دەستمان بە رێپێوان کرد".

عومەر ئۆجالان راشیگەیاند، کە رێپێوانیان لەمرۆ بە دواوە گەورەتر دەبێت و وتی، "گەلەکەمان دەڵێت کە بە هەوڵدان و جوڵانەوەیەکی یەکگرتووانە دەتوانن گۆشەگیری تێکبشکێنن. دەزانێت هەرکات بەڕێز ئۆجالان قسە بکات ئاشتی لەم وڵاتە دەچەسپێت".

بەشداربووانی رێپێوانەکە دوای کۆنفڕانسە رۆژنامەوانیەکە بەرەو ئامارا کەوتنەڕێ.

هـ . ب