داواکاری گشتی ئامەد بە پشتبەستن بە وتەکانی دانپێدانەر ئومید ئەکبییک لێکۆڵینەوەی دەستپێکرد و لە ٢٥ی نیسانیش سەبارەت بەلێکۆڵینەوەکان ئۆپەراسیۆنی دەستبەسەرکردنی لە ٢١ شار دەستیپێکرد. لەوکاتەدا ڕۆژنامەنووس بێریتان جانۆزەریش دەستبەسەر کرا و یەکەم دانیشتنی دۆسیەکەی لە دەیەمین دادگای تاوانە قورسەکانی ئامەد بەئامادە بوونی پارێزەرەکەی و شاێەتحاڵ ئومید ئەکبییک بەڕێوەچوو.

نوێنەرانی کۆمەڵەی ڕۆژنامەنووسانی ژنی میزۆپۆتامیا (مەکەگە)، کۆمەڵەی ڕۆژنامەنووسانی دیجلە فورات (دەفەگە) و کۆمەڵەی میدیا و کاروباری یاسایی (مەلەسەئا) بەدواداچوونیان بۆ دانیشتنەکە کرد.

لە دانیشتنەکە ڕۆژنامەنووس جانۆزەر بەرگری لە خۆی کرد و ڕایگەیاند کە شایەتحاڵ ئومید ئەکبییک ناناسێت و لەو هەواڵەوە زانیویەتی کە ئەندامی (هەدەپە)یە. جانۆزەر لە درێژەی قسەکانیدا وتی: جگە لەوەش لە تۆمەتبارکردنەکەدا ئەو هەواڵەی کە کردوومە وەک تاوان نیشان دراوە. سەرچاوەکانی ئەم هەواڵانە ڕوونن. من ڕۆژنامەنووسێکی ناسراوم و کارەکانم ناشارمەوە. لە ڕابردوودا بەهۆی هەواڵەکانمەوە دادگایی کراوم و بێتاوانیم دەرکەوتووە. هەواڵی سەبارەت بە ژن و منداڵ دروست دەکەم. بوومە بە دەنگی ئەو ژن و منداڵانەی کوژران، تووشی توندوتیژی هاتوون، تووشی دەستدرێژی و ئازاردان هاتوون. بەبێ فەرق و جیاوازی ، مایکەکەم بۆ ژنە سیاسییەکان گرتووە. ڕۆژنامەنووسی و دروستکردنی هەواڵ تاوان نییە. من ئەو تۆمەتانەی ئاراستەم کراوە قبوڵ ناکەم”.

بەڵام داواکاری گشتی زیاتر گوێ بە دانپێدانانەکانی شاێەتحاڵەکە داوە و داوای کردووە کە ڕۆژنامەنووس جانۆزەر بە پاساوی "ئەندامێتی لە ڕێکخستن" سزای ٧ ساڵ و ٦ مانگ تا ١٥ ساڵ زیندانی بەسەردا بسەپێندرێت.

 پارێزەری جانۆزەر موحەرەم ئەربی، داوای کاتی بۆ بەرگریکردن لە موەکیلەکەی کرد.

دادگا داواکارییەکەی ئەربی قبوڵ کرد و دانیشتنەکەی بۆ ٨ی کانوونی دووەم دواخست.